Nhlangano Wa Ntirho Wu Hi Lulamisela Ntirho Wun’wana Ni Wun’wana Lowunene
1 Xikongomelo xa Nhlangano wa Ntirho i ku hi khutaza ni ku hi hlomisela ku hlanganyela hi laha ku engetelekeke entirhweni wo chumayela ni ku endla vadyondzisiwa. (2 Tim. 3:17) Hambi swi ri tano, loko hi nga wu lunghiseleli kahle nhlangano kumbe hi tsandzeka ku tirhisa leswi hi swi dyondzaka, a hi nge pfuneki ngopfu.
2 Ku lunghiselela ka ha ri emahlweni swi ta ku pfuna leswaku u kuma ndzetelo hi vutalo. Languta minkandziyiso leyi nga ta tirhisiwa ivi u ta na yona leswaku u ta fambisana ni xivulavuri laha xi kombetelaka kona u tlhela u kota ku va ni xiphemu. Vana muyingiseri la xalamukeke naswona u tsala tinhla leti u nga ta ti tirhisa.
3 Mulanguteri la ungamelaka u kambela swiphemu leswi hleriweke swa nhlangano hi vukheta. Vakulu ni malandza ya vutirheli lava nga ni vuswikoti, lava fanelekaka, va averiwa swiphemu leswi leswaku va swi lunghiselela. (om-TS tl. 70) Mavandlha lama nga ni vakulu ni malandza ya vutirheli lama nga riki mangani, ma nga ha avela vamakwerhu van’wana lava fanelekaka leswaku ma va pfuna. (km 12/76, Bokisi Ra Swivutiso) Xivulavuri xin’wana ni xin’wana xi fanele xi lunghiselela kahle, xi namarhela nkongomiso lowu nyikeriweke naswona xi tiyiseka leswaku a xi heti nkarhi.
4 Hi xitalo nhlangano wu sungula hi switiviso. Makwerhu la averiweke xiphemu lexi u fanele a tihlanganisa ni mulanguteri la ungamelaka ka ha ri emahlweni a ta tiva leswaku i timhaka tihi leti ti faneleke ku tivisiwa. Leswi swi nga ha katsa mapapila lama humaka eka Sosayiti kumbe switsundzuxo hi malunghiselelo ya vutirheli kumbe swiviko swa n’hweti na n’hweti. Hi nga ha twa leswaku ku na lava va vabyaka lava lavaka ku endzeriwa kumbe hi twa hi vuxokoxoko bya mintirho ya vandlha leyi kunguhateriweke nkarhi lowu taka. Rhiyani ndleve eka leswi mi byeriwaka swona naswona mi tilulamisela ku endla xiphemu xa n’wina.
5 Loko xiphemu xa nhlangano xi lava ku hlanganyela ka vayingiseri, lunghiselela hi ku hlaya mhaka ni ku languta matsalwa. Ehleketa hi ndlela leyi u kunguhataka ku tirhisa swiringanyeto ha yona ni ndlela leyi u nga hlamuselaka ha yona ku khutaza van’wana. U nga ha kombisa nkoka lowu tirhaka wa vuleteri byebyo hi ku vula ntokoto wo koma.
6 Loko ku ri ni nkombiso, ringeta ku tivona u ri eka swiyimo leswi fanaka ivi u ehleketa hi leswi a wu ta swi vula. Xiya swivangelo leswi nyikeriwaka ni tinhlamulo ta kona. Ringeta ku titsundzuxa leswi u tshameke u swi vula loko u ri eka xiyimo lexi fanaka naswona u xiya ndlela leyi tinhla leti nyikeriweke ti nga ku pfunaka ha yona ku va ni vuyelo lebyi antswaka enkarhini lowu taka.
7 Lava va hlanganyelaka enkombisweni ni le ka mimbulavurisano va fanele va kamberiwa kahle ka ha ri ni nkarhi. Un’wana ni un’wana u fanele a swi tiva leswi a nga ta swi vula ni leswi a faneleke a swi endla epulatifomo. Hakanyingi swiphemu leswi nga pfuxetiwangiki a swi susumeti kumbe ku khutaza vayingiseri. Van’wana lava nga ni xiphemu va lunghiselela ku kambela xiphemu xa vona emakumu ka Dyondzo ya Xihondzo xo Rindza leswaku va ta titoloveta xona epulatifomo ni ku endla leswaku vamakwerhu lava khomaka swikurisa-marito va ta swi tiva leswaku va fanele va endla yini.
8 Minkarhi yin’wana nongonoko wu ta katsa nkulumo leyi khumbanaka ni xilaveko xo karhi xa vandlha kumbe xihloko xa Xihondzo xo Rindza lexi fikeke hi nkarhi. Yingiserisisa, ehleketisisa hi xitsundzuxo naswona u ringeta ku xi tirhisa.
9 Hi lava ku “[lunghekela] ntiro wuṅwana ni wuṅwana lo’wunene.” (2 Tim. 2:21) Nhlangano wa Ntirho hi rin’wana ra malunghiselelo lawa Yehovha a ma tirhisaka ku hi pfuna ku endla tano. Ku hlanganyela hi ku tshembeka ni ku endla matshalatshala lamanene yo tirhisa leswi hi swi dyondzaka hakunene swi ta hi pfuna leswaku hi kota ku ‘hetisisa vutirheli bya hina.’—2 Tim. 4:5.