Ndzima 98

Vadyondzisiwa Va Phikisana Loko Rifu Ra Yesu Ri Tshinela

YESU ni vadyondzisiwa va yena va le kusuhi na Nambu wa Yordani, laha va tsemakanyaka tiko ra Periya va ya eYudiya. Van’wana vo tala va famba na vona ePasekeni ya 33 C.E., leyi ya ha saleriweke hi nkarhi lowu lavaka ku va vhiki.

Yesu u rhange emahlweni ka vadyondzisiwa, naswona va hlamala ku tiyimisela ka yena ka xivindzi. Tsundzuka leswaku mavhiki ma nga ri mangani emahlweni loko Lazaro a fa ni loko Yesu a ri kusuhi ni ku ya eYudiya a suka ePeriya, Tomasi u khutaze lavan’wana a ku: “A hi yeni na hina, leswaku hi ya fa na yena.” Nakambe tsundzuka leswaku endzhaku ka loko Yesu a pfuxe Lazaro, Sanedri yi bohe makungu yo dlaya Yesu. A swi hlamarisi leswi ku chava ku khomaka vadyondzisiwa tanihi leswi sweswi va nghenaka eYudiya nakambe.

Ku va lunghiselela leswi swi nga emahlweni, Yesu u tekela lava 12 etlhelo a va yisa exihundleni ivi a va byela a ku: “Langutani, hi tlhandlukela eYerusalema, kutani N’wana-wa-Munhu ú ta nyiketiwa eka vaprista lavakulu ni ka vatsari; va ta n’wi avanyisela rifu; va ta n’wi nyiketa eka vamatiko leswaku vona va tlanga hi yena; va n’wi ba hi minkhavi ni ku n’wi [belela emhandzini]; kutani, hi siku ra vunharhu, ú ta pfuka eku feni.”

Lowu i nkarhi wa vunharhu etin’hwetini ta sweswinyana laha Yesu a byeleke vadyondzisiwa va yena ehenhleni ka rifu ni ku pfuxiwa ka yena. Naswona hambi loko va n’wi yingisa, va tsandzeka ku twisisa. Kumbexana hi mhaka ya leswi va pfumelaka eku pfuxetiweni ka mfumo wa Israyele emisaveni, kutani va langutele ku tiphina hi ku kwetsima ni xichavo emfun’weni wa laha misaveni na Kriste.

Exikarhi ka vapfhumba lava bohiwaka hi Paseka ku na Salome, mana wa muapostola Yakobo na Yohane. Yesu u vule vavanuna lava “vana va ku dzindza ka tilo,” handle ko kanakana hikwalaho ka mimfungho ya vona ya ndzilo. Nkarhi wun’wana lava vambirhi va hlayise ku navela ku va lava tlakukeke eMfun’weni wa Kriste emiehleketweni, naswona va tivise ku navela ka vona eka mana wa vona. Kutani u tshinelela Yesu hikwalaho ka vona, a khinsama emahlweni ka yena, ivi a kombela musa.

“U lava yini xana?” Yesu wa vutisa.

Wa hlamula: “Tshembisa leswaku vana lavambirhi va mina lava va ta tshama eMfun’weni wa wena, un’wana evokweni ra wena ra xinene, un’wana eka lera ximatsi.”

Hi ku xiya xivangelo xa xikombelo, Yesu u ri eka Yakobo na Yohane: “A mi tivi lexi mi xi kombelaka. Xana mi nga kota ku nwa xinwelo lexi ndzi nga ta nwa xona ke?”

“Hi nga swi kota,” va hlamula. Hambi leswi Yesu a ha ku va byelaka leswaku u langutane ni ku xanisiwa loku chavisaka ivi eku heteleleni a dlayiwa, entiyisweni a va swi twisisi leswaku leswi hi leswi a swi vulaka hi “xinwelo” lexi a nga kusuhi ni ku xi nwa.

Hambi swi ri tano, Yesu wa va byela a ku: “Kunene mi ta nwa xinwelo xa mina, kambe loko ku ri ku tshama evokweni ra mina ra xinene hambi ka lera ximatsi, a hi mina ndzi nga mi nyikaka swona, kambe swi ta va swa lava swi nga lunghiseriwa vona hi Tata wa mina.”

Hi ku famba ka nkarhi vadyondzisiwa lavan’wana va khume va tiva leswi Yakobo na Yohane va swi kombeleke, kutani va hlundzukile. Kumbexana Yakobo na Yohane a va ri va le mahlweni eka ku phikisana ko sungula exikarhi ka vaapostola ehenhleni ka loyi a nga lonkulu. Xikombelo xa vona xa sweswi xi paluxa leswaku a va yi tirhisanga ndzayo leyi Yesu a yi nyikeke ehenhleni ka mhaka leyi. Lexi vavisaka, ku navela ka vona ka vukulukumba ka ha tiyile.

Kutani ku hlangavetana ni ku kanetana loku ko hetelela ni ku navela loku hombolokeke loku ku ku vumbeke, Yesu u vitana lava 12 hinkwavo. Loko a va nyika ndzayo hi rirhandzu, u ri: “Ma swi tiva leswaku tihosi ta matiko ti ma fuma hi ntamu, na vona vakulukumba va ma fuma hi matimba; swi nga tshuki swi va tano exikarhi ka n’wina, kambe un’wana ni un’wana la navelaka ku va lonkulu exikarhi ka n’wina, a a ve tani hi mutirheli wa n’wina; na swona un’wana ni un’wana la navelaka ku va wa le mahlweni exikarhi ka n’wina, a a ve nandza wa n’wina.”

Yesu u veke xikombiso lexi va faneleke ku xi tekelela, hi laha a hlamuselaka ha kona a ku: “Hi mukhuva lowu, N’wana-wa-Munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.” Yesu a nga tirhelanga van’wana ntsena, kambe u ta endla tano ku fika eku feleni ka vanhu! Vadyondzisiwa va lava langutelo rolero leri fanaka ni ra Kriste ro lava ku tirhela ematshan’wini yo tirheriwa ni ku va lontsongo ematshan’wini yo va exiyin’weni lexi tlakukeke. Matewu 20:17-28; Marka 3:17; 9:33-37; 10:32-45; Luka 18:31-34; Yohane 11:16.

▪ Ha yini ku chava sweswi ku khoma vadyondzisiwa?

▪ Yesu u lunghiselela vadyondzisiwa va yena leswi swi nga emahlweni hi ndlela yihi?

▪ I xikombelo xihi xi endliwaka eka Yesu, naswona vaapostola lavan’wana va khumbeka njhani?

▪ Yesu u hlangavetana njhani na xiphiqo lexi nga exikarhi ka vaapostola vakwe?