Ndzima 65

Pfhumba Ra Xihundla Ro Ya eYerusalema

I XIMUN’WANA xa 32 C.E., naswona Nkhuvo wa Mintsonga wu kusuhi. Yesu u hikele ntirho wakwe ngopfu-ngopfu eGaleliya ku sukela hi Paseka ya 31 C.E., loko Vayuda va ringete ku n’wi dlaya. Hi ku fanana, ku sukela enkarhini wolowo Yesu a endzele Yerusalema ntsena ku va kona eka minkhuvo minkarhi ya lembe na lembe ya Vayuda.

Vamakwavo wa Yesu manuku va n’wi khutaza: “Suka la, u ya eYudiya.” Yerusalema i muti-nkulu wa Yudiya ni ntsindza wa vukhongeri wa tiko hinkwaro. Vamakwavo va anakanyisisa va ku: “Hikuva a ku na munhu la endlaka xo endla a ri exihundleni, loko a lava ku twakala ematlhelweni hinkwawo.”

Hambi leswi Yakobo, Simoni, Yosefa na Yudasi va nga pfumeriki leswaku makwavo lonkulu, Yesu, hakunene i Mesiya, va lava leswaku a kombisa matimba yakwe ya mahlori eka hinkwavo lava hlengeletaneke enkhubyeni. Hambi swi ri tano, Yesu wa ri vona khombo. “Misava yi nga ka yi nga mi vengi,” ku vula yena, “kambe mina ya ndzi venga, hikuva ndzi tiyisa vumbhoni bya leswaku mintirho ya yona yi bihile.” Kutani Yesu u byela vamakwavo a ku: “N’wina tlhandlukelani enkhubyeni, mina a ndzi yi enkhubyeni wolowo.”

Nkhuvo wa Mintsonga i nkhuvo wa masiku ya nkombo. Lowu hi siku ra vunhungu wu fikisiwaka emakumu hi mintirho leyi tiyeke. Nkhuvo wu fungha makumu ya lembe ra vurimi naswona i nkarhi lowukulu wa ku tsaka ni ku nkhensa. Masiku ma nga ri mangani endzhaku ka loko vamakwavo va Yesu va sukile ku ya va kona kun’we ni ntlawa lowukulu wa lava taka va famba, yena ni vadyondzisiwa vakwe va famba exihundleni, va nga vonaki emahlweni ka vanhu. Va teka ndlela leyi hundzaka hi le Samariya, ematshan’wini ya leyi vanhu vo tala va yi tekaka ekusuhi ni Nambu wa Yordani.

Tanihi leswi Yesu ni vanghana vakwe va nga ta lava byetlelo emutini wa Samariya, u rhumela tintsumi emahlweni ku ya endla malunghiselelo. Hambi swi ri tano, vanhu va ala ku pfuna Yesu endzhaku ko tiva leswaku u kongome eYerusalema. Hi ku hlundzuka, Yakobo na Yohane va vutisa va ku: “Hosi, xana wa swi lava leswaku hi vitana ndzilo wu xika hi le tilweni wu va hisa ke?” Yesu wa va tshinya hikwalaho ko ringanyeta nchumu wo tano, kutani va famba va ya emutini wun’wana.

Loko va ri karhi va famba endleleni, mutsari u ri eka Yesu: “Ndzi ta ku landza hinkwako lomu u yaka kona.”

Yesu wa hlamula a ku: “Vahlati va ni mincele, ni tinyenyana ti ni swisaka, kambe N’wana-wa-Munhu a nga na laha a nga seketelaka nhloko ya yena kona.” Yesu u hlamusela leswaku mutsari u ta tokota ku nonon’hwa loko a va mulandzeri Wakwe. Naswona vuyelo bya kona swi vonaka onge mutsari u tinyungubyisa ngopfu lerova a nga amukela muxaka lowu wa vutomi.

Eka wanuna un’wana, Yesu u ri: “Ndzi landze.”

“Wa nga ndzi pfumelela ndzi rhanga hi ku ya lahla tatana,” ku hlamula wanuna.

Yesu wa hlamula a ku: “Tshika vafi, va lahla vafi va vona; kambe wena, famba, u ya twarisa ta Mfumo wa Xikwembu.” Tata wa wanuna loyi entiyisweni a a nga si fa, hikuva loko a a file, a swi nga ta endleka leswaku jaha rakwe ri va laha ri yingisa Yesu. Entiyisweni jaha leri ri kombela nkarhi wo rindza ku fa ka tata wa rona. A nga tiyimiselanga ku rhangisa Mfumo wa Xikwembu evuton’wini byakwe.

Loko va ri karhi va ya emahlweni endleleni leyi kongomeke Yerusalema, wanuna un’wana u byela Yesu a ku: “Ndzi ta ku landza, Hosi kambe ndzi pfumelele ndzi rhanga ndzi ya lelana ni va le kaya.”

Loko a hlamula Yesu u ri: “Munhu loyi a vekaka voko ra yena exikon’wini, kutani a hundzuluka a languta ndzhaku, a nga lulameriwanga hi Mfumo wa Xikwembu.” Lava va nga ta va vadyondzisiwa va Yesu va fanele ku endla leswaku mahlo ya vona ya languta entirhweni wa Mfumo. Tanihi leswi foro yi nga ta va leyi gombonyokeke loko munhu la khomeke xikomu a nga languti emahlweni, kutani un’wana ni un’wana loyi a langutaka endzhaku emafambiselweni lawa ya khale ya swilo a nga ha khunguvanyeka hi ku olova endleleni leyi yaka evuton’wini lebyi nga heriki. Yohane 7:2-10; Luka 9:51-62; Matewu 8:19-22.

▪ Vamakwavo va Yesu i vamani, naswona va titwisa ku yini ha yena?

▪ Ha yini Vasamariya va ri na vukarhi, naswona Yakobo na Yohane va lava ku endla yini?

▪ Hi wahi mabulo manharhu lawa Yesu a nga na wona endleleni, naswona u kandziyisa xilaveko xa ntirho wo tinyiketa hi ndlela yihi?