Ndzima 66

Enkhubyeni Wa Le Mitsongeni

YESU u ve la dumeke hi nkarhi wa kwalomu ka malembe manharhu ku sukela a khuvuriwa. Magidi yo tala ma ya vonile mahlori yakwe naswona swiviko mayelana ni mintirho ya yena swi hangalake ni tiko hinkwaro. Sweswi, loko vanhu va ri karhi va hlengeletanela Nkhuvo wa le Mitsongeni eYerusalema, va n’wi lava kwalaho. “Ú kwihi munhu wa kona xana?” va lava ku tiva.

Yesu a va kanetana ha yena. “I munhu lonene,” ku vula van’wana. “E-e, ú lahlekisa vanhu,” ku vula van’wana. Ku na marito yo tala yo hlevetela ya muxaka lowu hi masiku yo sungula ya nkhuvo. Hambi swi ri tano a ku ri hava na un’we loyi a a ri na xivindzi xo vulavula hi Yesu erivaleni. Leswi swi hikwalaho ka leswi vanhu a va chava ku rihisiwa hi varhangeri va Vayuda.

Loko nkhuvo wu ri exikarhi, Yesu wa fika. U tlhandlukela etempeleni, laha vanhu va hlamarisiwaka hi vuswikoti byakwe lebyi hlamarisaka bya ku dyondzisa. Tanihi leswi Yesu a nga nghenangiki swikolo swa vurabi, Vayuda va hlamala va ku: “Xana munhu loyi ú byi kuma kwihi vutivi, kasi a nga dyondzanga?”

“Dyondzo leyi ndzi yi dyondzisaka a hi ya mina,” Yesu wa hlamusela, “kambe i ya Loyi a ndzi rhumeke. Loko munhu a navela ku endla ku rhandza ka Xikwembu ú ta tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena.” Dyondzo ya Yesu yi namarhela swinene nawu wa Xikwembu. Xisweswo, swi fanele swi ri erivaleni leswaku u lava ku dzunisiwa hi Xikwembu, hayi yena. “Xana Muxe a nga mi nyikanga Nawu xana?” ku vutisa Yesu. Hi ndlela yo tshinya, u ri: “Ku hava na un’we wa n’wina la hlayisaka Nawu.”

“Hikokwalaho ka yini mi lava ku ndzi dlaya ke?” Yesu wa vutisa.

Vanhu lava nga exikarhi ka ntshungu, swi nga ha endleka ku ri vaendzi lava teke enkhubyeni, a va ma tivi matshalatshala yo tano. Va swi vona swi nga khorwisi leswaku u kona la nga lavaka ku dlaya mudyondzisi wo tano la hlamarisaka. Kutani va vona onge ku na swin’wana leswi hoxeke ha Yesu ku ehleketa leswi. “U ni demona wena,” Ku vula vona. “Xana i mani la lavaka ku ku dlaya xana?”

Varhangeri va Vayuda va lava leswaku Yesu a dlayiwa, hambi loko ntshungu wu nga swi xiyi. Loko Yesu a hanyise munhu hi Savata lembe na hafu emahlweni, varhangeri va ringete ku n’wi dlaya. Kutani Yesu u boxa vuphukuphuku bya vona hi ku va vutisa a ku: “Leswi mi yimbisaka munhu hi siku ra Savata ku endlela ku hlayisa Nawu wa Muxe, xana mi ndzi karihela hi mhaka ya leswi mina ndzi nga hanyisa munhu emirini wa yena hinkwawo hi siku ra Savata xana? Mi nga yi hi nghohe loko mi avanyisa, kambe avanyisani hi ku lulama.”

Vaaki va Yerusalema, lava vonaka xiyimo lexi, sweswi va ri: “Xana a hi yena loyi va n’wi lavaka leswaku va ta n’wi dlaya ke? Vonani! Ú vulavula erivaleni, kambe a va n’wi kongomi; xana tihosi ti nga va ti swi kumile hakunene leswaku loyi hi yena Mesiya xana?” Vaaki lava va Yerusalema va hlamusela leswaku ha yini va nga tshembi leswaku Yesu i Kriste: “Kasi loyi, ha n’wi tiva lomu a humaka kona, kambe loko a ri Mesiya, siku a humelelaka, ku hava munhu na un’we la nga ta tiva lomu a humaka kona.”

Yesu wa hlamula: “Ma ndzi tiva, mi tiva ni lomu ndzi humaka kona; a ndzi tanga hi ku tisungulela, kambe Loyi a ndzi rhumeke, yena i ntiyiso hi xiviri xa wona, kutani a mi n’wi tivi. Mina ndza n’wi tiva, hikuva ndzi huma eka yena, na swona hi yena la ndzi rhumeke.” Kutani va ringeta ku n’wi khoma, kumbexana ku n’wi nghenisa ekhotsweni kumbe ku n’wi dlaya. Kambe a va humeleli hikuva a wu si fika nkarhi wa leswaku Yesu a fa.

Hambi swi ri tano, vo tala va pfumela eka Yesu, tanihi leswi a va fanerile hakunene. Hikuva, u fambe ehenhla ka mati, a miyeta swidzedze, a miyeta malwandle lama kariheke, hi singita u phamele magidi hi swinkwa ni tinhlampfi ti nga ri tingani, u hanyise vavabyi, u endle lavo khwita leswaku va famba, u pfule mahlo ya mabofu, u hanyise lava nhlokonho ni ku pfuxa vafi. Kutani va vutisa va ku: “Loko Mesiya a ta, xana ú ta endla mahlori lama tlulaka lawa ya endliweke hi munhu loyi xana?”

Loko Vafarisi va twa ntshungu wu hlevetela swilo leswi, vona ni vaprista lavakulu va rhuma malandza ku ya khoma Yesu. Yohane 7:11-32.

▪ Yesu u fika rini enkhubyeni, naswona vanhu va vulavula yini hi yena?

▪ Swi tisa ku yini leswaku van’wana va vula leswaku Yesu u na demona ke?

▪ Hi rihi langutelo leri vaaki va Yerusalema va nga na rona eka Yesu?

▪ Ha yini vo tala va pfumela eka Yesu?