Xana I Buku Ya Wena Ke?

“A ku na ku hela e ku endleni ka tibuku le’to tala,” ku vula Solomoni, malembe ya kwalomu ka 3 000 lama hundzeke. (Eklesiasta 12:12) Marito wolawo ma fanerile namuntlha ku tlula rini na rini. Ku tlhandlekela eka tibuku ta khale leti nga humiki moya, ku kandziyisiwa magidi ya tibuku letintshwa lembe na lembe. Leswi ku nga ni tibuku to tala swonghasi leti u nga ti hlawulaka, ha yini u fanele u hlaya Bibele?

VANHU vo tala va hlaya tibuku leswaku va titsakisa ntsena kumbe va kuma vutivi, kumbe hi swivangelo leswi haswimbirhi. Swi nga va tano ni hi ku hlaya Bibele. Ku yi hlaya swi nga antswisa vutomi bya wena ni ku ku phyuphyisa. Kambe Bibele a yi pfuni sweswo ntsena. I xihlovo xo hlawuleka xa vutivi.—Eklesiasta 12:9, 10.

Bibele yi hlamula swivutiso leswi ku nga khale vanhu va tivutisa swona—swivutiso hi ta vutomi bya nkarhi wa hina lowu hundzeke, wa sweswi ni lowu taka. Vo tala va tivutisa: Xana hi huma kwihi? Xikongomelo xa vutomi i yini? Ntsako hi nga wu kumisa ku yini evuton’wini? Xana ku ta tshama ku ri ni vutomi laha misaveni? Xana vumundzuku byi hi khomele yini?

Vumbhoni hinkwabyo lebyi hlengeletiweke laha byi swi kombisa kahle leswaku Bibele ya pakanisa naswona ya tshembeka. Ana se hi yi kambisisile ndlela leyi ndzayo ya yona leyi tirhaka yi nga hi pfunaka ha yona leswaku hi hanya vutomi lebyi nga ni xikongomelo ni lebyi tsakisaka namuntlha. Leswi tinhlamulo ta yona hi ta masiku ya hina ti enerisaka, entiyisweni tinhlamulo ta yona hi ta nkarhi lowu hundzeke ni vuprofeta bya yona hi ta nkarhi lowu taka swi fanele swi kambisisiwa hi vukheta.

Ndlela Yo Kuma Mpfuno Lowukulu

Vanhu vo tala va sungule ku hlaya Bibele kambe va tshika loko va kuma swiphemu swin’wana swa yona swi nonon’hwa ku swi twisisa. Loko swi ve tano hi wena, ku ni swin’wana leswi nga ku pfunaka.

Hlawula vuhundzuluxeri lebyi tshembekaka lebyi tirhisaka ririmi ra namuntlha, byo tanihi New World Translation of the Holy Scriptures.a Vanhu van’wana va sungula hi ku hlaya marungula ya Tievhangeli ya vutomi bya Yesu, loyi tidyondzo ta yena ta vutlhari, to tanihi leti kumekaka eDyondzweni ya le Ntshaveni, ti kombisaka nkhathalo lowukulu eka munhu ni ku hlamusela ndlela leyi hi nga ma antswisaka ha yona mahanyelo ya hina evuton’wini.—Vona Matewu tindzima 5 ku ya eka 7.

Ku tlhandlekela eku hlayeni ka Bibele hinkwayo, endlelo ro dyondza hi ku ya hi nhloko-mhaka ri nga pfuna swinene. Leswi swi katsa ku kambisisa leswi Bibele yi swi vulaka hi mhaka yo karhi. Swi nga ha ku hlamarisa ku dyondza leswi Bibele yi swi vulaka hakunene hi timhaka to tanihi moya-xiviri, tilo, misava, vutomi ni rifu, kun’we ni hi Mfumo wa Xikwembu—leswi wu nga swona ni leswi wu nga ta swi endla.b Timbhoni ta Yehovha ti ni nongonoko wa ku dyondza Bibele hi ku ya hi mhaka yo karhi, lowu nyikeriwaka mahala. U nga vutisa hi ta wona hi ku tsalela vakandziyisi va broxara leyi, u tirhisa adirese leyi faneleke eka leti xaxametiweke eka tluka 2.

Endzhaku ko kambisisa vumbhoni, vanhu vo tala va gimete hi leswaku Bibele yi huma eka Xikwembu, lexi Matsalwa ma xi vulaka “Yehova.” (Pisalema 83:18) Kumbexana wena a wu kholwi leswaku Bibele yi huma eka Xikwembu. Kambe ha yini u nga tikambisiseli yona? Ha tshemba leswaku endzhaku ko dyondza, u anakanyisisa kumbexana ni ku khumbeka hi ntikelo lowu susumetaka wa vutlhari bya yona lebyi nga hundzeriwiki hi nkarhi, u ta kuma leswaku hakunene Bibele i buku ya vanhu hinkwavo, naswona ku tlula kwalaho—i buku ya wena.

[Tinhlamuselo ta le hansi]