U Tiyimisele Ku Chumayela Hambiloko A Xanisiwa

Yesu u nyika vaapostola vakwe swiletelo leswinene swa ndlela yo chumayela loko va ri karhi va famba hi mitlawa. Hambiswiritano, a swi heleli kwalaho. Hi musa, u va lemukisa hi vakaneti a ku: “Vonani! Ndzi mi rhuma ku fana ni tinyimpfu exikarhi ka timhisi . . . Tivoneleni eka vanhu, hikuva va ta mi yisa etihubyeni naswona va ta mi ba emasinagogeni ya vona. Mi ta yisiwa emahlweni ka tindhuna ni tihosi hikwalaho ka vito ra mina.”—Matewu 10:16-18.

Ina, valandzeri va Yesu va nga xanisiwa swinene kambe wa va tiyisekisa ni ku va tshembisa a ku: “Loko va mi khoma, mi nga vileli hi leswi mi nga ta swi vula kumbe ndlela leyi mi nga ta swi vula ha yona, hikuva leswi mi nga ta swi vula, mi ta nyikiwa swona hi nkarhi wolowo, hikuva a hi n’wina mi nga ta vulavula, kambe i moya wa Tata wa n’wina lowu nga ta vulavula ha n’wina.” Yesu u ya emahlweni a ku: “Makwavo u ta nyiketa makwavo leswaku a dlayiwa, tatana a nyiketa n’wana wakwe, kasi vana va ta pfukela vatswari va endla leswaku va dlayiwa. Mi ta vengiwa hi vanhu hinkwavo hikwalaho ka vito ra mina, kambe loyi a tiyiseleke ku ya fika emakumu u ta ponisiwa.”—Matewu 10:19-22.

Leswi ku chumayela swi nga swa nkoka swinene, Yesu u kandziyisa xilaveko xa leswaku valandzeri vakwe va va ni vuxiyaxiya leswaku va ta tshama va tshunxekile loko va endla ntirho lowu. U ri: “Loko va mi xanisa emutini wun’wana, balekelani eka wun’wanyana; hikuva ndzi tiyisile ndzi ri eka n’wina, N’wana wa munhu u ta fika mi nga si heta ntirho wa n’wina emitini ya Israyele.”—Matewu 10:23.

Mayana swiletelo, swilemukiso ni swikhutazo swo hlawuleka leswi Yesu a swi nyikaka vaapostola va 12! U nga swi tlangela leswi marito lawa a ma endleriwe ni lava a va ta chumayela endzhaku ka ku fa ni ku pfuxiwa ka Yesu. Leswi swi voniwa hi leswi a swi byeleke vadyondzisiwa leswaku “va ta vengiwa hi vanhu hinkwavo,” ku nga ri eka lava vaapostola va rhumiweke ku ya chumayela eka vona ntsena. Ku tlula kwalaho, a ku kona laha hi hlayaka hi ku yisiwa ka vaapostola emahlweni ka valawuri ni tihosi enkarhini wa tsima leri ro koma ro chumayela eGaleliya kumbe ku nyiketiwa hi swirho swa ndyangu leswaku va dlayiwa.

Yesu u ehleketa hi nkarhi lowu taka loko a ri karhi a byela vaapostola swilo leswi. Ehleketa hi nhlamuselo yakwe eka vadyondzisiwa vakwe leswaku a va nga ta heta ku chumayela exifundzheni, ‘N’wana wa munhu a nga si fika.’ Yesu u kombisa leswaku vadyondzisiwa vakwe va nge heti ku chumayela hi Mfumo wa Xikwembu loko Hosi leyi kwetsimisiweke Yesu Kreste yi nga si fika tanihi muavanyisi wa Xikwembu.

Loko va ri karhi va endla ntirho wo chumayela, a swi fanelanga swi va hlamarisa vaapostola loko va kanetiwa hikuva Yesu u ri: “Xichudeni a xi n’wi tluli mudyondzisi wa xona, ni hlonga a ri n’wi tluli n’wini wa rona.” Nhlamuselo ya Yesu ya twisiseka. U khomiwa hi ndlela yo biha a tlhela a xanisiwa loko a chumayela hi Mfumo wa Xikwembu, na vona swi ta va tano. Kambe u va khongotela a ku: “Mi nga va chavi lava dlayaka miri kambe va nga swi kotiki ku herisa vutomi; kambe chavani loyi a nga lovisaka vutomi ni miri eGehena.”—Matewu 10:24, 28.

Yesu u hi vekela xikombiso lexinene emhakeni leyi. Hi xivindzi u tiyisele rifu ematshan’weni yo landzula ku tshembeka kakwe eka loyi a nga ni matimba hinkwawo, ku nga Yehovha. I Xikwembu xa Matimba Hinkwawo lexi nga lovisaka “vutomi” bya munhu (ku langutela kakwe vutomi enkarhini lowu taka) kumbe lexi nga pfuxaka munhu leswaku a tsakela vutomi lebyi nga heriki. Leswi swi fanele swi va tiyise ngopfu vaapostola!

Yesu u kombisa ndlela leyi Xikwembu xi khathalelaka valandzeri va xona hayona hi ndlela leyi: “Xana swindzingiri swimbirhi a swi xavisiwi hi sente yin’we? Kambe ku hava ni xin’we xa swona lexi nga welaka ehansi Tata wa n’wina a nga swi tivi. Hikwalaho mi nga chavi; mi va nkoka ku tlula swindzingiri swo tala.”—Matewu 10:29, 31.

Rungula leri vadyondzisiwa va Yesu va ri chumayelaka ri ta hambanisa mindyangu, van’wana va ta ri amukela kasi van’wana a va nge ri amukeli. Yesu u hlamusela a ku: “Mi nga ehleketi leswaku ndzi tise ku rhula emisaveni.” Entiyisweni, swi lava xivindzi leswaku xirho xa ndyangu xi amukela ntiyiso lowu nga eBibeleni. Yesu u ri: “Loyi a rhandzaka tata wakwe kumbe mana wakwe ku tlula mina a nga ndzi faneli; naswona loyi a rhandzaka n’wana wakwe wa jaha kumbe wa nhwanyana ku tlula mina a nga ndzi faneli.”—Matewu 10:34, 37.

Kambe van’wana va ta va amukela kahle vadyondzisiwa vakwe. U ri: “Loyi a nyikaka un’wana wa lava lavatsongo mati yo titimela, leswaku a nwa hileswi a nga mudyondzisiwa, ndza mi byela, a nge lahlekeriwi hi hakelo yakwe.”—Matewu 10:42.

Vaapostola va hlomisiwe kahle hi swiletelo swa Yesu, swilemukiso ni swikhutazo naswona va “famba hi miti va chumayela mahungu lamanene ni ku hanyisa lava vabyaka.”—Luka 9:6.