Vaapostola Va Tlhela Va Lava Ku Va Ni Ndhuma

Loko Yesu ni vadyondzisiwa vakwe va hete riendzo ra vona edzongeni wa Periya, va tlula nambu wa Yordani lowu nga ekusuhi na Yeriko kutani va kongoma eYerusalema. Vanhu van’wana va famba na vona ku ya tlangela Paseka ya 33 C.E.

Yesu u rhange emahlweni ka vadyondzisiwa vakwe naswona u tiyimisele ku hatla a fika emutini leswaku a ya tlangela Paseka. Kambe vadyondzisiwa va chava. Eku sunguleni loko Yesu a lava ku suka ePeriya a ya eYudiya hi nkarhi wa ku fa ka Lazaro, Tomasi u byele lavan’wana a ku: “Na hina a hi fambeni, leswaku hi ta fa na yena.” (Yohane 11:16, 47-53) Hikwalaho ka sweswo, swa twisiseka ku va vadyondzisiwa va chuhile hikuva swi ni khombo ku ya eYerusalema.

Yesu u kokela vaapostola etlhelo leswaku a ta va byela leswi a swi ta humelela, u ri: “Hi ya eYerusalema naswona N’wana wa munhu u ta nyiketiwa eka vaprista lavakulu ni vatsari. Va ta n’wi gweva rifu, va n’wi nyiketa eka vamatiko leswaku va tlanga hi yena ni ku n’wi ba va tlhela va n’wi dlaya hi ku n’wi belela emhandzini; naswona u ta pfuxiwa hi siku ra vunharhu.”—Matewu 20:18, 19.

Se i ra vunharhu Yesu a byela vadyondzisiwa vakwe hi rifu rakwe ni ku pfuxiwa ka yena. (Matewu 16:21; 17:22, 23) Nilokoswiritano, sweswi u va byela leswaku u ta dlayiwa hi ku hayekiwa emhandzini. Va n’wi yingisela kambe a va swi twisisi leswi a swi vulaka. Kumbexana a va langutele leswaku mfumo wa Israyele wu ta vuyeteriwa emisaveni hileswi a va lava ku tiphina hi ku vangama ni ku xiximiwa emfun’weni wa Kreste laha misaveni.

Salome mana wa muapostola Yakobo na Yohane, u le xikarhi ka lava va nga eriendzweni. Yesu u nyike vaapostola lavambirhi vito leri vulaka “Vana Lava Fanaka Ni Ku Dzindza Ka Tilo,” hileswi va hisekaka. (Marka 3:17; Luka 9:54) Se a ku ri nkarhinyana vaapostola lavambirhi va ri ni ku navela ko va ni swikhundlha eMfun’weni wa Kreste. Mana wa vona wa swi tiva sweswo. Kutani u ya eka Yesu leswaku a ya vulavulela vana va yena naswona ufika a khinsama ivi a n’wi kombela. Yesu a n’wi vutisa a ku: “U lava yini?” A n’wi hlamula a ku: “Ndzi kombela leswaku eMfun’weni wa wena vana lava vambirhi va mina, un’we a tshama evokweni ra wena ra xinene kasi lowun’wana eka lera ximatsi.”—Matewu 20:20, 21.

Entiyisweni xikombelo lexi xi huma eka Yakobo na Yohane. Leswi a ha ku vulavula hi leswaku u ta khomisiwa tingana ku nga ri khale, Yesu u ri eka vona: “A mi swi tivi leswi mi swi kombelaka. Xana mi nga swi kota ku nwa eka xinwelo lexi ndzi nga ta nwa eka xona ku nga ri khale?” Va n’wi hlamula va ku: “Hi nga swi kota.” (Matewu 20:22) Swi tikomba na sweswi va nga swi twisisi leswi a vulaka swona.

Hambiswiritano, Yesu u va byela a ku: “Kunene mi ta swi kota ku nwa xinwelo xa mina, kambe loko ku ri mhaka ya ku tshama evokweni ra mina ra xinene ni ra ximatsi a hi mina ndzi nga mi nyikaka swona, kambe i swa lava lunghiseriweke swona hi Tata wa mina.”—Matewu 20:23.

Loko vaapostola lavan’wana va khume va twa leswi Yakobo na Yohane va swi kombeleke, va hlundzukile. Xana Yakobo na Yohane va nga va va yi boxile mhaka leyi loko va ri karhi va phikizana ni vaapostola lavan’wana hi leswaku i mani lonkulu exikarhi ka vona? (Luka 9:46-48) Swi nga ri na mhaka leswaku va swi vurile kumbe a va swi vulanga, xikombelo lexi a xi swi kombisa kahle leswaku vaapostola lava va 12 a va yi tirhisanga ndzayo ya Yesu ya leswaku va fanele va tikhoma tanihi lontsongo. Va ha navela ku va ni swikhundlha.

Yesu u teka goza ro va pfuna hileswi ku phikizana ka vona a ku endla leswaku ku nga vi na vun’we. U vitana lava 12 kutani a va nyika ndzayo hi ndlela ya rirhandzu, hi ku vula a ku: “Ma swi tiva leswaku tihosi ta matiko ta ma tikisela naswona vafumi va wona va fuma hi voko ra nsimbhi. A swi fanelanga swi va tano exikarhi ka n’wina; kambe loyi a lavaka ku va lonkulu eka n’wina u fanele a mi tirhela naswona loyi a lavaka ku va wo sungula exikarhi ka n’wina u fanele a va nandza wa n’wina hinkwenu.”—Marka 10:42-44.

Yesu u vulavula hi xikombiso lexi va faneleke va xi tekelela, ku nga xikombiso xakwe. U va byela a ku: ‘N’wana wa munhu a nga telanga ku tirheriwa, kambe u tele ku tirhela van’wana ni ku nyikela vutomi byakwe leswaku byi va nkutsulo wa lavo tala.’ (Matewu 20:28) Se ku hele malembe manharhu Yesu a ri karhi a tirhela van’wana. Nakambe, u tiyimisele ku endla tano ku kondza a fela ni vanhu. Vadyondzisiwa va fanele va tekelela Kreste hi ku va va tiyimisela ku tirhela van’wana ku ri ni ku va va tirheriwa, va tikhoma tanihi lavatsongo ku ri ni ku lava swikhundlha.