A Ri Eyerusalema Enkhubyeni Wa Titabernakela

Yesu u sungule ku tiveka ngopfu ndzhaku ka loko se a khuvuriwile. Magidi ya Vayuda ma n’wi vonile a endla masingita naswona swiviko swa mitirho yakwe swi hangalake etikweni hinkwaro. Kambe sweswi eNkhubyeni Wa Titabernakela (kumbe Mitsonga) eYerusalema, vanhu vo tala va n’wi lava.

Vanhu va ni mavonelo yo hambanahambana hi Yesu. Van’wana va ri: “I munhu lonene.” Kasi van’wana va ri: “A hi munhu lonene. U hambukisa ntshungu.” (Yohane 7:12) Va sungula ku hleva hi ndlela yo tano eka masiku yo sungula ya nkhuvo. Kambe a nga kona la nga ni xivindzi xo vulavula hi Yesu a twiwa hi vanhu hinkwavo hikuva va chava ku hlundzukisa varhangeri va Vayuda.

Loko nkhuvo wu ri exikarhi, Yesu wa fika etempeleni. Vanhu vo tala va hlamarisiwa hi vuswikoti byakwe byo dyondzisa. Vayuda va hlamala hikuva Yesu a nga yanga eswikolweni swa varhabi, kutani va tivutisa va ku: “Munhu loyi u ma tivela kwihi Matsalwa hikuva a nga dyondzanga eswikolweni?”—Yohane 7:15.

Yesu u hlamusela a ku: “Leswi ndzi swi dyondzisaka a swi humi eka mina, kambe swi huma eka loyi a ndzi rhumeke. Loko munhu a lava ku endla ku rhandza ka Xikwembu, u ta swi tiva loko leswi ndzi swi dyondzisaka swi huma eka xona kumbe ndzi tisungulela swona.” (Yohane 7:16, 17) Leswi Yesu a swi dyondzisaka swi fambisana ni Nawu wa Xikwembu kutani swi le rivaleni leswaku u lava leswaku ku dzunisiwa Xikwembu, ku nga ri yena.

Kutani Yesu a ku: “Muxe u mi nyike Nawu. Kambe a nga kona ni un’we eka n’wina loyi a wu yingisaka. Hikwalaho ka yini mi lava ku ndzi dlaya?” Van’wana exikarhi ka ntshungu, kumbexana lava va nga vaendzi a va ma tivi makungu wolawo. Swi vonaka swi nga twisiseki ku va munhu a lava ku dlaya mudyondzisi wo fana na yena. Hikwalaho, va gimeta hileswaku ku ni leswi nga fambiki kahle hi Yesu hileswi a vuleke mhaka yoleyo. Hiloko va ku: “U ni dimona. I mani loyi a lavaka ku ku dlaya?”—Yohane 7:19, 20.

Kahlekahle, eka malembe mambirhi lama hundzeke, varhangeri va Vayuda a va lava ku dlaya Yesu endzhaku ka loko a horise wanuna hi Savata. Sweswi Yesu u va tlhontlha mianakanyo leswaku a paluxa ku pfumala ka vona ku anakanya. U vulavula hi mhaka ya leswaku hi ku ya hi Nawu, n’wana wa mufana u fanele a yimbisiwa hi siku ra vunhungu, hambiloko ku ri hi Savata. U va vutisa a ku: “Loko swi koteka leswaku munhu a yimbisiwa hi savata leswaku ku nga tluriwi Nawu wa Muxe, hikwalaho ka yini mi ndzi hlundzukela hi leswi ndzi hanyiseke munhu hi savata? Mi nga vi ni xihlawuhlawu loko mi avanyisa, kambe avanyisani hi ndlela yo lulama.”—Yohane 7:23, 24.

Hiloko vaaki van’wana va le Yerusalema lava a va tiva mhaka leyi va ku: “Xana munhu loyi a hi yena loyi [varhangeri] va lavaka ku n’wi dlaya? Vonani, u vulavula emahlweni ka vanhu, kambe a va vuli nchumu eka yena. Xana varhangeri va hina se va tshemba leswaku loyi i Kreste?” Hikwalahokayini vanhu va nga tshembi leswaku Yesu i Kreste? Va ri: “Hina ha ku tiva laha munhu loyi a humaka kona; kambe loko Kreste a ta, a nga kona loyi a nga tiva laha a humaka kona.”—Yohane 7:25-27.

Loko a ri etempeleni, Yesu u hlamula a ku: “Ma ndzi tiva mi tlhela mi tiva laha ndzi humaka kona. Ndzi lo rhumiwa naswona Loyi a ndzi rhumeke wa hanya, kambe a mi n’wi tivi. Mina ndza n’wi tiva, hikuva ndzi muyimeri wakwe naswona ndzi rhumiwe hi Yena.” (Yohane 7:28, 29) Loko va twa sweswo va ringeta ku khoma Yesu leswaku va ta n’wi hoxa ekhotsweni kumbe ku n’wi dlaya. Hambiswiritano, va tsandzekile hikuva a wu nga si fika nkarhi wa leswaku Yesu a fa.

Hambiswiritano, vo tala va pfumerile eka Yesu, hilaha a va fanele va endla hakona. U fambe ehenhla ka mati, a miyeta swidzedze, a phamela magidi ya vanhu swinkwa ni tihlampfi hi singita, a horisa lava vabyaka, a endla leswaku lava lamaleke va famba, a pfula matihlo ya lava nga voniki, a hanyisa vanhu va nhlokonho, a tlhela a pfuxa vanhu lava feke. Hakunene a va ri ni xivangelo lexi twalaka xo vutisa va ku: “Xana loko Kreste a fika u ta endla masingita yo tala ku tlula lama endliweke hi munhu loyi?”—Yohane 7:31.

Loko Vafarisi va twa ntshungu wu vula swilo leswi, vona ni vaprista lavakulu va rhuma tindhuna ta masocha leswaku ti ya khoma Yesu.