Swivutiso Swa Vahlayi

◼ Eka Matewu 10:21, xana Yesu a a hi tsundzuxa leswaku vamakwerhu vo tala ebandlheni a a va ta hundzukela vamakwavo va vona va moya?

E-e, xolexo a hi xikongomelo xa xitsundzuxo xa Yesu, lexi hlayekaka hi ndlela leyi: “Munhu ú ta nyiketa makwavo wa yena eku dlaweni, ni tatana ú ta endlisa sweswo eka n’wana wa yena; vana va ta pfukela vatswari va vona, va va dlaya.”—Matewu 10:21.

Mongo wu kombisa leswaku Yesu u vule leswi eka vaapostola va 12 loko a va rhumile eka riendzo ro ya chumayela eIsrayele. Swo tala swa leswi a nga swi vula swi ve ni tinhlamuselo ta nkoka eka vaapostola. Hi xikombiso, u te a a va nyikiwe matimba yo horisa mavabyi, ku hlongola mademona, hambi ku ri ku pfuxa vafi hi masingita. (Matewu 10:1, 8; 11:1) Matimu ma kombisa leswaku a hi Vakriste hinkwavo lava amukeleke matimba yo tano ya masingita, ma tiyisa leswaku laha Yesu a a vulavula ni vayingiseri van’we hi ku kongoma—vaapostola va yena.

Kambe, swin’wana swa leswi Yesu a swi vuleke swi fike ni laha riendzo ro chumayela ra vaapostola ri nga fikangiki kona. U va byerile a ku: “Tivoneleni; . . . mi ta yisiwa emahlweni ka tindhuna ni le mahlweni ka tihosi hikwalaho ka mina, leswaku mi humesa vumbhoni eka vona ni ka vamatiko.” (Matewu 10:17, 18) Eka riendzo rolero, kumbexana lava 12 va langutane ni nkaneto, kambe a ku na vumbhoni bya leswaku va yisiwe “emahlweni ka tindhuna ni le mahlweni ka tihosi” leswaku va nyikela vumbhoni eka “vamatiko.”a Emalembeni lama landzeleke, vaapostola va yime emahlweni ka vafumi, tanihi Tihosi Heroda Agripa I na II, Sergiyo Pawulo, Galiyo, hambi ku ri Mufumi Nero. (Mintirho 12:1, 2; 13:6, 7; 18:12; 25:8-12, 21; 26:1-3) Kutani ke, marito ya Yesu ma tirhile endzhakunyana.

Ndzayo ya Yesu yi ye emahlweni ni xitsundzuxo lexi nge: “Munhu ú ta nyiketa makwavo wa yena eku dlaweni.” A a nga kombeteli eka vamakwavo va moya, tanihi leswi a a nga kombeteli eka vatatana kumbe vana va moya hi marito ya yena lama landzelaka eka ndzimana 21: “Tatana ú ta endlisa sweswo eka n’wana wa yena; vana va ta pfukela vatswari va vona, va va dlaya.” Yesu a a vula leswaku vaapostola a va ta rindzela rivengo kumbe nkaneto hambi ku ri eka maxaka.—Matewu 10:35, 36.

Vaapostola a a va fanele ku tiyisela eka riendzo rolero ro chumayela. Yesu u ye emahlweni a ku: “Mi ta vengiwa hi vanhu hinkwavo hikwalaho ka vito ra mina; kambe loyi a tiyiselaka ku fika makumu, hi yena loyi a nga ta ponisiwa.”—Matewu 10:22.

Swin’wana swa leswi Yesu a nga swi vula eka xiendlakalo xexo i swa nkoka eka hina namuntlha tanihi Timbhoni ta Yehova. Lexi hi xi kandziyisaka eku chumayeleni ka hina i Mfumo. Hi endla vutirheli bya hina mahala naswona hi lava vanhu lava nga ni ku tsakela eka rungula leri kumbe lava ri va lulamelaka. Xitsundzuxo xi fanerile. Vakaneti va tala. Minkarhi yin’wana maxaka, vaakelani kumbe vatirhi-kulorhi va vanga swiphiqo leswikulu, ngopfu-ngopfu eka lavo lulama lava sungulaka ku landzela ndlela ya Vukriste bya ntiyiso. Yesu u phindhe xitsundzuxo hi ta nkaneto wo tano loko a hlamusela “xikombiso” xa vukona bya yena. (Matewu 24:3, 9, 10; Luka 21:16, 17) U tlhele a vula xilaveko xo ‘tiyisela ku fika emakumu leswaku hi ta ponisiwa.’ Ina hi fanele hi tiyisela ku fika eku heleni ka vutomi bya hina bya namuntlha kumbe ku kondza mafambiselo lawa ya swilo ma hela kutani hi nga nghena emisaveni leyintshwa.—Matewu 24:13.

[Nhlamuselo ya le hansi]