Ntshembo Lowu Hlawulekeke!
“Un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.”—YOHANE 11:26.
1. Timiliyoni leti sweswi ti feke ti ta pfuxeriwa endhawini ya muxaka muni?
LOKO timiliyoni ti pfuxiwa eku feni, a ti nge pfuxeriwi emisaveni leyi nga riki na vanhu. (Mintirho 24:15) Va ta pfukela embangweni wo saseka lowunene naswona va ta kuma leswaku ndhawu yo tshama eka yona, swiambalo ni ndzalo ya swakudya, va lunghiseleriwe swona. I vamani lava nga ta endla malunghiselelo lawa hinkwawo? Swi le rivaleni leswaku ku ta va ku ri ni vanhu lava hanyaka emisaveni leyintshwa, loko ku pfuxiwa ka vanhu laha misaveni ku nga si sungula. Kambe i vamani lava nga ta va va hanya kona?
2-4. Hi wihi ntshembo lowu xiyekaka lowu yimeleke lava hanyaka “emasikwini yo hetelela”?
2 Ku hetiseka ka vuprofeta bya Bibele ku kombisa leswaku hi hanya “emasikwini yo hetelela” ya mafambiselo lawa ya swilo.a (2 Timotiya 3:1) Ku nga ri khale, Yehovha Xikwembu u ta nghenelela etimhakeni ta vanhu naswona u ta herisa vubihi emisaveni. (Pisalema 37:10, 11; Swivuriso 2:21, 22) Hi nkarhi wolowo, ku ta humelela yini hi lava tirhelaka Xikwembu hi ku tshembeka?
3 Yehovha a nge herisi ni lavo lulama, loko a herisa lavo biha. (Pisalema 145:20) A nga si tshama a endla mhaka ya muxaka wolowo, naswona a nge yi endli loko a susa vubihi hinkwabyo emisaveni. (Ringanisa Genesa 18:22, 23, 26.) Entiyisweni, buku yo hetelela ya Bibele yi vulavula hi “ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato,” wu huma “enhlomulweni lowukulu.” (Nhlavutelo 7:9-14) Ina, vunyingi lebyikulu byi ta pona nhlomulo lowukulu lowu eka wona ku nga ta herisiwa misava yo biha ya sweswi, naswona byi ta nghena emisaveni leyintshwa ya Xikwembu. Kwalaho, vanhu lava yingisaka va nga vuyeriwa hilaha ku teleke eka lunghiselelo leri hlamarisaka ra Xikwembu ro ntshunxa vanhu exidyohweni ni le ka rifu. (Nhlavutelo 22:1, 2) Xisweswo, “ntshungu lowukulu” a wu nge he boheki leswaku wu fa. Mawaku ntshembo wonghasi!
4 Xana hi nga va ni ripfumelo eka ntshembo lowu lowu hlamarisaka? Hakunene! Yesu Kreste u kombise leswaku ku ta va ni nkarhi lowu ha wona vanhu va nga ta hanya va nga ha fi. Emahlweni ka ku pfuxa munghana wa yena Lazaro, Yesu u byele Marta a ku: “Un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.”—Yohane 11:26.
Na Wena U Nga Hanya Hilaha Ku Nga Heriki
5, 6. Loko u swi lava ku hanya hilaha ku nga heriki eParadeyisini emisaveni, xana u fanele u endla yini?
5 Xana wa swi lava ku hanya hilaha ku nga heriki eParadeyisini emisaveni? Xana wa swi navela ku vona vanhu lava u va rhandzaka nakambe? Kutani u fanele u nghenisa vutivi lebyi kongomeke bya ku rhandza ka Xikwembu ni swikongomelo swa xona. Exikhongelweni lexi yaka eka Xikwembu, Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.
6 I ku rhandza ka Xikwembu leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Sweswi i nkarhi wo dyondza leswaku wena, swin’we ni timiliyoni ta van’wana leti ana se ti endlaka ku rhandza ka Xikwembu, mi nga swi kotisa ku yini ku hanya hilaha ku nga heriki eParadeyisini emisaveni. Timbhoni ta Yehovha ti nga swi tsakela ku ku pfuna leswaku u dyondza swo tala malunghana ni Xikwembu ni swilaveko swa xona. Ha yini u nga vulavurisani na tona eHolweni ya Mfumo leyi nga ekusuhi ni laha u tshamaka kona kumbe u tsalela eka adirese ya le kusuhi na wena eka leti xaxametiweke eka tluka leri landzelaka?
[Nhlamuselo ya le hansi]
a Vona buku leyi nge Vutivi Lebyi Yisaka eVuton’wini Lebyi Nga Heriki, matluka 98-107, leyi humesiweke hi Watchtower Bible and Tract Society of New York, Inc.
[Xifaniso lexi nga eka tluka 31]
“Ntshungu lowukulu” a swi bohi leswaku wu fa