Hlaya Rito Ra Xikwembu U Xi Tirhela Hi Ntiyiso
“Oho Yehova, nḍi dyonḍise ndlela ya wena! Nḍi ta famba e ku ṭhembekeni ka wena.”—PISALEMA 86:11.
1. Eku sunguleni, i yini lexi nkandziyiso wo sungula wa magazini lowu wu xi vuleke mayelana ni ntiyiso?
YEHOVHA u rhumela ku vonakala ni ntiyiso. (Pisalema 43:3) U tlhela a hi nyika vuswikoti byo hlaya Rito ra yena, Bibele, ni ku dyondza ntiyiso. Nkandziyiso wo sungula wa magazini lowu—July 1879—wu te: “Ntiyiso, wu fana ni xiluva lexitsongo xo saseka emananga ya vutomi, lexi rhendzeriweke naswona xi nga kusuhi ni ku kamanyetiwa hi mfava lowukulu wa mavunwa. Loko wo wu kuma a wu fanele ku tshama u xalamukile. Loko u lava ku vona ku saseka ka wona u fanele u susa mfava wa mavunwa ni mitwa leyi nga lavekiki. Loko u lava ku wu kuma u fanele u titsongahata leswaku u wu kuma. U nga eneriseki hi xiluva xin’we xa ntiyiso. Loko ku ri ku xin’we xi enele a ku nga ha ta endliwa swin’wana. Tshama u ri karhi u hlengeleta, tshama u ri karhi u lava leswi engetelekeke.” Ku hlaya ni ku kambisisa Rito ra Xikwembu swi hi pfuna leswaku hi kuma vutivi lebyi kongomeke ni ku famba entiyisweni wa xona.—Pisalema 86:11.
2. I yini lexi veke kona loko Ezra ni van’wana va hlayele Vayuda Nawu wa Xikwembu le Yerusalema wa khale?
2 Endzhaku ka loko makhumbi ya le Yerusalema ma tlhele ma akiwa hi 455 B.C.E., muprista Ezra ni van’wana va hlayele Vayuda Nawu wa Xikwembu. Leswi swi landzeriwe hi Nkhuvo wa Mintsonga lowu tsakisaka, ku tivula swidyoho ni ku hetisisa “ntwanano.” (Nehemiya 8:1–9:38) Ha hlaya: “A v̌a hlaya buku ya milawu ya Šikwembu hi rito le’ri twalaka, v̌a ri kari v̌a hlamusela, v̌a twisisisa le’ŝi hlayiwaka.” (Nehemiya 8:8) Van’wana va vula leswaku Vayuda a va nga xi twisisi kahle Xiheveru hikwalaho ku endliwe mavekelo lama hambaneke ya Xiarama. Kambe ndzimana leyi a yi kombisi ku vekiwa erivaleni ka ririmi ntsena. Ezra ni van’wana va hlamusele Nawu leswaku vanhu va twisisa misinya ya milawu ya wona ni ku yi tirhisa. Tibuku ta Vukreste ni minhlangano na swona swa tirha ku ‘endla nhlamuselo ya’ Rito ra Xikwembu. Vakulu lava vekiweke na vona va “kota ku dyondzisa.”—1 Timotiya 3:1, 2; 2 Timotiya 2:24.
Mimbuyelo Leyi Nga Heriki
3. Hi byihi vuyelo byin’wana lebyi kumiwaka eku hlayeni ka Bibele?
3 Loko mindyangu ya Vukreste yi hlaya Bibele swin’we, a swi kanakanisi leswaku yi ta va ni mimbuyelo leyi nga heriki. Va sungula ku tolovelana ni milawu ya Xikwembu ni ku dyondza ntiyiso mayelana ni tidyondzo, timhaka ta vuprofeta ni timhaka tin’wana. Endzhaku ka loko xiphemu xo karhi xa Bibele xi hlayiwile, nhloko ya ndyangu yi nga ha vutisa: Xana leswi swi fanele swi hi khumba hi ndlela yihi? Xana leswi swi yelana njhani ni tidyondzo tin’wana ta Bibele? Xana hi nga ti tirhisa njhani tinhla leti eku chumayeleni ka mahungu lamanene? Loko ndyangu wu hlaya Bibele, wu kuma vutlhari lebyikulu loko wu endla ndzavisiso hi ku tirhisa Watch Tower Publications Index kumbe ti-index tin’wana. Tivholumo timbirhi ta Insight on the Scriptures ti nga ha kambisisiwa hi laha ku vuyerisaka.
4. Xana Yoxuwa a ta xi tirhisa njhani xiletelo lexi tsariweke eka Yoxuwa 1:8?
4 Misinya ya milawu leyi tekiweke eMatsalweni yi nga hi kongomisa evuton’wini. Tlhandlakambirhi, ku hlaya ni ku kambisisa ‘matsalwa yo kwetsima swi nga hi endla hi tlhariha leswaku hi ta ponisiwa.’ (2 Timotiya 3:15) Loko hi pfumelela Rito ra Xikwembu ri hi kongomisa, hi ta tshama hi famba entiyisweni wa xona naswona ku navela ka hina lokunene ku ta xiyiwa. (Pisalema 26:3; 119:130) Hambiswiritano, hi fanele hi lava ku twisisa, hilaha Yoxuwa mutlhandlami wa Muxe, a endleke ha kona. “Buku ya nawu” a yi nga fanelanga yi suka enon’wini wa yena, naswona a fanele a yi hlaya vusiku ni nhlikanhi. (Yoxuwa 1:8) Ku ka a nga pfumeleli “buku ya nawu” yi suka enon’wini wa yena a swi vula leswaku Yoxuwa a nga fanelanga a tshika ku byela van’wana swilo leswi yi dyondzisaka swona. Ku hlaya Nawu nhlikanhi ni vusiku a swi vula leswaku Yoxuwa a fanele a anakanyisisa hi wona, a fanele a wu kambisisa. Muapostola Pawulo hi laha ku fanaka u khutaze Timotiya ku “xiyisisa” (NW)—ku anakanyisisa—mahanyelo, vutirheli ni dyondzo ya yena. Tanihi nkulu wa Mukreste, Timotiya a a fanele a va ni vukheta ngopfu leswaku vutomi bya yena byi va xikombiso lexinene ni leswaku a a dyondzisa ntiyiso wa Matsalwa.—1 Timotiya 4:15.
5. I yini lexi lavekaka loko hi lava ku kuma ntiyiso wa Xikwembu?
5 Ntiyiso wa Xikwembu i xuma xa risima. Ku xi kuma swi lava ku cela, ku lavisisa hi ku phindha-phindha eMatsalweni. Tanihi vadyondzi lava fanaka ni vana va Muleteri Lonkulu hi kuma vutlhari hi tlhela hi sungula ku twisisa ku chava Yehovha hi ku xixima lokukulu ntsena. (Swivuriso 1:7; Esaya 30:20, 21) Kavula, hi fanele hi tiyisekisa swilo hi Matsalwa. (1 Petro 2:1, 2) Vayuda va le Beriya a “va tlurisa Vatesalonika hi mafundzha, va amukela Rito hi ku nkhensa lokukulu, va kambisisa Matsalwa masiku hinkwawo, va lava ku tiva leswaku xana timhaka [leti vuriweke hi Pawulo] ti tano xana.” Vaberiya va bumabumeriwile ematshan’wini yo tshinyiwa.—Mintirho 17:10, 11.
6. Ha yini Yesu a kombise leswaku a swi va pfunanga nchumu Vayuda van’wana ku lavisisa Matsalwa?
6 Yesu u byele Vayuda van’wana a ku: “Mi lavisisa Matsalwa, hikuva mi anakanya leswaku, eka wona, mi ta kuma vutomi lebyi nga heriki; kasi hi wona lama vekaka vumbhoni ehenhla ka mina. Kutani a mi swi lavi ku ta eka mina leswaku mi ta kuma vutomi.” (Yohane 5:39, 40) Va kambisise Matsalwa hi xikongomelo lexinene—leswaku ma ta va kongomisa evuton’wini. Hakunene, Matsalwa a ma ri na vuprofeta bya Vumesiya lebyi a byi kombetela eka Yesu tanihi ndlela yo ya evuton’wini. Kambe Vayuda va n’wi arile. Hikwalaho, ku kambisisa ka vona Matsalwa a ku va pfunanga nchumu.
7. I yini lexi lavekaka leswaku hi kula eku twisiseni ka Bibele, naswona ha yini?
7 Leswaku hi kula eku twisiseni ka hina Bibele, hi lava nkongomiso wa moya wa Xikwembu kumbe matimba lama tirhaka. “Moya wu lavisisa hinkwaswo, hambi swi ri swihundla leswi enteke swa Xikwembu” leswaku wu ta humesa nhlamuselo ya swona. (1 Vakorinto 2:10) Vakreste va le Tesalonika a va fanele va “kambisis[a] hinkwaswo” eka vuprofeta hinkwabyo lebyi va byi tweke. (1 Vatesalonika 5:20, 21) Loko Pawulo a tsalela Vatesalonika (kwalomu ka 50 C.E.), xiphemu xin’we ntsena xa Matsalwa ya Xigriki lexi ana se a xi hetiwile a ku ri Evhangeli ya Matewu. Kutani Vatesalonika ni Vaberiya a va ta tiyiseka hi swilo hinkwaswo, kumbexana hi ku kambisisa vuhundzuluxeri bya Septuagint bya Xigriki bya Matsalwa ya Xiheveru. A va fanele va hlaya ni ku kambisisa Matsalwa, hilaha na hina hi endlaka ha kona.
I Ya Nkoka Eka Hinkwerhu
8. Ha yini vakulu lava vekiweke va fanele va va ni vutivi lebyikulu bya Bibele?
8 Vakulu lava vekiweke va fanele va va ni vutivi lebyikulu bya Bibele. Va fanele va “kota ku dyondzisa” naswona va fanele va ‘namarhela rito leri tshembekaka.’ Mulanguteri Timotiya a a fanele a “dyondzisa Rito ra ntiyiso hi ndlela leyinene.” (1 Timotiya 3:2; Tito 1:9; 2 Timotiya 2:15) Mana wa yena, Yunika, ni kokwa wa yena Luwisa va n’wi dyondzise matsalwa yo kwetsima ku sukela evuhlangini, va nghenisa ‘ripfumelo leri nga riki ra vukanganyisi’ eka yena, hambileswi tata wa yena a nga ri mupfumeri. (2 Timotiya 1:5; 3:15) Vatatana lava nga vapfumeri va fanele va kurisa vana va vona “hi ku va laya ni ku va dyondzisa ta Hosi,” naswona ngopfu-ngopfu vakulu lava nga vatatana va fanele ku va ni ‘vana lava nga vapfumeri lava lawulekaka kumbe lava nga soriwiki hikwalaho ka mahanyelo ya vona ya vusopfa.’ (Vaefesa 6:4; Tito 1:6) Kutani, ku nga khathariseki swiyimo swa hina hi fanele hi xi teka xi ri xa nkoka xilaveko xo hlaya, hi kambisisa ni ku tirhisa Rito ra Xikwembu.
9. Ha yini hi fanele hi dyondza Bibele hi hlangane ni Vakreste-kulorhi?
9 Nakambe hi fanele hi dyondza Bibele hi hlangane ni vapfumeri-kulobye. Pawulo a a lava leswaku Vakreste va le Tesalonika va kanela ndzayo ya yena ni van’wana. (1 Vatesalonika 4:18) Leswaku hi lota ku twisisa ka hina ka ntiyiso, ku hava xilo xo antswa ku tlula ku joyina swichudeni swin’wana leswi tinyiketeleke eku kambisiseni ka Matsalwa. Xivuriso lexi i ntiyiso: “Nsimbi yi lota nsimbi, hi ŝeŝo ka munhu, o hlohlotela v̌ukari bya munhu.” (Swivuriso 27:17) Xitirho xa nsimbhi xi nga kurha loko xi nga tirhisiwi ni ku lotiwa. Hi ku fanana, hi fanele hi hlangana nkarhi na nkarhi ni ku lotana hi ku avelana vutivi lebyi hi byi kumeke loko hi hlaya, hi kambisisa ni ku anakanyisisa hi Rito ra Xikwembu ra ntiyiso. (Vaheveru 10:24, 25) Tlhandlakambirhi, leyi hi yona ntsena ndlela yo tiyiseka leswaku ha vuyeriwa eka miseve ya ku vonakala ka moya.—Pisalema 97:11; Swivuriso 4:18.
10. Xana ku famba entiyisweni swi vula yini?
10 Eku dyondzeni ka hina Matsalwa, hi nga khongela eka Xikwembu hilaha ku faneleke hilaha mupisalema a endleke ha kona: “Ruma ku v̌onakala ka wena ni v̌unene bya wena, ŝi nḍi fambisa.” (Pisalema 43:3) Loko hi navela ku amukeriwa hi Xikwembu, hi fanele hi famba entiyisweni wa xona. (3 Yohane 3, 4) Leswi swi katsa ku tshama eka swilaveko swa xona ni ku xi tirhela hi ku tshembeka ni hi mbilu hinkwayo. (Pisalema 25:4, 5; Yohane 4:23, 24) Hi fanele hi tirhela Yehovha hi ntiyiso, hi laha swi paluxiweke ha kona eRitweni ra yena swi tlhela swi vekiwa erivaleni etibukwini ta “nandza la tshembekaka, wo tlhariha.” (Matewu 24:45-47) Leswi swi lava vutivi lebyi kongomeke bya Matsalwa. Kutani, xana hi fanele hi ri hlaya ni ku ri kambisisa hi ndlela yihi Rito ra Xikwembu? Xana hi fanele hi sungula ku ri hlaya ku sukela eka Genesa ndzima 1, ndzimana 1, hi ku landzelelana hi kondza hi heta tibuku leti ta 66? Ina, Mukreste un’wana ni un’wana loyi Bibele leyi heleleke yi nga kona hi ririmi ra yena u fanele a yi hlaya ku sukela eka Genesa ku ya fika eka Nhlavutelo. Naswona xikongomelo xa hina eku hlayeni ka Bibele ni tibuku ta Vukreste xi fanele xi va xa ku engetela ku twisisa ka hina mpimo lowukulu wa ntiyiso wa Matsalwa lowu Xikwembu xi wu endleke wu kumeka hi ku tirhisa ‘nandza wo tshembeka.’
Hlayela Rito Ra Xikwembu Ehenhla
11, 12. Ha yini swi pfuna ku hlayela Bibele ehenhla eminhlanganweni?
11 Hi nga ha hlayela embilwini loko hi ri hexe. Hambiswiritano, eminkarhini ya khale ku hlaya ka le xihundleni a ku endleriwa ehenhla. Hikwalaho, loko mutsheniwa wa Muetiyopiya a ri karhi a famba hi kalichi ya yena, muvuri wa evhangeli Filipi u n’wi twile a ri karhi a hlaya vuprofeta bya Esaya. (Mintirho 8:27-30) Rito ra Xiheveru leri hundzuluxeriweke va ku ku “hlaya” ngopfu-ngopfu ri vula ku “vitana.” Kutani lava eku sunguleni a va tsandzeka ku hlaya hi mbilu ni ku kuma mongo wa leswi va swi hlayaka a va fanelanga va hetiwa matimba hi ku hlayela rito rin’wana ni rin’wana ehenhla. Xilo xa nkoka i ku dyondza ntiyiso hi ku hlaya Rito ra Xikwembu leri tsariweke.
12 Swa pfuna ku hlayela Bibele ehenhla eminhlanganweni ya Vukreste. Muapostola Pawulo u khutaze mutirhi-kulobye Timotiya a ku: “Tinyikete ku hlayela vanhu eMatsalwa, u khongotela ni ku dyondzisa.” (1 Timotiya 4:13, xiitaliki i xerhu.) Pawulo u byele Vakolosa a ku: “Loko papila leri ri hlayiwile exikarhi ka n’wina, vonani leswaku ri hlayiwa ni le [vandlheni ra] Lawodikiya, ni leswaku na n’wina mi hlaya papila leri humaka le Lawodikiya.” (Vakolosa 4:16) Naswona Nhlavutelo 1:3 yi ri: “Ku katekile munhu loyi a hlayaka mahungu lawa ya vuhlavuteli, ku katekile ni lava va ma yingisaka, ni ku landza leswi tsariweke ebukwini ya kona; hikuva nkarhi wa ku humelela ka swona wu kusuhi.” Hikwalaho, xivulavuri xa le rivaleni xi fanele xi hlaya tindzimana eBibeleni leswaku xi seketela leswi xi swi byelaka vandlha.
Maendlelo Yo Dyondza Lama Hleriweke Hi Tinhloko-Mhaka
13. Hi rihi endlelo leri humelelaka swinene ra ku dyondza mintiyiso ya Bibele, naswona i yini lexi nga hi pfunaka ku kuma matsalwa?
13 Ku dyondza hi tinhloko-mhaka i endlelo leri humelelaka swinene ro dyondza mintiyiso ya Matsalwa. Tikhonkodensi, leti xaxametaka marito ya le Bibeleni hi ku landzelelana eka mongo wa wona hi ku ya hi buku, ndzima na ndzimana, ti endla swi olova ku kuma tindzimana leti yelanaka ni mhaka yo karhi. Naswona matsalwa yo tano ma nga twananisiwa ni man’wana hikuva Mutsari wa Bibele a nga tikaneti. Hi moya lowo kwetsima, u huhutele vavanuna va 40 leswaku va tsala Bibele hi nkarhi wo tlula malembe-xidzana ya 16, naswona ku yi dyondza hi tinhloko-mhaka i ndlela leyi ringetiweke yo dyondza ntiyiso.
14. Ha yini hi fanele hi hlaya swin’we Matsalwa ya Vukreste ya Xiheveru ni ya Xigriki?
14 Ku tlangela ka hina ntiyiso wa Bibele ku fanele ku hi susumetela ku hlaya ni ku kambisisa Matsalwa ya Vukreste ya Xigriki xikan’we ni Matsalwa ya Xiheveru. Leswi swi ta kombisa ndlela leyi Matsalwa ya Xigriki ma hlanganaka ha yona ni xikongomelo xa Xikwembu naswona swi ta ku voningela eka vuprofeta bya Matsalwa ya Xiheveru. (Varhoma 16:25-27; Vaefesa 3:4-6; Vakolosa 1:26) Lexi pfunaka swinene emhakeni leyi i New World Translation of the Holy Scriptures. Yi hleriwe hi malandza ya Xikwembu lama tinyiketeleke, lama tirhiseke vutivi lebyi engetelekeke lebyi byi kumekaka malunghana ni tsalwa ro sungula ra Bibele swin’we ni xisekelo xa rona ni marito ya swivuriso. Swipfuneto swo dyondza Bibele leswi Yehovha a swi nyikeleke hi ku tirhisa “nandza la tshembekaka, wo tlhariha” i swa nkoka na swona.
15. Xana u nga swi kombisa hi ndlela yihi leswaku swi fanerile ku tshaha eka swiyenge swo hambana-hambana swa Bibele?
15 Van’wana va nga ha ku, ‘Tibuku ta n’wina ti tshaha eBibeleni hi magidi ya minkarhi, kambe ha yini mi tshaha eka swiphemu swo hambana-hambana swa yona?’ Hi ku tshaha eka swiyenge swo tala eka tibuku ta Bibele ta 66, tibuku leti ti kombisa vumbhoni byo hlayanyana lebyi huhuteriweke ku kombisa ntiyiso wa dyondzo. Yesu hi yexe u tirhise endlelo leri ro dyondzisa. Loko a nyikela Dyondzo ya yena ya le Ntshaveni, u endle mintshaho ya 21 eMatsalweni ya Xiheveru. Nkulumo yoleyo yi na mintshaho minharhu leyi humaka eka Eksoda, yimbirhi leyi humaka eka Levhitika, wun’we lowu humaka eka Tinhlayo, tsevu leyi humaka eka Deteronoma, wun’we lowu humaka eka Tihosi ta Vumbirhi, mune leyi humaka eka Tipisalema, yinharhu leyi humaka eka Esaya na wun’we lowu humaka eka Yeremiya. Hi ku endla leswi, xana Yesu a ‘ringeta ku kombisa swilo swo karhi ntsena’? E-e, hikuva ‘a a dyondzisa ku fana ni munhu la nga ni matimba, hayi ku fana ni vatsari.’ Leswi a swi ri tano hikuva Yesu u seketele dyondzo ya yena hi matimba ya Rito ra Xikwembu leri tsariweke. (Matewu 7:29) Muapostola Pawulo na yena u endle tano.
16. I mintshaho yihi ya le Matsalweni leyi Pawulo a yi endleke eka Varhoma 15:7-13?
16 Etindzimaneni ta matsalwa leti kumekaka eka Varhoma 15:7-13, Pawulo u tshahe eka swiyenge swinharhu swa Matsalwa ya Xiheveru—Nawu, Vaprofeta ni Tipisalema. U kombise leswaku Vayuda ni Vamatiko va ta dzunisa Xikwembu, xisweswo Vakreste va fanele va amukela vanhu va matiko hinkwawo. Pawulo u te: “Amukelanani, kukotisa leswi Kriste na yena a mi amukeleke, eku dzuniseni ka Xikwembu. Hikuva ndza mi byela leswaku Kriste ú ve nandza eka Vayuda, ku kombisa ku tshembeka ka Xikwembu, ni ku endla leswaku switshembiso leswi nga nyikiwa vakokwana swi hetiseka, ni leswaku vamatiko va ta kota ku dzunisa Xikwembu hikwalaho ka tintswalo ta xona, hilaha swi tsariweke ha kona [eka Pisalema 18:49] va ku: ‘Hikokwalaho, ndzi ta ku dzunisa exikarhi ka vamatiko, ndzi ta yimbelela ndzi twarisa vito ra wena.’ Nakambe, a ku [eka Deteronoma 32:43]: ‘N’wina vamatiko, tsakani, swin’we ni vanhu va Xikwembu.’ Nakambe, va ku [eka Pisalema 117:1]: ‘N’wina vamatiko hinkwenu, dzunisani Hosi, vanhu hinkwavo a va yi dzunise.’ Kambe-kambe, Esaya [11:1, 10] a ku: ‘Hluke ra Yese ri ta ta, yena loyi a humelelaka ku ta fuma matiko; eka yena, vamatiko va ta va ni ku langutela.’ Ingi Xikwembu lexi ku langutela ku humaka ka xona xi nga mi tata hi ku tsaka hinkwako ni ku rhula hinkwako eku pfumeleni, leswaku hi matimba ya Moya lowo Kwetsima, ku langutela ku mi talela, ku va ku khapa.” Hi endlelo leri ra tinhloko-mhaka, Pawulo u kombise ndlela yo tshaha matsalwa leswaku u kuma mintiyiso ya Bibele.
17. Xana Vakreste va pfumelelana ni xikombiso xihi loko va tshaha eka swiphemu swo hambana-hambana eka Bibele hinkwayo?
17 Papila ro sungula ra muapostola Petro leri huhuteriweke ri na 34 wa mintshaho leyi humaka eka tibuku ta khume ta Nawu, Vaprofeta na Tipisalema. Eka papila ra yena ra vumbirhi, Petro u tshaha ka tsevu eka tibuku tinharhu. Evhangeli ya Matewu yi na 122 wa mintshaho ku sukela eka Genesa ku ya eka Malakiya. Eka tibuku ta 27 ta Matsalwa ya Xigriki, ku na 320 wa mintshaho leyi kongomeke ku sukela eka Genesa ku ya eka Malakiya swin’we ni madzana ya ku kombeteriwa kun’wana ka Matsalwa ya Xiheveru. Hi ku pfumelelana ni xikombiso lexi vekiweke hi Yesu ivi xi landzeriwa hi vaapostola va yena, loko Vakreste va manguva lawa va endla dyondzo ya tinhloko-mhaka ya mhaka ya Matsalwa, va tshaha eka swiyenge swo hambana-hambana eBibeleni hinkwayo. Leswi swa fanela ngopfu-ngopfu “emasikwini [lawa] ya makumu,” laha yo tala ya Matsalwa ya Xiheveru ni ya Xigriki ma karhiki ma hetisekaka. (2 Timotiya 3:1) ‘Nandza la tshembekaka’ u tirhisa Bibele ni tibuku ta yona, kambe a nga ri engeteli Rito ra Xikwembu kumbe ku ri hunguta.—Swivuriso 30:5, 6; Nhlavutelo 22:18, 19.
Fambani eNtiyisweni Minkarhi Hinkwayo
18. Ha yini hi fanele hi ‘famba entiyisweni’?
18 A hi fanelanga hi susa nchumu eBibeleni, hikuva tidyondzo hinkwato ta Vukreste leti nga eRitweni ra Xikwembu i “ntiyiso” kumbe “ntiyiso wa Evhangeli.” Ku namarhela entiyisweni lowu—ku wu “landza”—i swa nkoka leswaku hi ponisiwa. (Vagalatiya 2:5; 2 Yohane 4; 1 Timotiya 2:3, 4) Tanihileswi Vukreste byi nga “ndlela ya ntiyiso,” hi ku pfuna van’wana eku byi andziseni, hi va “lava tirhisanaka na vona entiyisweni.”—2 Petro 2:2; 3 Yohane 8.
19. Xana hi nga ‘ya emahlweni hi famba entiyisweni’ hi ndlela yihi?
19 Loko hi lava ku ‘tshama hi famba entiyisweni,’ hi fanele hi hlaya Bibele ni ku titirhisela mpfuno wa moya lowu Xikwembu xi wu nyikelaka hi ku tirhisa ‘nandza la tshembekaka.’ (3 Yohane 4) Onge hi nga endla leswi leswaku hi pfuneka hina vini naswona hi va exiyin’weni xo dyondzisa van’wana mayelana na Yehovha Xikwembu, Yesu Kreste ni swikongomelo swa Xikwembu. Naswona a hi nkhenseni leswi moya wa Yehovha wu hi pfunaka ku twisisa Rito ra yena ni ku humelela eku n’wi tirheleni hi ntiyiso.
Hi Tihi Tinhlamulo Ta Wena?
◻ Hi yihi mimbuyelo yin’wana leyi nga heriki ya ku hlaya Bibele?
◻ Ha yini hi fanele hi dyondza Bibele hi hlangene ni vapfumeri-kulorhi?
◻ Ha yini swi fanerile ku tshaha eka swiyenge swo hambana-hambana eBibeleni hinkwayo?
◻ Xana ku ‘famba entiyisweni’ swi vula yini, naswona hi nga swi endlisa ku yini sweswo?
[Xifaniso lexi nga eka tluka 17]
Vatswari, dyondzisani vana va n’wina Matsalwa
[Xifaniso lexi nga eka tluka 18]
EDyondzweni ya yena ya le Ntshaveni, Yesu u tshahe eka swiyenge swo hambana-hambana swa Matsalwa ya Xiheveru