A Dyondzisa A Ri Karhi A Ya Eyerusalema

Ku ringana nkarhi wo karhi, Yesu a a chumayela eGaleliya ntsena, laha vanhu va kona a va n’wi yingisela ku tlula eYudiya. Loko a ri karhi a horisa wanuna hi Savata eYerusalema, “Vayuda a va lava ku n’wi dlaya.”—Yohane 5:18; 7:1.

Sweswi i ximun’wana xa 32 C.E. naswona Nkhuvo wa Titabernakela (kumbe wa Mitsonga) wu tshinele. Nkhuvo lowu wu tlangeriwa masiku ya nkombo, ivi ku landzela nhlengeletano yo hlawuleka hi siku ra vunhungu. Nkhuvo lowu a wu kombisa ku hela ka nkarhi wa vurimi bya lembe naswona i nkarhi wa ku tsaka ni ku khensa.

Vamakwavo va Yesu ku nga Yakobo, Simoni, Yosefa na Yudasi va n’wi byela va ku: “Suka laha u ya eYudiya.” Yerusalema i ndhawu leyi ku gandzeriwaka eka yona etikweni. Hi nkarhi wa minkhuvo yinharhu ya lembe ni lembe, muti lowu wu va wu tele hi vanhu. Vamakwavo va Yesu va ri: “A ku na munhu loyi a endlaka nchumu wo karhi exihundleni loko a lava ku tiviwa. Leswi u swi endlaka, swi endle emahlweni ka vanhu hinkwavo.”—Yohane 7:3, 4.

Kahlekahle, vamakwavo lava va mune “a va nga ri na ripfumelo eka yena” tanihi Mesiya. Hambiswiritano, va lava leswaku vanhu lava nga hlengeletana enkhubyeni va n’wi vona loko a endla masingita. Leswi Yesu a kotaka ku vona khombo leri taka, u va byela a ku: “Misava a yi na xivangelo xa ku mi venga, kambe mina ya ndzi venga, hileswi ndzi vulaka leswaku mitirho ya vona yi hombolokile. Yanani enkhubyeni, mina a ndzi yi hikuva nkarhi wa mina a wu si fika.”—Yohane 7:5-8.

Endzhakunyana ka masiku loko vamakwavo va Yesu va fambile ni ntlawa lowu a wu tile, Yesu ni vadyondzisiwa vakwe va suke va famba va nga voniwi hi munhu. Va fambe hi ndlela leyi taka hi le Samariya, ematshan’weni yo tirhisa ndlela leyi tolovelekeke leyi a yi ta hi le kusuhi ni Nambu wa Yordani. Yesu ni vadyondzisiwa vakwe va ta lava ndhawu yo etlela eka yona eSamariya kutani u kombela varhumiwa vakwe leswaku va ya va lunghiselela yona. Vanhu va le ndhawini yin’wana va ale ku va amukela kumbe ku va kombisa malwandla hikuva Yesu o hundza hi kona a ya enkhubyeni wa Vayuda eYerusalema. Hikwalaho ko hlundzuka, Yakobo na Yohane va vutisa va ku: “Hosi, xana u lava hi vitana ndzilo wu huma hi le tilweni wu va herisa?” (Luka 9:54) Hiloko Yesu a va tshinya hikwalaho ka leswi va swi vuleke kutani va ya emahlweni ni riendzo.

Loko va ri endleleni, mutsari un’wana u byela Yesu a ku: “Mudyondzisi, ndzi ta ku landzela hinkwako laha u yaka kona.” Yesu a n’wi hlamula a ku: “Timhungubye ti ni micele ni swinyenyana swi ni swisaka, kambe N’wana wa munhu a nga na ndhawu yo veka nhloko yakwe.” (Matewu 8:19, 20) U kombisa leswaku loko mutsari loyi a hlawula ku va mulandzeri wa Yesu, u ta langutana ni mitlhontlho. Nakambe swi vonaka onge mutsari loyi, wa tikukumuxa lerova a nge swi koti ku hanya hi ndlela leyi. Un’wana ni un’wana wa hina a nga tivutisa a ku: ‘Ndzi tiyimisele ku fikela kwihi ku landzela Yesu?’

Yesu u byele wanuna un’wana a ku: “Vana mulandzeri wa mina.” Wanuna yoloye a hlamula a ku: “Hosi, ndzi pfumelele ndzi rhanga hi ku ya lahla tatana.” Leswi Yesu a tivaka xiyimo xa wanuna yoloye, u ri: “Tshika vafi va lahla vafi va vona, wena famba u ya chumayela hi Mfumo wa Xikwembu etindhawini hinkwato.” (Luka 9:59, 60) Swi le rivaleni leswaku tata wakwe a nga si fa. Loko a a file, a nga ta va kona laha leswaku a vulavula na Yesu. Wanuna loyi a nga tiyimiselanga ku rhangisa Mfumo wa Xikwembu evuton’wini bya yena.

Loko va ri karhi va famba va kongoma eYerusalema, wanuna un’wana u byela Yesu a ku: “Hosi, ndzi ta ku landzela kambe ndzi pfumelele ndzi rhanga hi ku ya lela vandyangu wa mina.” Yesu a n’wi hlamula a ku: “Loyi a rimaka kutani a khoma puluhu ivi a languta leswi nga endzhaku a nga faneriwi hi ku nghena eMfun’weni wa Xikwembu.”—Luka 9:61, 62.

Hinkwavo lava va lavaka ku va vadyondzisiwa va ntiyiso va Yesu va fanele va rhangisa ntirho wa Mfumo evuton’wini bya vona. Loko murimi a nga langutisi kahle laha a rimaka kona, hakanyingi foro yi ta gombonyoka. Loko o yima ku rima ivi a languta endzhaku, ntirho wakwe wo rima wu ta salela endzhaku. Hilaha ku fanaka, un’wana ni un’wana loyi a langutaka endzhaku emisaveni leyi ya khale, a nga ha lahlekeriwa hi ndlela leyi yisaka evuton’wini lebyi nga heriki.