Kingdom News No. 34

Ha Yini Ku Ri Ni Swiphiqo Swo Tala Swonghasi Evuton’wini?

Xana paradeyisi leyi nga riki na swiphiqo yi nga va kona?

SWIPHIQO LESWIKULU SWI YA SWI ANDZA—HA YINI?

Vanhu a va ri ni swiphiqo ku sukela ni khale. Hambi leswi vo tala a va anakanya leswaku vutshila bya manguva lawa byi nga swi tlhantlha, swiphiqo leswikulu swi ya swi andza.

Vugevenga: A hi vangani lava titwaka va hlayisekile loko va famba eswitarateni kumbe loko va tshame emakaya ya vona. Etikweni rin’wana ra le Yuropa, kwalomu ka munhu un’we eka vanharhu u hlaseriwe hi vugevenga eka lembe ra sweswinyana.

Mbango: Nthyakiso wa moya, ndhawu ni mati wu andzile swinene. Ematikweni lama hluvukaka, n’we-xa-mune xa vanhu a va ma kumi mati lama baseke.

Vusweti: Ku ni vanhu vo tala swinene lava nga swisiwana ni lava dlawaka hi ndlala ku tlula rini na rini. Vanhu vo tlula 90 wa tiphesente ematikweni man’wana va hanya evuswetini; tiphesente ta 30 ta vanhu lava nga fanelekaka ntirho emisaveni, ku nga timiliyoni ta kwalomu ka 800, a va na mintirho kumbe a va na ntirho lowunene—naswona nhlayo yi ya yi kula.

Ndlala: Hambi loko wena u ri ni swakudya leswi eneleke, timiliyoni to tala ta swi pfumala. Ematikweni lama nga siki hluvukaka, lembe na lembe ku fa vanhu va kwalomu ka 13 wa timiliyoni, ngopfu-ngopfu vana, hikwalaho ka ndlala.

Nyimpi: Madzana ya magidi ma dlayiwile eka madzolonga ya tinxaka lama veke kona ku nga ri khale. Naswona eka lembe-xidzana ra vu-20, tinyimpi ti dlaye vanhu vo tlula dzana ra timiliyoni.

Swiphiqo Swin’wana: Exikarhi ka leswi nga laha henhla, swin’wana swa swona i ku hahluka ka mindyangu loku andzaka, vamanana vo tala lava nga tekiwangiki, ku pfumala makaya loku andzaka, ku andza ka ku tirhisiwa loko biha ka swidzidzirisi, ku tikhoma loko biha loku andzeke. Hi laha ku faneleke, khale ka xirho xa huvo ya valawuri va United States xi te: “Ku ni swilo swo tala swinene leswi kombisaka . . . leswaku vanhu va onhakile.” Eka nguva ya sweswinyana ya malembe ya 30, vaaki va le United States va engeteleke hi 41 wa tiphesente, kambe madzolonga ma andze hi tiphesente ta 560, ku tswariwa ka vana loku nga riki enawini ku andze hi 400 wa tiphesente, ku dlaya vukati ku andze hi 300 wa tiphesente, mpimo wa ku tisunga ka vana va kondlo-a-ndzi-dyi wu andze hi 200 wa tiphesente. Xiyimo lexi xa fana ni xa le matikweni man’wana.

Ha Yini Swiphiqo Swi Andze Ku Tlurisa?

Muvumbi werhu wa hlamula. Rito ra yena ri vitana nkarhi lowu lowu taleke hi swiphiqo tanihi ‘masiku ya makumu,’ nkarhi lowu “minkarhi yo nonon’hwa” yi nga ta fika ha wona. (2 Timotiya 3:1) Masiku ya makumu ya yini? Kunene, Bibele yi vulavula hi “ku hela ka misava.”—Matewu 24:3, King James Version.

Swiphiqo swa namuntlha leswi andzaka swi kombisa kahle leswaku makumu ya mafambiselo lawa ya swilo ma tshinele, ku katsa ni ku hela ka vubihi ni lava va byi vangaka. (Matewu 24:3-14; 2 Timotiya 3:1-5; Nhlavutelo 12:7-12) Ku nga ri khale Xikwembu xi ta nghenelela kutani xi endla leswaku swiphiqo hinkwaswo swa namuntlha swi tlhantlhiwa hi ku helela.—Yeremiya 25:31-33; Nhlavutelo 19:11-21.

VUKHONGERI BYA MISAVA LEYI BYI TSANDZEKILE

Ematshan’weni yo pfuna ku tlhantlha swiphiqo swa namuntlha, mafambiselo ya vukhongeri bya misava ma swi engetela. Enkarhini wa tinyimpi, Makhatoliki ma dlaya Makhatoliki, Maprotestente ma dlaya Maprotestente—lama fikaka eka timiliyoni. Ku nga ri khale eRwanda, laha vunyingi byi nga Makhatoliki, vanhu a va dlayetelana hi madzana ya magidi! (Vona xifaniso eximatsini.)

Xana Yesu a a ta ya enyimpini a khome xibalesa kumbe banga, a dlaya vadyondzisiwa vakwe hikwalaho ka leswi va nga va rixaka rin’wana? A nga ta swi endla nikatsongo! Bibele yi ri: “Loyi a rhandzaka Xikwembu, ú fanele naswona ku rhandza makwavo.” (1 Yohane 4:20, 21) Vukhongeri bya misava leyi byi tsandzekile ku endla sweswo. “Hi milomo ya vona, va vula leswaku va tiva Xikwembu, kambe hi mintirho ya vona va xi landzula.”—Tito 1:16.

Ku tlula kwalaho, hi ku ka byi nga yi landzeleli mimpimanyeto ya Bibele ya mahanyelo, vukhongeri bya misava byi hoxa xandla eku hohlokeni loku tsemaka nhlana ka mahanyelo emisaveni hinkwayo.

Yesu u vule leswaku hi nga kota ku hambanisa vukhongeri bya mavunwa eka vukhongeri bya ntiyiso ‘hi mihandzu ya byona’—hi leswi endliwaka hi swirho swa byona. U tlhele a ku: “Murhi wun’wana ni wun’wana lowu nga tswariki mihandzu leyo nandziha, wu tsemiwa, wu hoxiwa endzilweni.” (Matewu 7:15-20) Rito ra Xikwembu ri hi tsundzuxa leswaku hi huma evukhongerini lebyi tswalaka mihandzu yo biha, lebyi nga vangaka leswaku hi lovisiwa.—Nhlavutelo 18:4.

Vukhongeri Bya Ntiyiso A Byi Tsandzekanga

Vukhongeri bya ntiyiso byi “tswala mihandzu leyo nandziha,” ngopfu-ngopfu rirhandzu. (Matewu 7:17; Yohane 13:34, 35) Hi yihi nhlengeletano ya vumakwerhu bya misava hinkwayo ya Vakreste lava nga ni vun’we, lava kombisaka rirhandzu ro tano? I vamani lava alaka ku dlaya vanhu va vukhongeri bya vona kumbe van’wanyana?—1 Yohane 3:10-12.

Timbhoni ta Yehovha ti tiviwa hi ku tswala “mihandzu yo nandziha.” Emisaveni hinkwayo, ematikweni yo tlula 230, ‘va fule matlhari ya vona ma va swikomu.’ (Esaya 2:4) Ku rhandza ka vona vanhu ku tlhela ku kombisiwa hi ku yingisa ka vona xileriso xa Kreste xa ku chumayela ‘mahungu lamanene’ ya Mfumo wa Xikwembu emisaveni hinkwayo. (Matewu 24:14) Nakambe va hanya hi ku landza mahanyelo lamanene lama dyondzisiwaka eBibeleni, va tlhela va ma seketela.—1 Vakorinto 6:9-11.

Vukhongeri bya ntiyiso a byi tsandzekanga. Byi kongomisa vanhu eka Loyi a nga ni vuswikoti byo tlhantlha swiphiqo swa vanhu. Ku nga ri khale Yena u ta tisa misava leyintshwa hi ku helela. Xana i mani Yena? (Vona tluka leri nga endzhaku.)

PARADEYISI LEYI NGA RIKI NA SWIPHIQO YI TA VA KONA HAKUNENE

Loko a wu ta swi kota, xana a wu nga ta swi tlhantlha swiphiqo hinkwaswo leswi karhataka vanhu? Kunene a wu ta swi tlhantlha! Xana hi nga anakanya leswaku Muvumbi wa hina la nga ni rirhandzu, ku nga yena ntsena loyi a nga ni matimba ni vutlharhi byo tlhantlha swiphiqo swa vanhu, a nge swi endli sweswo?

Bibele yi paluxa leswaku Xikwembu xi ta nghenelela etimhakeni ta vanhu hi ku tirhisa hulumendhe ya xona ya le tilweni leyi nga emavokweni ya Yesu Kreste. Yi ta “seletela” tihulumendhe leti onhakeke emisaveni. (Daniyele 2:44; Matewu 6:9, 10) Kambe hikwalaho ka yini? Loko a vulavula ni Xikwembu, mupisalema wa hlamula: “V̌a ta tiv̌a leŝaku wena loyi v̌ito ra yena a nga Yehova, u tlakukile henhla ka misav̌a hikwayo.”—Pisalema 83:18.

Loko misava leyi yi hela, xana vaponi va ta va kona? Bibele yi ri: “Misava ya hundza, . . . kambe loyi a endlaka ku rhandza ka Xikwembu, ú tshama hilaha ku nga heriki.” (1 Yohane 2:17) Xana vaponi lava va ta tshama kwihi? Bibele ya hlamula: “La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:9-11, 29; Swivuriso 2:21, 22.

Emisaveni leyintshwa ya Xikwembu, “rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:4) A ku nge he vi na vugevenga, vusweti, ndlala, vuvabyi, nhlomulo kumbe rifu! Phela, hambi vafi va ta tlhela va hanya! “Ku pfuka ka v̌afi ku ta v̌a kona.” (Mintirho 24:15, Bibele ya Xitsonga) Naswona misava yi ta hundzuriwa yi va paradeyisi ya xiviri.—Esaya 35:1, 2; Luka 23:43.

Xana hi fanele hi endla yini leswaku hi tsakela vutomi emisaveni leyintshwa ya Xikwembu? Yesu u te: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yohane 17:3) Timiliyoni ta vanhu va timbilu letinene emisaveni hinkwayo ti kuma vutivi byebyo. Byi va pfuna leswaku va langutana ni swiphiqo swa vona swo tala sweswi, kambe xa nkoka swinene, byi va nyika xitiyisekiso lexikulu xa leswaku swiphiqo leswi va nga kotiki ku swi tlhantlha swi ta herisiwa emisaveni leyintshwa ya Xikwembu.

[Laha Xifaniso Xi Humaka Kona eka tluka 2]

WHO photo by P. Almasy

[Laha Xifaniso Xi Humaka Kona eka tluka 3]

Jerden Bouman/Sipa Press