A Dyondzisa Hi Ku Dlaya Vukati Ni Ku Rhandza Vana

Yesu ni vadyondzisiwa vakwe va tlula nambu wa Yordani va suka eGaleliya ivi va famba hi ndlela ya le dzongeni leyi yaka ePeriya. Loko Yesu a ri ePeriya enkarhini lowu hundzeke, u vulavule ni Vafarisi hi nawu wa ku dlaya vukati. (Luka 16:18) Hikwalaho, sweswi va tlhela va pfuxa mhaka yoleyo hi xikongomelo xo n’wi ringa.

Muxe u tsale leswaku wansati a nga tshikiwa ntsena loko ku kumeka “nchumu lowu nga tsakisiki” eka yena. (Deteronoma 24:1) Ku ni mavonelo yo hambanahambana ya leswi swi nga endlaka munhu a dlaya vukati. Van’wana va tshemba leswaku hambi ku ri swilo switsongo swa katseka. Hikwalaho, Vafarisi va vutisa va ku: “Xana swa pfumeleriwa leswaku wanuna a tshika nsati wakwe hi xivangelo xin’wana ni xin’wana?”—Matewu 19:3.

Ematshan’weni yo teka mavonelo ya vanhu, hi vutlhari Yesu u va hlamusela lunghiselelo ra Xikwembu hi vukati. U ri: “Xana a mi hlayanga leswaku loyi a va vumbeke eku sunguleni u endle wanuna ni wansati kutani a ku: ‘Hikwalaho ka sweswo, wanuna u ta siya tata wakwe ni mana wakwe kutani a namarhela nsati wakwe naswona lavambirhi va ta va nyama yin’we?’ A va ha ri vambirhi, kambe i nyama yin’we. Hikwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.” (Matewu 19:4-6) Loko Xikwembu xi sungula vukati exikarhi ka Adamu na Evha, a xi va nyikanga lunghiselelo ro dlaya vukati bya vona.

Vafarisi va sungula ku phikizana na Yesu hi ku vula va ku: “Hikwalaho ka yini Muxe a lerise leswaku wansati a nyikiwa papila ra ku n’wi hlongola ni ku n’wi tshika?” (Matewu 19:7) Yesu u va hlamula a ku: “Muxe u mi pfumelele ku tshika vasati va n’wina hikwalaho ka ku nonon’hwa ka timbilu ta n’wina, kambe a swi nga ri tano ku sukela eku sunguleni.” (Matewu 19:8) Ku ‘sungula koloko’ a ku nga ri hi nkarhi wa Muxe kambe a ku ri hi nkarhi lowu Xikwembu xi sunguleke vukati ha wona le Edeni.

Kutani Yesu u va byela ntiyiso wa nkoka a ku: “Ndza mi byela leswaku loyi a tshikaka nsati wakwe a teka un’wana, handle ka loko a tikhome ku biha hi swa masangu [hi Xigriki por·neiʹa] u endla vuoswi.” (Matewu 19:9) Ku tikhoma ko biha hi swa masangu hi xona xivangelo xi ri xoxe xa le Matsalweni xo dlaya vukati.

Sweswo swi endle vadyondzisiwa va vula va ku: “Loko vukati byi ri tano, a hi vutlhari ku teka.” (Matewu 19:10) Swi le rivaleni leswaku loyi a hlawulaka ku nghenela vukati u fanele a tiyiseka leswaku i bya hilaha ku nga heriki!

Emhakeni ya ku nga ngheneli vukati, Yesu u hlamusela leswaku van’wana va tswariwa va ri va tsheniwa, leswi vulaka leswaku a va swi tsakeli ku endla timhaka ta masangu. Van’wana va endliwe vatsheniwa, leswi endlaka va nga vi na ku navela ka timhaka ta masangu. Hambiswiritano, van’wana va hlawula ku titsona ku enerisa ku navela ka vona ka timhaka ta masangu. Va endla tano hi leswi va lavaka ku katseka hi xitalo eka ntirho wa Mfumo. Yesu u khutaza vayingiseri vakwe a ku: “Loyi a nga swi kotaka [ku nga ngheneli vukati] a endle tano.”—Matewu 19:12.

Hiloko vanhu va sungula ku tisa vana va vona lavatsongo eka Yesu. Hambiswiritano, vadyondzisiwa va tshinya vanhu hileswi va nga laviki leswaku Yesu a karhatiwa. Loko Yesu a vona sweswo, a hlundzuka ivi a ku eka vona: “Tshikani vana va ta eka mina; mi nga va siveli, hikuva Mfumo wa Xikwembu i wa lava fanaka na vona. Ndzi tiyisile ndzi ri eka n’wina, loyi a nga wu amukeliki Mfumo wa Xikwembu ku fana ni n’wana a nge ngheni eka wona.”—Marka 10:14, 15; Luka 18:15.

Mayana dyondzo ya nkoka swonghasi! Hi fanele hi titsongahata hi tlhela hi dyondziseka ku fana ni vana lavatsongo leswaku hi ta kota ku kuma Mfumo wa Xikwembu. Yesu u kombisa vana rirhandzu hi ku va tlakula ni ku va katekisa. Nakambe u va rhandza swinene hinkwavo lava ‘amukelaka Mfumo wa Xikwembu ku fana ni n’wana.’—Luka 18:17.