Matirhiselo Ya Xikurisa-rito

VAMAKWERHU lava nga Vakreste va tikarhata va heta nkarhi wo leha va ri eminhlanganweni ya Vukreste. Leswaku leswi swi vuriwaka swi kota ku va pfuna, va fanele va swi twa kahle.

Enkarhini wa Israyele wa khale, a ku nga ri na michini ya mpfumawulo. Loko Muxe a vulavula ni tiko ra Israyele eTimbaleni ta Mowabu emahlweni ka ku nghena ka vona eTikweni leri Tshembisiweke, xana vayingiseri vakwe lava a va hlayiwa hi timiliyoni va swi kotise ku yini ku twa rito rakwe? Swi nga endleka Muxe a tirhise vanhu van’wana lava yimeke etindhawini leti faneleke enxaxeni leswaku va phindha leswi a swi vuleke. (Det. 1:1; 31:1) Endzhakunyana ka loko Vaisrayele va sungule ku hlula tiko ra le vupela-dyambu bya Yordani, Yoxuwa u hlengelete tiko emahlweni ka Ntshava ya Gerizimu ni Ntshava ya Ebali, laha handle ko kanakana Valevhi a va ri enkoveni lowu hambanisaka tintshava leti. Kwalaho vanhu hinkwavo va twe mikateko ni mindzhukano leyi va hlamuseriweke yona, kutani vona va angula. (Yox. 8:33-35) Swi nga endleka ni laha ku tirhisiwe vanhu lava phindheke leswi a swi vuriwa, kambe handle ko kanakana ni ndhawu leyi hi yoxe yi pfunetile eku hundzisiweni ka ngulumelo wa mpfumawulo.

Endzhaku ka kwalomu ka malembe ya 1 500, loko “ntshungu lowukulu ngopfu wu [hlengeletanile]” eLwandle ra Galeliya leswaku wu yingisela Yesu, yena u khandziye byatso, a tlhentlha a siya ribuwa la ko taniya, kutani a tshamiseka a vulavula ni ntshungu. (Mar. 4:1, 2) Ha yini Yesu a vulavule a ri ebyatsweni? Handle ko kanakana hileswi rito ra munhu ri twakalaka swinene loko ri famba ehenhla ka vuandlalo bya mati yo rhula.

Ku ta fikela emasungulweni ya lembe-xidzana ra vu-20, hakanyingi nhlayo ya vayingiseri a yi pimiwa hi ku ya hi leswaku i vangani lava mpfumawulo wa rito ra xivulavuri ri nga fikelelaka etindleveni ta vona. Kambe ku sukela hi va-1920, malandza ya Yehovha ma kote ku tirhisa michini ya mpfumawulo emintsombanweni ya wona.

Muchini Wa Mpfumawulo. Muchini wo tano wu nga tlakusa rito ra xivulavuri swinene, kambe wu nga ri hundzuli rito ra xona. Xivulavuri a xi boheki ku vulavulela ehenhla ku tlula mpimo. Vayingiseri a va boheki ku kala va kanya mombo leswaku va twa leswi vuriwaka. Ku ri na sweswo va rhiya ndleve eka rungula leri nyikeriwaka.

Ku endliwe matshalatshala lamakulu leswaku ku tirhisiwa michini leyinene ya mpfumawulo emintsombanweni ni le tinhlengeletanweni ta Timbhoni ta Yehovha. Tlhandlakambirhi, Tiholo ta Mfumo to tala ti ni michini ya mpfumawulo leyi tlakusaka marito ya lava va nyikelaka tinkulumo, lava fambisaka minhlangano kumbe ku hlaya va ri exitejini. Naswona mavandlha man’wana ma ni swikurisa-rito leswi vayingiseri va swi tirhisaka loko va nyikela tinhlamulo hi nkarhi wa minhlangano. Loko vandlha ra ka n’wina ri ri na swona sweswo, dyondza ku swi tirhisa kahle.

Switsundzuxo Swa Nkoka. Leswaku u kota ku swi tirhisa kahle swilo leswi, tsundzuka tinhla leti landzelaka: (1) Xikurisa-rito hi ntolovelo xi fanele xi siye nomu wa wena hi kwalomu ka tisentimitara ta 10 ku ya eka 15. Loko xikurisa-rito xi ri kusuhi ngopfu na wena, rito ra wena ri ta twala ri ri ni mahlehleleti. Loko xi ri ekule ngopfu, rito ra wena ri ta twalela ekule. (2) Xikurisa-rito xi fanele xi va emahlweni ka wena, hayi etlhelo. Loko u yisa nhloko ya wena exineneni kumbe eximatsini, u fanele u vulavula loko nghohe ya wena yi kongomane na xikurisa-rito ntsena. (3) Vulavula hi rito leri tlakukekenyana ku tlula leri a wu ta vulavula ha rona loko u bula ni munhu. Kambe a swi kali swi lava ku vulavulela ehenhla ku tlula mpimo. Muchini wa mpfumawulo wu ta swi kota ku hundzisela rito ra wena ni le ka vayingiseri lava nga empfungwe. (4) Loko u lava ku basisa nkolo, ku khohlola kumbe ku entshemula, u nga endli tano u langutane ni xikurisa-rito.

Loko U Nyikela Nkulumo. Loko u ya etafuleni ra xivulavuri, hakanyingi ku ni makwerhu loyi a nga ta ku lulamisela xikurisa-rito xi va eka mpfhuka lowu faneleke. Loko a ri karhi a endla tano, yima kahle u languta vayingiseri. Veka tinotsi ta wena etafuleni ra xivulavuri, u tiyiseka leswaku xikurisa-rito a xi ku sirhi.

Loko u sungula ku vulavula, yingisela ndlela leyi rito ra wena ri twalaka ha yona loko ri huma eka swipikara. Xana mpfumawulo wa kona wu le henhla ngopfu, kumbe xana marito man’wana ma ni mahlehleleti? Swi nga lava leswaku u ya endzhakunyana hi tisentimitara ta 2,5 ku ya eka 5. Loko u languta tinotsi ta wena, tsundzuka leswaku u fanele u vulavula ni ku hlaya loko u kongomane na xikurisa-rito ntsena kumbe xikurisa-rito xi ri ehansinyana ka nomu, hayi ehenhla ka wona.

Loko U Hlaya U Ri eXitejini. I swinene ku tlakusa Bibele ya wena kumbe buku leswaku u kota ku languta vayingiseri. Tanihi leswi hi ntolovelo xikurisa-rito xi nga ta va emahlweni ka wena hi ku kongoma, swi nga ha lava leswaku u khomela leswi u swi hlayaka etlhelonyana. Leswi swi vula leswaku nhloko ya wena yi ta languta etlhelonyana ka xikurisa-rito. Kutani loko u hlaya, rito ra wena ri ta kongoma eka xikurisa-rito.

Vamakwerhu vo tala lava hlayaka eDyondzweni ya Xihondzo xo Rindza va yima va hlayela eka xikurisa-rito lexi va kongomeke. Sweswo swi va pfumelela ku hefemula ni ku hlaya hi ku ntshunxeka. Tsundzuka leswaku ku hlayiwa ka tindzimana i nchumu wa nkoka enhlanganweni. Vayingiseri va ta pfuneka swinene loko va kota ku twa rungula leri hlayiwaka.

Loko U Hlamula eNhlanganweni. Loko vayingiseri va hlamula hi ku tirhisa swikurisa-rito evandlheni ra ka n’wina, tsundzuka leswaku wa ha fanele u vulavula swi twala hi rito leri ringaneke. Loko u nyikela nhlamuselo, ringeta ku tlakusa nkandziyiso lowu mi wu dyondzaka kumbe Bibele ya wena. Sweswo swi ta ku pfuna ku vona rungula ra kona kahle, kasi u ta kota ni ku vulavulela eka xikurisa-rito hi ku kongoma.

Emavandlheni man’wana vamakwerhu va averiwa ku yisa swikurisa-rito eka lava va nyikelaka tinhlamulo. Loko swi ri tano evandlheni ra ka n’wina, loko u komberiwa ku hlamula, tshama u yimise voko leswaku makwerhu loyi a fambisaka xikurisa-rito a ta vona lomu u tshameke kona kutani a hatla a fika eka wena. Loko xikurisa-rito xi lava ku khomiwa hi voko, tshambuluta voko u xi amukela. U nga sunguli ku vulavula loko xikurisa-rito xi nga si ku kongoma kahle. Loko u hete ku nyikela nhlamulo, hatlisa u tlherisa xikurisa-rito.

Loko U Hlanganyela eNkombisweni. Ku tirhisa xikurisa-rito hi nkarhi wa nkombiso swi lava leswaku u rhanga u ehleketa kahle. Loko xikurisa-rito xi tlhomiwe enkotlotweni wa xona, mavoko ya wena ma ta kota ku khoma Bibele ni tinotsi. Ku tirhisa xikurisa-rito lexi lavaka ku khomiwa hi voko swi nga ku nyika ntshunxeko lowukulu wa ku tshukatshukisa miri, kambe swi nga lava leswaku u kombela loyi u endlaka na yena nkombiso a ku khomela xona. Xisweswo u ta kota ku pfula Bibele ya wena. Wena ni loyi u vulavulaka na yena mi fanele mi titoloveta ku endla tano leswaku a tiva ndlela leyinene ya ku xi khoma. Nakambe tsundzuka leswaku loko u ri exitejini, u nga tshuki u fularhela vayingiseri, ngopfu-ngopfu loko u vulavula.

Eka minkombiso ya Nhlangano wa Ntirho, ku nga va ni vo talanyana lava hlanganyelaka, naswona va nga famba-famba exitejini. Kutani ku nga laveka swikurisa-rito swo hlayanyana. Swi fanele swi vekiwa exitejini ka ha ri emahlweni kumbe swi nyikiwa lava endlaka nkombiso loko va ya exitejini. Leswaku swikurisa-rito swi va endhawini leyi faneleke hi nkarhi lowu faneleke, swi lava ku lulamisiwa ka ha ri na nkarhi. Ku pfuxeta minkombiso emahlweni ka ku yi endla hi xiviri swi ku nyika nkarhi wa ku dyondzisa lava nga ta hlanganyela leswaku va swi tirhisa kahle swikurisa-rito. Loko lava nga ta tirhisiwa va nga titoloveti nkombiso exitejini, swi nga va swinene loko va khoma nchumu wo ringana ni xikurisa-rito leswaku va titoloveta ku xi khoma kahle. Endzhaku ka nkombiso, lava hlanganyeleke eka wona va fanele va veka swikurisa-rito swa voko kahle, va vona leswaku va nga haki tintambhu tin’wana ta swikurisa-rito hi milenge loko va suka exitejini.

Ku khathala swinene hi matirhiselo ya swikurisa-rito swi fambisana ni xin’wana xa swikongomelo-nkulu swa minhlangano ya hina, ku nga ku pfunana hi ku bula hi Rito ra Xikwembu. (Hev. 10:24, 25) Loko hi dyondza ku tirhisa swikurisa-rito hi ndlela leyinene, na hina hi nga hoxa xandla eku fikeleleni ka xikongomelo lexi xa nkoka.