Tinyiketele Eku Hlayeni
“Tinyikete ku hlayela vanhu eMatsalwa, u khongotela ni ku dyondzisa, ndzi ko ndzi fika.”—1 TIMOTIYA 4:13.
1. Xana hi nga pfuneka hi ndlela yihi eku hlayeni ka Bibele?
YEHOVHA XIKWEMBU u nyike vanhu vuswikoti byo hlamarisa bya ku hlaya ni ku tsala. U tlhele a hi nyika Rito rakwe, Bibele, leswaku hi ta leteriwa kahle. (Esaya 30:20, 21) Hi ndlela yo fanekisela, matluka ya yona ma hi endla hi kota ku ‘famba’ ni vapatriarka lava a va chava Xikwembu vo tanihi Abrahama, Isaka na Yakobo. Hi nga ‘vona’ vavasati lava a va chava Xikwembu vo tanihi Sara, Rhaveka na Rhuti Mumowabu wo tshembeka. Ina, hi nga “twa” Yesu Kreste a nyikela Dyondzo yakwe eNtshaveni. Mintsako leyi hinkwayo ni swileriso leswi hlamarisaka leswi humaka eMatsalweni yo Kwetsima swi nga va swa hina loko hi ri vahlayi lavanene.
2. I yini lexi kombisaka leswaku Yesu ni vaapostola va yena a va swi kota ku hlaya kahle?
2 Handle ko kanakana, wanuna loyi wo hetiseka Yesu Kreste a a ri ni vuswikoti lebyi tlakukeke byo hlaya, naswona entiyisweni a a ma tiva kahle Matsalwa ya Xiheveru. Hikwalaho, loko a ringiwe hi Diyavulosi, Yesu hi ku phindha-phindha u kombetele eka wona a ku: “Ku tsariwile leswi.” (Matewu 4:4, 7, 10) Eka xiendlakalo xin’wana esinagogeni le Nazareta, u hlaye erivaleni a tlhela a hlamusela ku hetiseka ka xiphemu xa vuprofeta bya Esaya eka yena n’wini. (Luka 4:16-21) Ku vuriwa yini hi vaapostola va Yesu? Etibukwini ta vona, hakanyingi a va tshaha Matsalwa ya Xiheveru. Hambileswi vafumi va Vayuda a va languta Petro na Yohane tanihi lava nga dyondzangiki ni lava tolovelekeke hi leswi a va nga dyondzanga eswikolweni swa Vaheveru leswi tlakukeke, matsalwa ya vona lama huhuteriweke hi Xikwembu ma swi kombisa kahle leswaku a va swi kota ku hlaya ni ku tsala kahle. (Mintirho 4:13) Kambe xana vuswikoti bya ku hlaya i bya nkoka hakunene?
“Ku Katekile Munhu Loyi A Hlayaka”
3. Ha yini swi ri swa nkoka ku hlaya Matsalwa ni tibuku ta Vukreste?
3 Ku nghenisa ni ku tirhisa vutivi lebyi kongomeke bya Matsalwa swi nga yisa eka vutomi lebyi nga heriki. (Yohane 17:3) Hikwalaho Timbhoni ta Yehovha ta swi xiya leswaku i swa nkoka swinene ku hlaya ni ku kambisisa Matsalwa layo Kwetsima ni tibuku ta Vukreste leti lunghiseleriwaka hi Xikwembu hi ku tirhisa nandza lowo tshembeka, wa vutlhari wa Vakreste lava totiweke. (Matewu 24:45-47) Entiyisweni, hi ku tirhisa tibuku ta Watch Tower leti hleriweke hi ku hlawuleka, magidi ma dyondzisiwe ku hlaya ivi xisweswo ma kuma vutivi bya Rito ra Xikwembu lebyi nyikaka vutomi.
4. (a) Ha yini ku hlaya, ku kambisisa ni ku tirhisa Rito ra Xikwembu swi tisa ntsako? (b) Malunghana ni ku hlaya, i yini leswi Pawulo a swi byeleke Timotiya?
4 Ku hlaya, ku kambisisa ni ku tirhisa Rito ra Xikwembu swi tisa ntsako. Leswi swi va tano hikuva hi ku endla tano hi tsakisa ni ku xixima Xikwembu, hi kuma mikateko ya xona ni ku kuma ntsako. Yehovha u lava leswaku malandza ya yena ma tsaka. Hikwalaho, u lerise vaprista leswaku va hlayela vanhu va le Israyele wa khale Nawu wa yena. (Deteronoma 31:9-12) Loko Ezra mukopi ni van’wana va hlayele vanhu hinkwavo lava hlengeletaneke eYerusalema Nawu, nhlamuselo ya wona yi vekiwe erivaleni, naswona vuyelo bya kona ku ve ‘ntsako lowukulu.’ (Nehemiya 8:6-8, 12) Pawulo muapostola la nga Mukreste endzhakunyana u byele mutirhi-kulobye Timotiya a ku: “Tinyikete ku hlayela vanhu eMatsalwa, u khongotela ni ku dyondzisa, ndzi ko ndzi fika.” (1 Timotiya 4:13) Vuhundzuluxeri byin’wana byi hlayekisa xileswi: “Tinyiketele ku hlayela vanhu Matsalwa.”—New International Version.
5. Xana Nhlavutelo 1:3 yi hlanganisa ntsako ni ku hlaya hi ndlela yihi?
5 Leswaku ntsako wa hina wu titshege hi ku hlaya ni ku tirhisa Rito ra Xikwembu swi vekiwe erivaleni eka Nhlavutelo 1:3. Hi byeriwa leswi: “Ku katekile munhu loyi a hlayaka mahungu lawa ya vuhlavuteli, ku katekile ni lava va ma yingisaka, ni ku landza leswi tsariweke ebukwini ya kona; hikuva nkarhi wa ku humelela ka swona wu kusuhi.” Ina, hi fanele hi ma hlaya swi twakala ni ku yingisa marito ya Xikwembu ya vuprofeta eka Nhlavutelo ni le ka Matsalwa hinkwawo. Munhu la tsakeke hakunene hi loyi “a tiṭakela[ka] e nawini wa Yehova, a wu anakanya nhlekanhi ni v̌usiku.” Vuyelo byi ta va byihi? “Hikwaŝo leŝi a ŝi endlaka ŝi ta kateka.” (Pisalema 1:1-3) Hikwalaho, nhlengeletano ya Yehovha yi khutaza un’wana ni un’wana wa hina leswaku a hlaya ni ku kambisisa Rito ra yena a ri yexe, tanihi mindyangu ni loko hi ri ni vanghana, hikwalaho ka swivangelo leswinene.
Ehleketa Swinene U Tlhela U Anakanyisisa
6. Xana Yoxuwa a lerisiwe leswaku a hlaya yini, naswona leswi swi n’wi pfune hi ndlela yihi?
6 Xana u nga swi kumisa ku yini swo tala eku hlayeni ka wena Rito ra Xikwembu ni tibuku ta Vukreste? A swi kanakanisi leswaku u ta swi kuma swi pfuna ku endla leswi endliweke hi Yoxuwa, murhangeri la chavaka Xikwembu wa le Israyele wa khale. U lerisiwile: “Buku ya nawu lowu yi nga ṭhuki yi v̌a kule ni nomu wa wena, kambe u yi anakanya v̌usiku ni nhlekanhi, u hiseka ku endla hikwaŝo le’ŝi ṭariweke kona, hi kona u nga ta kateka e tindleleni ta wena, u ta ṭaka.” (Yoxuwa 1:8) ‘Ku yi hlayela ehansi’ swi vula ku tihlayela marito lawa hi rito ra le hansi. Leswi swi pfuna ku tsundzuka, hikuva swi endla leswaku mhaka yi dzika emianakanyweni. Yoxuwa a fanele a hlaya Nawu wa Xikwembu “v̌usiku ni nhlekanhi,” kumbe nkarhi na nkarhi. Yoleyo a ku ri ndlela yo humelela ni yo tirha hi vutlhari eku hetisiseni ka vutihlamuleri lebyi a nyikiweke byona hi Xikwembu. Ku hlaya ko tano ka Rito ra Xikwembu nkarhi na nkarhi ku nga ku pfuna hi ndlela leyi fanaka.
7. Ha yini hi nga fanelanga hi titshega hi rivilo loko hi hlaya Rito ra Xikwembu?
7 U nga titshegi hi rivilo loko u hlaya Rito ra Xikwembu. Loko u hlele ku heta nkarhi wo karhi u ri karhi u hlaya Bibele kumbe buku yo karhi ya Vukreste, u fanele ku hlaya khwatsi. Leswi i swa nkoka ngopfu-ngopfu loko u hlaya hi xikongomelo xo tsundzuka tinhla ta nkoka. Naswona loko u hlaya, ehleketa swinene. Kambisisa marito ya mutsari wa Bibele. Tivutise, ‘Hi xihi xikongomelo xa mutsari? Xana ndzi nga ri tirhisa njhani rungula leri?’
8. Ha yini swi vuyerisa ku anakanyisisa loko hi hlaya Matsalwa?
8 Heta nkarhi u ri karhi u anakanyisisa loko u hlaya Matsalwa yo Kwetsima. Leswi swi ta ku pfuna ku tsundzuka timhaka ta Bibele ni ku tirhisa misinya ya milawu ya Matsalwa. Ku anakanyisisa hi Rito ra Xikwembu ivi xisweswo u tsundzuka tinhla emiehleketweni ya wena swi ta tlhela swi ku pfuna ku vulavula swi huma embilwini, u nyika vanhu lava vutisaka hi mbilu hinkwayo tinhlamulo leti kongomeke ematshan’weni yo vula swilo leswi u nga ta tisola endzhakunyana. Xivuriso lexi huhuteriweke hi Xikwembu xi ri: “Mbilu ya l’a lulameke yi anakanya ana a nga si hlamula.”—Swivuriso 15:28.
Hlanganisa Tinhla Letintshwa Ni Ta Khale
9, 10. Xana ku hlaya ka wena Bibele ku nga antswisiwa hi ndlela yihi hi ku hlanganisa tinhla letintshwa ta Matsalwa ni leti ana se u ti tivaka?
9 Vakreste vo tala va fanele va pfumela leswaku hi nkarhi wun’wana a va tiva switsongo hi Xikwembu, Rito ra xona ni swikongomelo swa xona. Hambiswiritano, namuntlha vatirheli lava va Vukreste va nga ku hlamusela ku sukela eku tumbuluxeni ni le ku weleni ka munhu exidyohweni, xikongomelo xa gandzelo ra Kreste, va nga ku byela ku lovisiwa ka mafambiselo lawa yo biha ya swilo, naswona va nga kombisa ndlela leyi vanhu lava yingisaka va nga ta katekisiwa ha yona hi vutomi lebyi nga heriki emisaveni ya paradeyisi. Leswi swi tano hakunene hikuva malandza lawa ya Yehovha ma amukele “ku tiv̌a ka Šikwembu” hi ku hlaya Bibele ni tibuku ta Vukreste. (Swivuriso 2:1-5) Hakatsongo-tsongo va hlanganise tinhla letintshwa leti va ti dyondzeke ni le ta khale leti ana se a va ti twisisa.
10 Ku hlanganisa tinhla letintshwa ta Matsalwa ni leti ana se a wu ti tiva swa pfuna naswona swa vuyerisa. (Esaya 48:17) Loko ku nyikeriwa milawu ya Bibele, misinya ya milawu kumbe hambi ku ri dyondzo leyi nga tolovelekangiki, swi hlanganise ni leswi ana se u swi tivaka. Twananisa rungula ra kona ni leswi u swi dyondzeke mayelana ni “ntila wa marito lama tiyeke ya xiviri.” (2 Timotiya 1:13) Lava rungula leri nga ha ku pfunaka ku tiyisa vuxaka bya wena ni Xikwembu, ku antswisa vumunhu bya wena bya Vukreste kumbe leri nga ta ku pfuna ku avela van’wana mintiyiso ya Bibele.
11. I yini leswi u nga ha swi endlaka loko u hlaya swin’wana leswi Bibele yi swi vulaka mayelana ni mahanyelo? Kombisa.
11 Loko u hlaya swin’wana leswi Bibele yi swi vulaka mayelana ni mahanyelo, ringeta ku twisisa nsinya wa nawu lowu katsekaka. Anakanyisisa ha wona, ivi u endla xiboho xa leswi a wu ta swi endla ehansi ka swiyimo leswi fanaka. Yosefa n’wana wa Yakobo, hi ku phindha-phindha u arile ku endla vunghwavava ni nsati wa Potifaro, a vutisa: “Nḍi nga endlisa ku yini ŝo biha le’ŝikulu ŝonghasi, nḍi dyohela Šikwembu šana?” (Genesa 39:7-9) Emhakeni leyi leyi khumbaka swinene, u kuma nsinya wa nawu wa xisekelo—vunghwavava i xidyoho eka Xikwembu. U nga ha hlanganisa nsinya lowu wa nawu emianakanyweni ni marito man’wana lama nga eka Rito ra Xikwembu, naswona u nga pfuneka hi ku ma tsundzuka loko u ringiwa leswaku u hlanganyela eka xidyoho xo tano.—1 Vakorinto 6:9-11.
Languta Swiendlakalo Swa Le Matsalweni Hi Tihlo Ra Mianakanyo
12. Ha yini u languta timhaka ta Bibele hi mahlo ya mianakanyo loko u ri karhi u ti hlaya?
12 Leswaku u dzikisa tinhla emianakanyweni ya wena loko u ri karhi u hlaya, languta leswi humelelaka hi tihlo ra mianakanyo. Hi mianakanyo vona ndhawu ya kona, makaya ni vanhu va kona. Twana marito ya vona. Twana nun’hwelo wa xinkwa lexi bakiwaka exitikweni. Endla swivono swi tlhela swi hanya. Kutani ku hlaya ka wena kahle ku ta va ntokoto lowu nyanyulaka, hikuva u nga ha vona muti wa khale, u tlhandlukela entshaveni leyi tlakukeke, u nga ha hlamarisiwa hi vuxongi bya ntumbuluko kumbe u hlangana ni vavanuna ni vavasati va ripfumelo lerikulu.
13. Xana a wu ta swi hlamusela njhani leswi tsariweke eka Vaavanyisi 7:19-22?
13 A hi nge u hlaya Vaavanyisi 7:19-22. Languta leswi humelelaka hi tihlo ra mianakanyo. Muavanyisi Gidiyoni ni vavanuna va Vaisrayele va vurhena va madzana-nharhu va yimile emakumu ka mixaxa ya Vamidiyani. I kwalomu ka awara ya khume ni vusiku, ka ha ku sungula “ku langutela ka v̌usiku le’byikulu.” Varindzi va Vamidiyani va ha ku fika, naswona munyama wu funengeta mixaxa ya valala va Vaisrayele lava etleleke. Languta! Gidiyoni ni mavuthu ya yena va hlomile hi tinanga. Va ni makhuwana lamakulu ya mati lama khubumetaka timboni leti va ti khomeke hi mavoko ya vona ya ximatsi. Xikan’we-kan’we, mintlawa yinharhu leyi wun’wana ni wun’wana wa yona wu nga ni vanhu va dzana yi ba tinanga ta yona, yi faya makhuwana, yi tlakusela timboni ta yona ehenhla, ivi yi huwelela yi ku: “Tlhari ra Yehova ni ra Gideon!” Languta mixaxa. Phela, Vamidiyani va baleka ivi va sungula ku huwelela! Loko mavuthu lawa ya madzana manharhu ma ya emahlweni ma ba tinanga ta wona, Xikwembu xi endla leswaku Vamidiyani va tlhavana. Vamidiyani va endliwe va baleka, naswona Yehovha u endle leswaku Israyele a hlula.
Ku Dyondza Tidyondzo Ta Nkoka
14. Xana Vaavanyisi ndzima 9 yi nga ha tirhisiwa hi ndlela yihi leswaku ku dyondzisiwa n’wana xilaveko xo titsongahata?
14 Hi ku hlaya Rito ra Xikwembu, hi nga dyondza tidyondzo to tala. Hi xikombiso, kumbexana u lava ku pfuna vana va wena leswaku va vona xilaveko xa ku titsongahata. Swi nga olova ku languta hi tihlo ra mianakanyo ivi u twisisa leswi vuriweke evuprofeteni bya n’wana wa Gidiyoni, ku nga Yohatama. Sungula ku hlaya eka Vaavanyisi 9:8. Yohatama u te: “[Siku rin’wana,] miri yi sukile ku ya tiv̌ekela hosi.” Murhi wa mutlhwari, wa nkuwa ni wa vhinyo yi arile ku fuma. Kambe ndzhenga lowu nga nyawuriki wu tsakele ku fuma. Loko se u hlayele vana va wena mhaka leyi va swi twa, u nga ha hlamusela leswaku swimilana swa nkoka a swi fanekisela vanhu lava fanelekaka lava a va nga lavi swikhundlha swa vuhosi ehenhla ka Vaisrayele-kulobye. Ndzhenga lowu a wu tirhiseriwa ngopfu tihunyi, a wu fanekisela vuhosi bya Abimeleke wo tikukumuxa, mudlayi loyi a a lava ku fuma van’wana kambe u fe hi ndlela leyi a yi hetisisa vuprofeta bya Yohatama. (Vaavanyisi, ndzima 9) Hi wihi n’wana loyi a ta lava ku kula ivi a fana ni ndzhenga?
15. Xana nkoka wa ku tshembeka wu kandziyisiwa hi ndlela yihi ebukwini ya Rhuti?
15 Nkoka wa ku tshembeka wu vekiwa erivaleni ebukwini ya Bibele ya Rhuti. A hi nge swirho swa ndyangu wa wena swa cincana hi ku hlayela mhaka yoleyo ehenhla ivi swi ringeta ku khoma leswi yi swi vulaka. Mi vona Rhuti wa Mumowabu a ya eBetlehema ni n’wingi wa yena Nawumi, la nga noni, naswona u twa Rhuti a ku: “Tiko ra wena ri ta v̌a tiko ra mina, Šikwembu ša wena ši ta v̌a Šikwembu ša mina.” (Rhuti 1:16) Rhuti wa migingiriko u voniwa a ri karhi a khwaja endzhaku ka vatshoveri ensin’wini ya Bowazi. U n’wi twa a ri karhi a n’wi bumabumela a ku: “Huv̌o hikwayo ya tiko ra mina yi tiv̌a leŝaku u nsati lo’nene.” (Rhuti 3:11) Ku nga ri khale, Bowazi u teka Rhuti. Hi ku pfumelelana ni lunghiselelo ra vukati bya sivara, hikwalaho ka Bowazi u velekela “Naomi” n’wana wa mufana. Rhuti u va kokwa wa xisati wa Davhida naswona eku heteleleni wa Yesu Kreste. Xisweswo u kume “hakelo le’yi hetisekeke.” Tlhandlakambirhi, lava hlayaka timhaka ta Matsalwa va dyondza dyondzo ya nkoka: Tshembeka eka Yehovha, kutani u ta hakeriwa hi laha ku fuweke.—Rhuti 2:12; 4:17-22; Swivuriso 10:22; Matewu 1:1, 5, 6.
16. Xana Vaheveru vanharhu va tshame va langutana ni ndzingo wihi, naswona mhaka leyi yi nga hi pfuna hi ndlela yihi?
16 Mhaka ya Vaheveru lava vuriwaka Xadraka, Mexaka na Abedi-Nego yi nga hi pfuna ku tshembeka eka Xikwembu eswiyin’weni leswi ringaka. Languta xiendlakalo hi mahlo ya mianakanyo loko Daniyele ndzima 3 yi ri karhi yi hlayeriwa ehenhla. Xifaniso lexikulu xa nsuku xi le rivaleni ra Dura, laha vatirhela-mfumo va Babilona a va hlengeletane kona. Loko va twa mpfumawulo wa swichayachayana, va wela ehansi ivi va gandzela xifaniso lexi Hosi Nebukadnetsara a xi yimiseke. Hi leswaku, hinkwavo va xi gandzela handle ka Xadraka, Mexaka na Abedi-Nego. Hi xichavo kambe hi xivindzi va byela hosi leswaku a va nge tirheli swikwembu swa yona ni ku gandzela xifaniso xa nsuku. Vaheveru lava lavatsongo va hoxiwa ekheleni ra ndzilo lowukulu. Kambe ku humelela yini? Loko yi languta endzilweni, hosi yi vona vavanuna va mune lava nga ni matimba, un’wana wa vona u “kotis[a] ṅwana wa ŝikwembu.” (Daniyele 3:25) Vaheveru lavanharhu va humesiwa ekheleni ra ndzilo, naswona Nebukadnetsara u dzunisa Xikwembu xa vona. A swi vuyerisa ku languta mhaka leyi hi tihlo ra mianakanyo. Naswona mawaku dyondzo leyi yi yi nyikelaka malunghana ni ku tshembeka eka Yehovha loko u ri endzingweni!
Ku Vuyeriwa Hi Ku Hlaya Bibele Tanihi Ndyangu
17. Hi ku komisa tshaha swin’wana swa swilo leswi vuyerisaka leswi ndyangu wa wena wu nga swi dyondzaka hi ku hlaya Bibele swin’we.
17 Ndyangu wa wena wu nga tiphina hi vuyelo byo tala loko mi heta nkarhi mi hlaya Bibele swin’we nkarhi na nkarhi. Ku sukela eka Genesa, u nga vona ntumbuluko hi tihlo ra mianakanyo ivi u langutisisa kaya ro sungula ra vanhu ra Paradeyisi. U nga hlanganyela mintokoto ya vapatriarka vo tshembeka ni mindyangu ya vona u tlhela u landzela Vaisrayele loko va ri karhi va tsemakanya Lwandle ro Tshwuka leri omisiweke. U nga vona murisi la nga mufana Davhida a hlula xihontlovila xa Mufilista, Goliyadi. Ndyangu wa wena wu nga vona ku akiwa ka tempele ya Yehovha eYerusalema, wu nga vona ku lovisiwa ka yona hi mavandla ya Babilona, naswona wu nga vona ku akiwa ka yona ehansi ka Mufumi Zerubabele. U nga twa xitiviso xa tintsumi xa ku velekiwa ka Yesu swin’we ni varisi va xiyimo xa le hansi ekusuhi na Betlehema. U nga kuma vuxokoxoko mayelana ni ku khuvuriwa ka yena ni vutirheli bya yena, u nga n’wi vona a nyiketa vutomi bya yena bya nyama tanihi nkutsulo, naswona u nga vona ntsako wa ku pfuxiwa ka yena. Lexi landzelaka, u nga famba na muapostola Pawulo ivi u vona ku simekiwa ka mavandlha loko Vukreste byi ri karhi byi engeteleka. Kutani, ebukwini ya Nhlavutelo, ndyangu wa wena wu nga tiphina hi xivono lexi hlamarisaka xa nkarhi lowu taka xa muapostola Yohane, ku katsa ni ku fuma ka Kreste ka Gidi ra Malembe.
18, 19. Hi swihi swiringanyeto leswi nyikeriwaka malunghana ni ku hlaya Bibele ka ndyangu?
18 Loko mi hlayela Bibele ehenhla tanihi ndyangu, yi hlayeni hi ndlela leyi twisisekaka na hi ku hiseka. Loko mi hlaya swiphemu swo karhi swa Matsalwa, xirho xin’we xa ndyangu—loko swi koteka tatana—xi nga ha hlaya marito ya xirungulwana. Van’wana va n’wina va nga teka swimunhuhatwa swo karhi swa vanhu va le Bibeleni, u hlaya swiphemu swa wena hi ntlhaveko lowu faneleke.
19 Loko mi hlanganyela eku hlayeni ka Bibele tanihi ndyangu, vuswikoti bya n’wina byo hlaya byi nga ha antswa. A swi kanakanisi leswaku vutivi bya n’wina bya Xikwembu byi ta engeteleka, naswona leswi swi fanele swi mi tshineta ekusuhi na xona. Asafa u yimbelerile: “Loko nḍi ri mina, ku ṭhinelela Šikwembu, i rifuwo ra mina. Nḍi v̌ekile v̌utšhav̌elo bya mina e ka Hosi Yehova, leŝaku nḍi ta amba mitiro ya wena hikwayo.” (Pisalema 73:28) Leswi swi ta pfuna ndyangu wa wena leswaku wu fana na Muxe, loyi a “tiyise[leke] onge hi loko a ri karhi a vona loyi a nga voniwiki,” ku nga, Yehovha Xikwembu.—Vaheveru 11:27.
Ku Hlaya Ni Vutirheli Bya Vukreste
20, 21. Xana ntirho wa hina wo chumayela wu yelana njhani ni vuswikoti bya hina byo hlaya?
20 Ku navela ka hina ku gandzela “loyi a nga voniwiki” ku fanele ku hi susumetela ku tirhela ku va vahlayi lavanene. Vuswikoti byo hlaya kahle byi hi pfuna ku veka vumbhoni lebyi humaka eRitweni ra Xikwembu. Entiyisweni swi hi pfuna leswaku hi ya emahlweni ni ntirho wo chumayela hi Mfumo lowu Yesu a leriseke valandzeri va yena ha wona loko a te: “Yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20; Mintirho 1:8) Ku nyikela vumbhoni i ntirho-nkulu wa vanhu va Yehovha, naswona vuswikoti byo hlaya byi hi pfuna ku wu hetisisa.
21 Ku laveka matshalatshala leswaku u va muhlayi lonene ni mudyondzisi la nga ni vutshila wa Rito ra Xikwembu. (Vaefesa 6:17) Kutani, ‘endla hi laha u nga kotaka ha kona leswaku u ta va la amukelekaka emahlweni ka Xikwembu, u dyondzisa rito ra ntiyiso hi ndlela leyinene.’ (2 Timotiya 2:15) Engetela vutivi bya wena bya Matsalwa ya ntiyiso ni vuswikoti bya wena tanihi Mbhoni ya Yehovha hi ku tinyiketela eku hlayeni.
Hi Tihi Tinhlamulo Ta Wena?
◻ Xana ntsako wu titshege hi ku hlaya Rito ra Xikwembu hi ndlela yihi?
◻ Ha yini u anakanyisisa hi leswi u swi hlayaka eBibeleni?
◻ Ha yini u tirhisa ku hlanganisa ni ku languta hi tihlo ra mianakanyo loko u hlaya Matsalwa?
◻ Hi tihi tidyondzo tin’wana leti nga ta dyondziwa eku hlayeni ka Bibele?
◻ Ha yini mi hlayela Bibele ehenhla tanihi ndyangu, naswona xana ku hlaya ku fambisana njhani ni vutirheli bya Vukreste?
[Swifaniso leswi nga eka tluka 13]
Loko mi hlaya Bibele tanihi ndyangu, langutani timhaka ta kona hi tihlo ra mianakanyo ivi mi anakanyisisa hi nkoka wa tona