Swivutiso Swa Vahlayi

◼ Ha yini Yesu a tshembise leswaku lava va vekaka ripfumelo eka yena ‘va nga ka va nga fi ni siku ni rin’we,’ kasi entiyisweni vayingisi va yena hinkwavo va file ke?—Yohane 11:25, 26.

Loko Yesu a vulavule hi ku nga fi, kumbe hi ku hanya hi laha ku nga heriki, entiyisweni a a nga vuli swona leswaku vayingisi va yena hi nkarhi wolowo a va nga ta tokota ku fa ka vumunhu. Yinhla leyikulu leyi Yesu a a yi endla a ku ri leswaku ku pfumela eka yena a ku ta yisa evuton’wini lebyi nga heriki.

Eka xikombiso xin’wana, Yesu u tivitana “vuswa bya vutomi.” Kutani u engeterile a ku: “Vuswa lebyi xikaka hi le tilweni hi byo byebyi, lebyi endlaka leswaku munhu loko a dya byona, a nga ka a nga fi. Hi mina vuswa lebyi hanyaka lebyi xikeke hi le tilweni. Loko munhu a dya vuswa bya kona, u ta hanya hi laha ku nga heriki.”—Yohane 6:48-51.

Hi ku languta marito wolawo ntsena, munhu a nga ha heta hi leswaku Yesu a a byela vayingiseri va yena leswaku va nga swi kota ku papalata ku tokota rifu. Hambi swi ri tano, mongo a wu xi seketeli xiboho xexo. Yesu a a ha ku: “Kutani ku rhandza ka La ndzi rhumeke hi loku: Hi leswaku ndzi nga lahli na un’we wa hinkwavo lava a ndzi nyikeke vona, kambe ndzi va pfuxa hi siku ra makumu. . . . Un’wana ni un’wana la langutaka N’wana, a va a pfumela eka yena, a va ni vutomi lebyi nga heriki, kutani mina ndzi ta n’wi pfuxa hi siku ra makumu. . . . A ku na munhu la nga taka ka mina, loko a nga kokeriwi ka mina hi tatana la ndzi rhumeke, kutani mina ndzi ta n’wi pfuxa hi siku ra makumu.” (Yohane 6:39-44) Naswona endzhakunyana u engeterile a ku: “Loyi a dyaka nyama yanga ni ku nwa ngati yanga, u ni vutomi lebyi nga heriki, kutani mina ndzi ta n’wi pfuxa hi siku ra makumu.” (Yohane 6:54) Hikwalaho, xitshembiso xa Yesu xa ‘ku hanya hi laha ku nga heriki’ xi nga ka xi nga twisisiwi hi laha ku yimelelekaka xi ri lexi vulaka leswaku vayingiseri va yena a va nga ta tokota rifu nikantsongo.

Xa fana ni xitshembiso xa Yesu lexi tivekaka swinene eka Marta lexi nge: “Hi mina ku pfuka ni vutomi; la pfumelaka eka mina, hambi a nga fa, u ta hanya, kutani un’wana ni un’wana la hanyaka, a va a pfumela eka mina, a nga ka a nga fi ni siku ni rin’we.” (Yohane 11:25, 26) Hi xikombiso, swi le rivaleni leswaku Yesu a a nga vuli swona leswaku vaapostola lava tshembekaka, a va nga ta fa ku fana ni vanhu van’wana. Ku nga si hela lembe, a va ta totiwa hi moya lowo kwetsima, naswona a va ta nyikiwa ntshembo wa ku fuma tanihi tihosi ematilweni. Leswaku va amukela hakelo yoleyo, a va fanele ku fa tanihi vanhu. (Varhoma 8:14-23; 1 Vakorinto 15:36-50) Naswona xiya leswaku Yesu a a te: “La pfumelaka ka mina, hambi a nga fa, u ta hanya.”

Xitshembiso xa Yesu xi ta hetiseka eka malandza lama tinyiketeke ya Xikwembu lawa ma hanyeke kutani ma fa nkarhi lowu vutomi lebyi nga heriki byi sungulaka ku nyikiwa ha wona wu nga si fika. Vanhu vo tano lava tshembekaka va rindzele ku pfuxiwa enkarhini lowu taka. Hi ku tshama va tshembekile endzhaku ka loko a pfuxiwile, va nge ri tokoti “rifu ra vumbirhi;” rifu ra makumu.—Nhlavutelo 20:15; 21:8; Yohane 8:51.

Kambe vuprofeta bya Bibele byi kombisa leswaku hina namuntlha hi na lunghelo leri hlawulekeke. Tanihi leswi hi hanyaka emakun’wini ya mafambiselo lawa ya swilo, hi nga ha pona ‘nhlomulo lowukulu’ lowu taka naswona hi hundzela emisaveni leyintshwa hi ku kongoma. Vanhu vo tano lava nga ni ntshembo wa vutomi lebyi nga heriki emisaveni ya paradeyisi ni lava va hlayisaka vutshembeki bya vona eka Xikwembu va nge boheki ku tokota rifu ra vumunhu nikantsongo. Loko va pone ‘nhlomulo lowukulu,’ va ta kongomisiwa “eswihlobyeni swa mati ya vutomi.”—Nhlavutelo 7:9-17.

[Xifaniso lexi nga eka tluka 31]

Marito ya Yesu eka Marta la nga nhlomulweni ya hi nyika ntshembo wa vutomi lebyi nga heriki