Swiletelo Swa Lava Nyikelaka Tinkulumo Ta Nhlangano Wa Ntirho

Ku sukela eka nkandziyiso lowu wa Vutirheli Bya Hina Bya Mfumo, xiyenge xa xiyimiso xa Nhlangano wa Ntirho xi ta antswisiwa. Swiletelo ni switsundzuxo leswi landzelaka swi ta antswisa leswi nga tshama swi huma eka xihloko lexi nge “Ndlela Yo Lunghiselela Nhlangano Wa Ntirho,” eka Vutirheli Bya Hina Bya Mfumo bya May 2009.

◼ Nkulumo: Xivulavuri xi nyikela rungula ra nkulumo leyi, handle ko va vayingiseri va hlanganyela. Xi fanele xi dzika eka leswi nga ta vuyerisa vandlha.

◼ Bulo Ra Swivutiso Ni Tinhlamulo: Xiyenge lexi xi fambisiwa ku fana ni Dyondzo ya Xihondzo xo Rindza, xi ni xingheniso xo koma ni mahetelelo yo koma. Ku fanele ku vutisiwa swivutiso hinkwaswo. Loyi a nyikelaka nkulumo leyi a nga fanelanga a vulavula ngopfu. Loko nkarhi wu pfumela ku nga ha hlayiwa man’wana ya Matsalwa lama kombisiweke. Tindzimana a ti fanelanga ti hlayiwa, handle ka loko swiletelo swi vule tano.

◼ Bulo Ni Vayingiseri: Xiyenge lexi xi ta nyikeriwa ku fana ni nkulumo, kambe xivulavuri xi ta pfa xi nyika vayingiseri nkarhi wa leswaku na vona va hlanganyela eka leswi ku buriwaka ha swona.

◼ Minkombiso Ni Mimbulavurisano: Loko makwerhu a averiwe nkulumo leyi eka yona ku faneleke ku va ni nkombiso, u fanele a tiyiseka leswaku wu va kona; naswona a hi yena la faneleke a endla nkombiso wa kona. U fanele a hlawula vahuweleri lava nga ni vuswikoti naswona va nga swikombiso leswinene. Loko swi koteka, u fanele a hlela na vona ka ha ri ni nkarhi. I swinene ku tirhisa vahuweleri lavantshwa kumbe lava nga riki na ntokoto leswaku va kombisa ndlela leyi leswi swi nga endliwaka ha yona naswona va kuma lunghelo ro va eplatifomo, hambileswi van’wana va nga ha tirhisiwaka tanihi vini va miti. Vahuweleri lava endlaka nkombiso va fanele va languta vayingiseri. Lava ku burisaniwaka na vona va fanele va va va ri eplatifomo. Minkombiso ni mimbulavurisano swi fanele swi kamberiwa ka ha ri emahlweni. Loko nkarhi wa minhlangano se wu hundza, makwerhu u fanele a komisa nkulumo yakwe leswaku a ta kota ku endla minkombiso ni mimbulavurisano. Malandza ya vutirheli ma fanele ma vulavurisana ni muhlanganisi wa huvo ya vakulu kumbe nkulu un’wana loko ma nga si hlawula lava nga ta va tirhisa.

Loko nkulumo yo karhi yi ri ni swiletelo swo hlawuleka, swi fanele swi landzeriwa. Loko vamakwerhu va nyikela tinkulumo ta Nhlangano wa Ntirho hilaha swi hlamuseriweke hakona laha henhla, sweswo swi ta endla leswaku Nhlangano wa Ntirho wu “[endliwa] hi ku tenga ni hi ku hleleka.”—1 Kor. 14:40.