Ndzima 50

Ku Lunghiselela Ku Langutana Ni Nxaniso

ENDZHAKU ko letela vaapostola vakwe hi tindlela to hetisisa ntirho wo chumayela, Yesu u va tsundzuxa hi ta vakaneti. U ri: “Vonani, ndzi mi rhuma mi fana ni tinyimpfu exikarhi ka timhisi . . . Tivoneleni, hikuva vanhu va ta mi nyiketa etihubyeni, va mi ba hi minkhavi emasinagogeni ya vona. Mi ta yisiwa emahlweni ka tindhuna ni le mahlweni ka tihosi hikwalaho ka mina.”

Ku nga khathariseki nxaniso lowu vavaka lowu valandzeri vakwe va nga ta langutana na wona, Yesu hi laha ku tiyisaka nhlana wa tshembisa a ku: “Kambe siku va mi nyiketaka eka vona, mi nga kanakani hi leswi mi nga ta vula swona ni mavulavulele ya kona; hikuva sweswo, mi ta nyikiwa swona enkarhini wolowo. A hi n’wina mi nga ta vulavula, kambe i Moya wa Tata wa n’wina lowu nga ta vulavula ha n’wina.”

Yesu u ya emahlweni a ku: “Munhu ú ta nyiketa makwavo wa yena eku dlaweni, ni tatana ú ta endlisa sweswo eka n’wana wa yena; vana va ta pfukela vatswari va vona, va va dlaya.” Wa tlhandlekela a ku: “Mi ta vengiwa hi vanhu hinkwavo hikwalaho ka vito ra mina; kambe loyi a tiyiselaka ku fika makumu, hi yena loyi a nga ta ponisiwa.”

Ku chumayela loku i ka nkoka lowukulu. Hikwalaho ka xivangelo lexi Yesu u kandziyisa xilaveko xa vutlhari leswaku hi ta tshama hi ntshunxekele ku hetisisisa ntirho. U ri: “Kutaku loko va mi xanisa emutini wun’wana, tsutsumelani eka wun’wanyana; hikuva ndzi tiyisile ndzi ri ka n’wina: N’wana-wa-Munhu ú ta humelela, mi nga si hlanganisa miti hinkwayo ya Israyele.”

I ntiyiso leswaku Yesu u nyikele xiletelo lexi, xitsundzuxo ni xikhutazo eka vaapostola vakwe va 12, kambe a xi endleriwe ni lava a va ta hlanganyela eku chumayeleni ka misava hinkwayo endzhaku ka ku fa ni ku pfuxiwa ka yena eku feni. Leswi swi kombisiwe hi ku vula ka yena leswaku vadyondzisiwa vakwe a va ta ‘vengiwa hi vanhu hinkwavo,’ hayi hi Vaisrayele lava vaapostola a va rhumiwe ku ya chumayela eka vona ntsena. Nakambe, vaapostola entiyisweni a va yisiwanga emahlweni ka vafumi ni tihosi loko Yesu a va rhumile eka tsima ra vona ro koma ro chumayela. Ku tlula kwalaho, vapfumeri enkarhini wolowo a va nyikeriwanga eku feni hi swirho swa mindyangu.

Kutani loko a vula leswaku vadyondzisiwa vakwe a a va nga ta yi hlanganisa miti ya vona hinkwayo hi ku chumayela ‘N’wana-wa-Munhu a nga si fika,’ Yesu hi vuprofeta a a hi byela leswaku vadyondzisiwa vakwe a a va nga ta yi hlanganisa miti ya misava hinkwayo leyi akiweke hi ku chumayela hi ta Mfumo wa Xikwembu lowu tlhomiweke, Hosi Yesu Kriste la kwetsimisiweke a nga si fika tanihi ndhuna leyi avanyisaka ya Yehova eArmagedoni.

Loko a yisa swiletelo swakwe swo chumayela emahlweni, Yesu u ri: “Mudyondzisiwa a hi lonkulu eka mudyondzisi wa yena, ni nandza a hi nkulukumba eka n’wini wa yena.” Kutani valandzeri va Yesu va fanele ku langutela ku amukela ku yingayingisiwa ni ku xanisiwanyana koloko hi laha a endleke ha kona hikwalaho ko chumayela Mfumo wa Xikwembu. Hambi swi ri tano, wa tsundzuxa: “Mi nga tshuki mi chava lava dlayaka miri, va ri hava matimba yo dlaya moya; kambe chavani loyi a nga ni matimba yo lovisa moya ni miri wa munhu [eGehena].”

Yesu a ta veka xikombiso emhakeni leyi. Handle ko chava u ta tiyisela rifu ematshan’wini yo landzula vutshembeki byakwe eka Loyi a nga ni matimba hinkwawo, Yehova Xikwembu. Ina, i Yehova loyi a nga lovisaka “moya” wa munhu ntsena (laha eka xikombiso lexi swi vula mintshembo ya munhu ya vumundzuku tanihi munhu la hanyaka) kambe loyi a nga pfuxaka ematshan’wini ya sweswo munhu leswaku a tiphina hi vutomi lebyi nga heriki. Mayana Tatana wa rirhandzu, wa ntwelo-vusiwana wa le tilweni loyi Yehova a nga yena!

Yesu u ya emahlweni a khutaza vadyondzisiwa vakwe hi xifaniso lexi kombisaka vuhlayisi bya Yehova bya rirhandzu eka vona. “Xana swindzingiri swimbirhi a swi xaviwi hi sente yin’we ntsena?” wa vutisa. “Kasi a ku nga wi ni xin’we eka swona ehansi, Tata wa n’wina a nga swi tivi. Loko mi ri n’wina, hambi yi ri misisi ya tinhloko ta n’wina yi hlayiwile hinkwayo. Hikokwalaho mi nga chaveni, mi tlula swindzingiri leswo tala.”

Rungula ra Mfumo leri Yesu a ri lerisaka vadyondzisiwa vakwe ku ri twarisa ri ta avanyisa mindyangu, loko swirho swin’wana swi ri karhi swi ri amukela ivi swin’wana swi ri ala. Wa hlamusela a ku: “Mi nga anakanyi leswaku ndzi tele ku neha ku rhula emisaveni; ndzi tele ku neha fumu, ku nga ri ku rhula.” Xisweswo, leswaku xirho xa ndyangu xi amukela ntiyiso wa Bibele swi lava xivindzi. “La rhandzaka tata wa yena kumbe mana wa yena ku tlula mina, a nga ndzi faneri,” ku xiya Yesu, “ni loyi a rhandzaka n’wana wa yena wa xinuna kumbe wa xisati ku tlula mina, a nga ndzi faneri.”

Loko a dlayelela swiletelo swakwe, Yesu u hlamusela leswaku lava va amukelaka vadyondzisiwa vakwe na yena va n’wi amukela. “Un’wana ni un’wana la nyikaka hambi wu ri ndzheko wa mati yo titimela eka un’wana wa lavantsongo lava, hi ku tiva leswaku i mudyondzisiwa wa mina, a nga ka a nga pfumari hakelo ya yena.” Matewu 10:16-42.

▪ I switsundzuxo swihi leswi Yesu a swi nyikeke vadyondzisiwa vakwe?

▪ I xikhutazo ni ku chavelela kwihi leswi a va nyikaka swona?

▪ Ha yini swiletelo swa Yesu swi tirha ni le ka Vakriste va manguva lawa?

▪ Mudyondzisiwa wa Yesu a nga le henhla ka mudyondzisi wakwe hi ndlela yihi?