Ku Lunghiselela Tinkulumo Ta Le Vandlheni

NONGONOKO wa Xikolo xa Vutirheli bya le Tilweni wu endleriwe ku pfuna vandlha hinkwaro. Rungula ra nkoka ri tlhela ri nyikeriwa eminhlanganweni yin’wana ya vandlha, etinhlengeletanweni ni le mintsombanweni. Loko u averiwe nkulumo eka wun’wana wa minongonoko leyi, u nyikiwe vutihlamuleri lebyikulu. Muapostola Pawulo u khutaze Timotiya, mulanguteri la nga Mukreste, leswaku a nyikela nyingiso swinene eka ndlela leyi a dyondzisaka ha yona. (1 Tim. 4:16) Lava teke eminhlanganweni ya Vukreste va va va siye swin’wana leswaku va ta twa timhaka leti khumbaka vuxaka bya vona na Xikwembu—naswona van’wana a swi va olovelanga ku ta. Ku nyikela ndzetelo wo tano i lunghelo lerikulu swinene! Xana u nga swi kotisa ku yini ku byarha vutihlamuleri lebyi kahle?

Tinhla-nkulu Ta Nhlayo Wa Bibele

Nkulumo leyi ya xikolo yi huma eka nhlayo wa Bibele lowu averiweke vhiki rero. Ku fanele ku kandziyisiwa ndlela leyi rungula leri ri hi khumbaka ha yona namuntlha. Hilaha swi vikiweke hakona eka Nehemiya 8:8, Ezra ni vanghana vakwe a va hlaya Rito ra Xikwembu emahlweni ka vanhu, va ri hlamusela, ‘va endla leswaku ri twisisiwa,’ ri va erivaleni. Loko u averiwe ku nyikela tinhla-nkulu ta Bibele u ta kuma nkarhi wo endla sweswo.

Xana u nga xi lunghiselela njhani xiavelo lexi? Loko swi koteka, hlaya mhaka ya Bibele leyi u averiweke yona, ka ha sale vhiki kumbe ku tlula leswaku u yi nyikela. Kutani u anakanya hi vandlha ra ka n’wina ni swilaveko swa rona. Khongela hi mhaka leyi. Eka xiyenge xa Rito ra Xikwembu lexi u averiweke xona, xana ku ni ndzayo, swikombiso ni misinya ya milawu leyi nga tirhisiwaka eka swilaveko sweswo?

I swa nkoka ku endla ndzavisiso. Xana Watchtower Library leyi nga eka CD-ROM kumbe Watch Tower Publications Index, swi kona hi ririmi ra wena? Loko swi ri kona, swi tirhise. Loko wo endla ndzavisiso hi leswi swi kandziyisiweke malunghana ni tindzimana leti u hlawuleke ku ti hlamusela, u nga ha kuma rungula leri engetelekeke, nhlamuselo ya ku hetiseka ka vuprofeta, nhlamuselo ya leswi tindzimana tin’wana ti swi paluxaka malunghana na Yehovha kumbe nhlamuselo ya misinya ya milawu. U nga lweli ku hlanganisa tinhla to tala. Endla ndzavisiso wa tindzimana ti nga ri tingani leti u ti hlawuleke. Swa antswa ku hlanganisa tindzimana titsongo kambe u ti hlamusela kahle.

Xiavelo xa wena xi nga tlhela xi lava leswaku u rhamba vayingiseri leswaku va vula leswi va swi kumeke loko va hlaya Bibele vhiki rero. I yini leswi va swi kumeke leswi nga va pfunaka eka dyondzo ya vona ya munhu hi xiyexe ni ya ndyangu kumbe evutirhelini bya vona kumbe eka ndlela leyi va hanyaka ha yona? Hi tihi timfanelo ta Yehovha leti kombisiwaka hi ndlela leyi a tirhisaneke ni vanhu ni matiko ha yona? I yini leswi vayingiseri va swi dyondzeke leswi tiyiseke ripfumelo ra vona ni ku aka ku tlangela ka vona Yehovha? U nga heti nkarhi etimhakeni leti rharhanganeke. Kandziyisa nhlamuselo ni ndlela leyi tinhla leti u ti hlawuleke ti pfunaka ha yona.

Nkulumo Ya Ndzayo

Yona yi sekeriwe eka rungula leri kandziyisiweke, ku fana ni xihloko xa Xihondzo xo Rindza kumbe xa Xalamuka! kumbe xiyenge xo karhi xa buku. Hakanyingi rungula ri va ri tele ku tlula nkarhi lowu averiweke. Xana u fanele u yi veka njhani nkulumo leyi? U fanele ku yi veka tanihi mudyondzisi, ku nga ri tanihi munhu la lwelaka ku hlanganisa rungula ntsena. Mulanguteri u fanele “a fanelekela ku dyondzisa.”—1 Tim. 3:2.

Sungula ku lunghiselela ka wena hi ku hlaya rungula leri u averiweke rona. Pfula matsalwa u hlaya. Anakanyisisa. Ringeta ku endla sweswo siku ra nkulumo ya wena ra ha ri ekule. Tsundzuka leswaku vamakwerhu va khutaziwe ku hlaya rungula leri kandziyisiweke, leri nkulumo yi sekeriweke eka rona, ka ha ri emahlweni. Xiavelo xa wena a hi ku pfuxeta rungula leri kumbe ku ri komisa, kambe i ku kombisa ndlela yo ri tirhisa. Tirhisa swiyenge leswi faneleke swa rungula leri hi ndlela leyi nga ta vuyerisa vandlha.

Tanihi leswi n’wana un’wana ni un’wana a nga ni vumunhu byakwe, vandlha rin’wana ni rin’wana ri ni mboyamelo wa rona. Mutswari la dyondzisaka kahle a ngo byeletela n’wana wa yena ndlela leyi a faneleke a tikhoma ha yona. U kombisana ni n’wana wakwe. U ehleketa hi vumunhu bya n’wana ni swiphiqo leswi a lwisanaka na swona. Hi ndlela leyi fanaka, vadyondzisi evandlheni va lwela ku twisisa swilaveko swa ntlawa lowu va vulavulaka na wona. Hambiswiritano, mudyondzisi wa vuxiyaxiya u ta papalata ku tirhisa swikombiso leswi nga nyumisaka vayingiseri van’wana. U ta boxa ndlela leyi ana se hi vuyeriwaka ha yona hikwalaho ko famba endleleni ya Yehovha, naswona u ta kandziyisa ndzayo ya Matsalwa leyi nga ta pfuna vandlha leswaku ri langutana ni swiphiqo hi ndlela leyi humelelaka.

Ku dyondzisa lokunene ku khumba mbilu ya vayingiseri. Leswi a swi lavi leswaku munhu a boxa tinhla ntsena, kambe u fanele ku tlhela a pfuna vayingiseri leswaku va twisisa leswi tinhla leti ti vulaka swona. Swi lava leswaku a khathala swinene hi lava a va dyondzisaka. Varisi va moya va fanele va tiva ntlhambi. Loko vo tsundzuka swiphiqo leswi van’wana va langutanaka na swona, va ta swi kota ku vulavula hi ndlela leyi khutazaka, va kombisa ku twisisa, ntwela-vusiwana ni musa.

Hilaha vadyondzisi lava humelelaka va swi tivaka hakona, xikongomelo xa nkulumo xi fanele xi va erivaleni. Nkulumo yi fanele yi nyikeriwa hi ndlela leyi nga ta endla leswaku tinhla-nkulu ti va erivaleni naswona ti tsundzukiwa. Vayingiseri va fanele va tlhelela ekaya va ri ni tinhla leti nga ta va pfuna evuton’wini bya vona.

Nhlangano Wa Ntirho

Loko u nyikela nkulumo leyi xihloko xa yona xi humaka eka Vutirheli Bya Hina Bya Mfumo, timhaka ta cinca. Hakanyingi, eka yona u byeriwa leswaku u byela vayingiseri hinkwaswo leswi swi nga exihlokweni, a wu byeriwi leswaku u famba u hlawula tinhla leti faneleke ntsena. Pfuna vayingiseri leswaku va anakanyisisa hi matsalwa lama sekelaka ndzayo yihi na yihi leyi nyikeriwaka. (Tito 1:9) Nkarhi i wutsongo, hakanyingi a wu ku pfumeleli leswaku u engetela rungula rin’wana.

Hi hala tlhelo, u nga ha komberiwa leswaku u nyikela nkulumo kambe u nga nyikiwanga rungula ra kona eka Vutirheli Bya Hina Bya Mfumo. U nga ha komberiwa ku languta xihloko xo karhi xa Xihondzo xo Rindza, kumbe xiavelo xi nga ha va xi ri ni rungula ritsongo. Swi le ka wena tanihi mudyondzisi ku anakanya hi swilaveko swa vandlha malunghana ni nkulumo leyi u averiweke yona. U nga ha boheka ku tirhisa xifaniso xo koma lexi nga erivaleni kumbe u vula ntokoto lowu fanelaka. Tsundzuka leswaku xiavelo xa wena a hi xa ku vulavula hi rungula ntsena, kambe i xa ku veka mhaka hi ndlela leyi nga ta endla vandlha ri kota ku hetisisa ntirho lowu Rito ra Xikwembu ri wu lerisaka ni ku tiphina eku wu endleni.—Mint. 20:20, 21.

Loko u ri karhi u lunghiselela xiavelo xa wena, anakanya hi swiyimo swa lava nga kona evandlheni. Va bumabumele hi leswi ana se va swi endlaka. Xana ku tirhisa ka vona swiringanyeto leswi nyikeriweke eka rungula leri faneleke ri hlanganisiwa, ku nga va pfuna njhani leswaku va humelela ni ku kuma ntsako evutirhelini?

Xana xiavelo xa wena xi lava nkombiso kumbe mbulavurisano? Loko swi ri tano, u fanele u endla malunghiselelo ka ha ri ni nkarhi. Swi nga ha endleka u vona swi antswa ku kombela munhu un’wana leswaku a ku endlela malunghiselelo lawa, kambe hakanyingi sweswo a swi pfuni ngopfu. Loko swi koteka, pfuxeta nkombiso kumbe mbulavurisano siku ra nhlangano ri nga si fika. Tiyiseka leswaku xiphemu lexi xa nkulumo ya wena xi tameriwa hi ndlela leyi pfumelelanaka ni dyondzo leyi nyikeriwaka.

Tinhlengeletano Ni Mintsombano

Vamakwerhu lava vaka ni timfanelo letinene ta moya naswona va vaka swivulavuri swa le rivaleni ni vadyondzisi lava humelelaka, hi ku famba ka nkarhi va nga komberiwa ku nyikela tinkulumo eka nongonoko wa le nhlengeletanweni kumbe wa le ntsombanweni. Leyi i minkarhi yo hlawuleka hakunene ya dyondzo ya le tilweni. Xiavelo lexi xi nga ha va nkulumo yo hlaya kunene, nkulumo leyi lavaka ku lunghiseleriwa, swiletelo swa drama ya Bibele leyi kombisaka ndlela leyi yi tirhaka ha yona namuntlha kumbe tindzimana leti nga ni swiletelo. Loko u ri ni lunghelo ro hlanganyela eka nongonoko wo tano, ri hlaye kahle rungula leri u nyikiweke rona. Ri lunghiselele kukondza u vona ntikelo wa rona.

Lava va averiweke nkulumo yo hlaya, va fanele va hlaya rungula rero, rito hi rito. A va fanelanga va cinca marito kumbe ku cinca mhaka yi yima hi ndlela yin’wana. Va yi hlaya kukondza va swi vona kahle leswaku tinhla-nkulu hi tihi ni ndlela leyi ti hlamuseriweke ha yona. Va titoloveta nkulumo hi ku yi hlayela ehenhla kukondza va swi kota ku yi nyikela kahle, va kandziyisa marito, va hiseka ni ku khorwiseka swin’we ni ku va ni mpfumawulo wa rito lowu fanelaka ntshungu lowukulu.

Vamakwerhu lava averiweke nkulumo leyi lavaka ku lunghiseleriwa, va ni vutihlamuleri byo lunghiselela rungula hi ndlela leyi pfumelelanaka swinene ni phepha ra nkulumo. Ematshan’weni yo hlaya nkulumo tanihi leswi yi nga xiswona ephepheni, kumbe ku yi lunghiselela yi va nkulumo yo hlaya, xivulavuri xi fanele xi vulavula kunene, swi huma eka xona. I swa nkoka leswaku xi landzelela nkarhi lowu vekiweke ephepheni ra nkulumo leswaku xi ta kota ku yi andlala kahle yinhla-nkulu yin’wana ni yin’wana leyi kombisiweke. Xivulavuri xi fanele xi ma tirhisa kahle marito ni matsalwa lama kombisiweke ehansi ka tinhla-nkulu. A xi fanelanga xi nghenisa tinhla ta xona n’wini xi tshika leswi nga ephepheni ra nkulumo. Xisekelo xa dyondzo yoleyo i Rito ra Xikwembu. Vutihlamuleri bya vakulu lava nga Vakreste i ku “chumayela rito.” (2 Tim. 4:1, 2) Kutani ke, xivulavuri xi fanele xi nyikela nyingiso eka matsalwa lama nga eka phepha ra nkulumo—xi tirhisa wona ni ku kombisa ndlela leyi ma tirhaka ha yona.

U Nga Vi Ni Xinamu

Xana u le vandlheni leri eka rona u pfulekeriwaka hi minkarhi yo tala yo vulavula? U nga swi kotisa ku yini ku nyikela tinkulumo leti lunghiseleriweke kahle? Papalata ku lunghiselela tinkulumo ta wena nkarhi se wu fambile.

Tinkulumo leti vuyerisaka vandlha hakunene ti lava munhu a anakanya ha tona ka ha ri ni nkarhi. Kutani ke, titolovete ku hlaya rungula ra nkulumo hi ku hatlisa loko u kuma xiavelo xin’wana ni xin’wana. Leswi swi ta ku nyika nkarhi wo anakanyisisa ha yona loko u ri karhi u endla mintirho yin’wana. Eka masiku kumbe mavhiki lama ha saleke leswaku u nyikela nkulumo ya wena, u nga ha kuma tinhla leti ti nga ta ku pfuna leswaku u nyikela nkulumo ya wena hi ndlela leyinene. Ku nga ha humelela swilo leswi endlaka yi pfuna swinene enkarhini wolowo. Ku hlaya ni ku anakanyisisa hi nkulumo ya wena loko wa ha ku yi kuma swi dya nkarhi, kambe nkarhi lowu u ta va u wu tirhise kahle. Loko eku heteleleni u tshama ehansi u yi lunghiselela, u ta vuyeriwa hi leswi ana se u anakanyisiseke ha yona ka ha ri emahlweni. Ku lunghiselela xiavelo hi ndlela leyi swi ta hunguta ku karhateka naswona swi ta ku endla u nyikela nkulumo ya wena hi ndlela leyi pfunaka ni leyi fikelelaka timbilu ta lava va nga evandlheni.

Loko u yi tlangela swinene nyiko leyi u byarhisiweke yona malunghana ni nongonoko wa Yehovha wa ku dyondzisa vanhu vakwe, u ta n’wi dzunisa naswona u ta va nkateko eka lava va n’wi rhandzaka.—Esa. 54:13; Rhom. 12:6-8.