Bokisi Ra Swivutiso

◼ Xana hi nga endla yini leswaku hi hlayisa nkarhi eminhlanganweni ya vandlha?

Nkarhi wu famba hi ku hatlisa loko hi ri ni swilo leswinene swa ku swi byela vamakwerhu. Leswi swi endla leswaku minkarhi yin’wana swi tika ku hlayisa nkarhi lowu vekiweke loko hi nyikela tinkulumo. I yini lexi xi nga hi pfunaka?

Sungulani hi nkarhi. Loko ku ri nhlangano wa vandlha hinkwaro, swi nga va swinene ku kombela vayingiseri leswaku va tshamiseka ka ha sele minete yin’we kumbe timbirhi, leswaku minhlangano yi ta sungula hi nkarhi lowu vekiweke, hi ndlela leyi hlelekeke. (Ekl. 3:1) Eka minhlangano leyi katsaka mintlawa leyitsongo, yo tanihi nhlangano wa ntirho wa nsimu, a swi fanelanga leswaku ku tshikiwa nkarhi wu hundza ka ha rindziwe lava va hlwelaka ku fika.

Lunghiselela kahle. Lexi pfunaka swinene eku hlayiseni ka nkarhi i ku lunghiselela ka ha ri emahlweni. Xi tive kahle xikongomelo xa nkulumo ya wena. Hlawula tinhla-nkulu naswona u ti veka erivaleni. U nga pfumeli leswaku tinhla leti nga nyawuriki ti ku dyela nkarhi. Nkulumo ya wena a yi olove, yi nga rharhangani. Loko nkulumo ya wena yi ri ni minkombiso kumbe mimbulavurisano, yi pfuxete ka ha ri emahlweni. Loko swi koteka, tikambele loko wa ha titoloveta, ku vona loko u ta swi kota ku hlayisa nkarhi.

Pandzelela nkulumo ya wena. Hambi xiavelo xa wena i xa nkulumo kumbe i xa ku vulavurisana ni vayingiseri, swi ta ku pfuna swinene loko wo pandzelela rungula ra wena ri va swiyenge-yenge. Tivekele nkarhi lowu u nga ta wu heta eka xiyenge xin’wana ni xin’wana kutani nkarhi wa kona u wu tsala etlhelo ka rungula ra kona. Loko u ri karhi u nyikela nkulumo ya wena, xiya nkarhi wa wena. Loko u burisana ni vayingiseri, papalata ku teka tinhlamulo ta vanhu vo tala loko wa ha sungula lerova u tikuma se u tsutsuma swinene loko u fika eka rungula ra nkoka leri nga eku heleni ka xihloko. Vafambisi va Dyondzo ya Xihondzo xo Rindza va fanele va siya nkarhi wa bokisi ra mpfuxeto eku heleni ka dyondzo. Nakambe a va fanelanga va dya nkarhi lowu vekeriweke risimu ni xikhongelo xo pfala.

Heta hi nkarhi. Loko nhlangano wu ri ni tinkulumo to hlayanyana, ku fana ni Nhlangano wa Ntirho, xivulavuri xin’wana ni xin’wana xi fanele xi xiya leswaku nkulumo ya xona yi sungula rini ni leswaku yi fanele yi hela rini. Ku fanele ku endliwa yini loko nhlangano wu ri endzhaku hi nkarhi? Makwerhu kumbe vamakwerhu va nga ha londzovota nkarhi hi ku boxa tinhla-nkulu ntsena kutani va tshika vuxokoxoko byin’wana. Mudyondzisi la nga ni vutshila, u vonaka hi ku kota ku endla leswi.

Tanihi vayingiseri, hi nga pfuna makwerhu la fambisaka dyondzo hi ku komisa loko hi hlamula, hi ba nhloko ya mhaka. Hinkwerhu ka hina hi nga hoxa xandla eku endleni ka leswaku minhlangano yi famba “hi ku tenga ni hi ku hleleka.”—1 Kor. 14:40.