Ndzima 95

Tidyondzo eHenhleni Ka Ku Dlaya Vukati Ni Ku Rhandza Vana

YESU ni vadyondzisiwa va yena va le ndleleni ya vona yo ya eYerusalema ku ya va kona ePasekeni ya 33 C.E. Va pela Nambu wa Yordani ivi va teka ndlela ya le xifundzeni xa Periya. Yesu a a ri ePeriya mavhiki ma nga ri mangani lama hundzeke, kambe a a vitaniwe eYudiya hikuva munghana wa yena Lazaro a a vabya. Kutani loko a ha ri ePeriya, Yesu u vulavule ni Vafarisi ehenhleni ka ku dlaya vukati, kutani sweswi va pfuxa mhaka nakambe.

Exikarhi ka Vafarisi ku na mianakanyo yo hambana ehenhleni ka ku dlaya vukati. Muxe u vule leswaku wansati a nga tshikiwa hikwalaho ka loko “u kumile ka yena swilo leswi sandzekaka.” Van’wana va tshemba leswaku leswi swi vula ku pfumala ku tenga. Kambe van’wana va xiya “swilo leswi sandzekaka” swi katsa milandzu leyintsongo swinene. Kutani, ku ringa Yesu, Vafarisi va vutisa va ku: “Xana munhu wa pfumeleriwa ku tshika nsati wa yena hi mhaka yin’wana ni yin’wana ke?” Va tshemba leswaku xin’wana ni xin’wana lexi Yesu a xi vulaka xi ta n’wi nghenisa eku karhatekeni ni Vafarisi lava va nga na langutelo leri hambaneke.

Yesu u hlamula xivutiso hi vutlhari, a nga tirhisi langutelo rihi na rihi ra munhu, kambe u kombetela le ndzhaku eka xivumbeko xo sungula xa vukati. Wa vutisa a ku: “A mi hlayanga xana marito lama nge: ‘Eku sunguleni Mutumbuluxi ú endlile munhu wa xinuna ni wa xisati’ xana? Na swona Mutumbuluxi ú te: ‘Hikwalaho ka swona wanuna ú ta sukela tata wa yena ni mana wa yena, a namarhela nsati wa yena; kutani lavambirhi va ta va nyama yin’we ntsena’. Swi vula leswaku a va ha ri vambirhi, kambe lavambirhi va ta va nyama yin’we ntsena. Hikwalaho ke leswi Xikwembu xi swi hlanganiseke, swi nga tshuki swi hambanisiwa hi munhu.”

Yesu u komba leswaku xikongomelo xo sungula xa Xikwembu hi leswaku vanghana va vukati va namarhelana, leswaku va nga dlayi vukati. Loko sweswo swi ri tano, Vafarisi va ri, “hikwalaho ka yini Muxe a lerisile vanhu leswaku wansati a nyikiwa papila leri n’wi ntshunxaka, kutani a tshikiwa ke?”

Yesu u hlamula a ku: “Muxe, ú mi pfumelerile ku tshika vasati va n’wina hikwalaho ka ku nonon’hwa ka timbilu ta n’wina; kambe eku sunguleni a swi nga ri tano.” Ina, loko Xikwembu xi simeke mpimanyeto wa ntiyiso wa vukati entangeni wa Edeni, a xi ri endlanga lunghiselelo ro dlaya vukati.

Yesu u hambeta a byela Vafarisi a ku: “Un’wana ni un’wana la tshikaka nsati wa yena, loko ku nga ri hi mhaka ya vunghwavava [leri humaka eka Xigriki, por·neiʹa], kutani a teka un’wana, wa oswa.” Kwalaho u kombisa leswaku por·neiʹa, ku nga rigangugangu lerikulu, hi yona mhaka yi ri yoxe leyi amukeriwaka hi Xikwembu ya ku dlaya vukati.

Loko va vona leswaku vukati byi fanele byi va xiboho lexi nga heriki naswona byi na xisekelo lexi xi ri xoxe xo dlaya vukati, vadyondzisiwa va susumeteriwa ku vula va ku: “Loko timhaka ta wanuna ni nsati wa yena ti fambisa leswi, swa antswa ku tshama ntsena munhu a nga teki.” A ku na ku kanakana leswaku munhu la anakanyaka hi vukati u fanele ku xiyisisa ku khomelela ka xiboho xa vukati hi vukheta!

Yesu u ya emahlweni a vulavula hi ku titshamela wexe. U hlamusela leswaku vafana van’wana va tswariwa va ri vatsheniwa, va nga faneleki evukatini hikwalaho ka ku nga kuli hi tlhelo ra rimbewu. Van’wana va endliwe vatsheniwa hi vanhu, va pfumala nyanyuko wa rimbewu hi laha ku vavisaka. Xo hetelela, van’wana va alela ku navela ka ku teka ni ku tiphina hi vuxaka bya rimbewu leswaku va tinyikela hi laha ku taleke etimhakeni leti yelanaka ni Mfumo wa matilo. Yesu u hetelela hi ku, “Loyi a kotaka ku amukela mhaka leyi [ku titshamela wexe], a a yi amukele!”

Sweswi vanhu va sungula ku tisa vana va vona lavantsongo eka Yesu. Hambi swi ri tano, vadyondzisiwa va sola vana naswona va ringeta ku va hlongola, a swi kanakanisi leswaku va lava ku sirhelela Yesu eka ntshikilelo lowu nga fanelangiki. Kambe Yesu u ri: “Tshikani vana va ta eka mina, mi nga tshuki mi va sivela, hikuva Mfumo wa Xikwembu i wa lava fanaka na vona. Ndzi tiyisile ndzi ri ka n’wina: La nga amukeriki Mfumo wa Xikwembu tanihi n’wana, a nga ka a nga ngheni ka wona.”

Mawaku tidyondzo letinene swonghasi leti Yesu a ti nyikaka laha! Ku kuma Mfumo wa Xikwembu, hi fanele ku tekelela ku titsongahata ni ku dyondziseka ka vana lavantsongo. Kambe xikombiso xa Yesu nakambe xi kombisa ndlela leyi swi nga swa nkoka ha yona, ngopfu-ngopfu eka vatswari, ku heta nkarhi ni vana va vona. Kutani Yesu u kombisa rirhandzu ra yena eka vana hi ku va vukarha kutani a va katekisa. Matewu 19:1-15; Deuteronoma 24:1; Luka 16:18; Marka 10:1-16; Luka 18:15-17.

▪ Xana hi wahi malangutelo yo hambana lama Vafarisi va nga na wona ehenhleni ka ku dlaya vukati, naswona va ringeta ku ringa Yesu hi ndlela yihi?

▪ Xana Yesu u langutanisa ku yini ni matshalatshala ya Vafarisi yo n’wi ringa, naswona u nyika yini tanihi xisekelo xi ri xoxe xo dlaya vukati?

▪ Ha yini vadyondzisiwa va Yesu va vula leswaku swa antswa ku tshama ntsena munhu a nga teki, naswona i ku bumabumela kwihi loku Yesu a ku nyikaka?

▪ Xana i yini lexi Yesu a hi dyondzisaka xona mayelana ni ku hanyisana ka yena ni vana lavantsongo?