Nkulumo Leyi Namarhelaka Nkarhi, Leyi Xiyenge Ha Xin’we Xi Nyikiweke Nkarhi Wa Xona

HAMBILESWI u faneleke u kandziyisa mongo wa leswi u swi dyondzisaka, ku pima nkarhi wa nkulumo ya wena swi lava nyingiso. Minhlangano ya hina yi hleriwe leswaku yi sungula ni ku hela hi nkarhi wo karhi. Ku fikelela swilaveko leswi, swi lava leswaku un’wana ni un’wana la nga ni nkulumo a va ni ntirhisano.

Ndlela leyi vanhu a va hanya ha yona eminkarhini ya Bibele, yi hambane ngopfu ni ya le tindhawini to tala namuntlha. Loko munhu a lava ku vula nkarhi, a a tirhisa marito yo tanihi lama nge, “kwalomu ka awara ya vunharhu” kumbe “kwalomu ka awara ya vukhume.” (Mat. 20:3-6; Yoh. 1:39) A va nga tali ku tikarhata hi ku hlayisa nkarhi loko va endla mintirho ya siku na siku. Ematikweni man’wana, ni namuntlha vanhu a va tikarhati hi ku hlayisa nkarhi.

Kambe niloko vanhu lava hi tshamaka na vona va nga ri na mhaka na nkarhi kumbe wena u nga ri na mhaka na wona, u nga vuyeriwa loko wo wu xixima. Loko vanhu vo talanyana va ri na tinkulumo enhlanganweni, ku fanele ku xiyiwa nkarhi lowu vekeriweke xiyenge xin’wana ni xin’wana. Nsinya wa nawu lowu nge “swilo hinkwaswo a swi endliwe hi ku tenga ni hi ku hleleka,” wu nga tirhisiwa loko hi pima nkarhi wa swiavelo swa hina.—1 Kor. 14:40.

Ndlela Yo Namarhela Nkarhi. Ku lunghiselela hi xona xilotlelo xa kona. Hakanyingi, swivulavuri leswi nga na xiphiqo xo hlayisa nkarhi swi va swi lo tsandzeka ku lunghiselela kahle. Swi nga ha va swi titshemba ku tlula mpimo. Kumbe swi nga ha tshika ku lunghiselela ka ha ri ni nkarhi kukondza siku ri fika. Ku tlangela xiavelo xa wena ni ku lunghiselela hi mbilu hinkwayo swi ta ku pfuna leswaku u namarhela nkarhi.

Xana nkulumo ya wena i yo hlaya? Xo sungula, pfuxeta Dyondzo 4 ku ya ka 7, leti vulavulaka hi ku hlaya hi ku khuluka, ku koka moya, ku kandziyisa mongo ni ku kandziyisa tinhla-nkulu. Kutani hlayela nkulumo ya wena ehenhla, u ri karhi u tirhisa ndzayo yoleyo. Languta leswaku swi ku tekela nkarhi wo tani hi kwihi. Xana swi lava u hlaya hi ku hatlisa leswaku u ta heta hi nkarhi lowu u nyikiweke wona? Engetela rivilo eka swiyenge leswi nga riki swa nkoka ngopfu, kambe u hambeta u koka moya ni ku hunguta rivilo loko u kandziyisa tinhla ta nkoka. Yi hlaye hi ku phindha-phindha. Loko u ya u swi kota ku hlaya hi ku rhelela, u ta swi kota ku endla nkulumo ya wena yi va ya mpimo lowu faneleke.

Xana leswi u nga ta swi vula swi ta va swi tsariwe ehansi? A swi bohi leswaku u tsala tinotsi to leha—lerova ku va muwangawanga—leswaku u ta hlayisa nkarhi. Loko u tirhela eka Dyondzo 25, u dyondze ndlela yo antswa. Tsundzuka tinhla leti ta ntlhanu: (1) Lunghiselela nkulumo ya kahle, kambe u nga vi na rungula ro tala. (2) Tiva tinhla-nkulu hi nhloko, kambe u nga mukisani ni swiga hinkwaswo u swi nhlokohata. (3) Tsala nkarhi lowu u nga ta wu tirhisela xiphemu xin’wana ni xin’wana ephepheni ra nkulumo ya wena, kumbe nkarhi lowu swi nga ta ku tekela wona ku fika eka yinhla yo karhi. (4) Loko u lunghiselela, xiya leswaku i rungula rihi leri u nga ri siyaka loko u tikuma se u siyiwe hi nkarhi lowu u vekeriweke wona. (5) Titolovete nkulumo ya wena.

I swa nkoka ku yi phindha-phindha. Loko u ri karhi u hlaya u vuyelela, languta nkarhi lowu u wu vekeleke xiyenge ha xin’we xa nkulumo ya wena. Phindha-phindha nkulumo ya wena ko tala kukondza nkulumo hinkwayo yi ringana nkarhi lowu yi nyikiweke wona. U nga nghenisi rungula ro tala. Siya nkarhi wo karhi, hikuva loko u vulavula emahlweni ka vayingiseri nkarhi wa wena wu nga ha dyiwa hi swin’wana.

Pima Nkarhi Wa Swiyenge. Ku namarhela nkarhi swi fambisana ni ku pima nkarhi wa swiyenge swa nkulumo. Nkarhi wo tala wu fanele wu tirhiseriwa miri wa nkulumo. Miri wa nkulumo hi wona wu khomeke tinhla-nkulu. Xingheniso xi fanele xi leha kahle leswaku xi ta fikelela tipakani tinharhu leti ku vulavuriwaka ha tona eka Dyondzo 38. Miri wa nkulumo wu fanele wu nga lehi ngopfu lerova mahetelelo ma sala ma nga ri na nkarhi lowu eneleke, hi ku pfumelelana ni Dyondzo 39.

Matshalatshala ya wena yo namarhela nkarhi ma ta endla leswaku u nyikela nkulumo ya kahle, naswona swi ta komba leswaku u xixima van’wana lava na vona va nga na tinkulumo siku rero, swin’we ni vandlha hinkwaro.