Ndlela Yo Lunghiselela Nhlangano Wa Ntirho
1. Hi xihi xikongomelo xa Nhlangano wa Ntirho naswona i yini leswi hi nga swi endlaka leswaku hi vuyeriwa hi xitalo?
1 Nhlangano wa Ntirho wu endleriwe ku hi pfuna leswaku hi va ni vuyelo lebyinene ensin’wini. Nhlangano lowu wu dzike ngopfu eka ku chumayela mahungu lamanene ya Mfumo, ku endla vadyondzisiwa ni ku twarisa siku ra Xikwembu ra ku avanyisa leri nga ekusuhi swinene. (Mat. 28:19, 20; Mar. 13:10; 2 Pet. 3:7) Hi vuyeriwa ngopfu eka nhlangano lowu wa nkoka loko hi wu lunghiselela kahle naswona hi lunghekela ku hlamula.
2. Hi nga tilunghiselela njhani leswaku hi ta yingisela nkulumo?
2 Nkulumo: Hakanyingi rungula ra nkulumo leyi nyikeriwaka eka Nhlangano wa Ntirho ri va ri ri eka xiyimiso lexi nyikaka xivulavuri swiletelo. U nga ha pfuxeta rungula ra kona ku katsa ni matsalwa lama tshahiweke naswona u anakanyisisa hi ndlela leyi u nga ri tirhisaka ha yona rungula rero loko u ri ensin’wini.
3. I yini leswi hi nga swi endlaka loko hi lunghiselela nkulumo leyi katsaka bulo ra swivutiso ni tinhlamulo?
3 Bulo Ra Swivutiso Ni Tinhlamulo: Xiyenge lexi xi fambisiwa ku fana ni dyondzo ya Xihondzo xo Rindza, xi ni xingheniso xo koma naswona xi ni mahetelelo yo koma. Khwatihata tinhla-nkulu eka ndzimana yin’wana ni yin’wana naswona u tiyimisela ku nyikela tinhlamulo leti nga ta kandziyisa tinhla leti ku buriwaka ha tona.
4. Hi nga yi lunghiselela njhani nkulumo leyi katsaka ku bula ni vayingiseri?
4 Bulo Ni Vayingiseri: Xiyenge lexi xi ta nyikeriwa ku fana ni nkulumo, kambe xivulavuri xi ta pfa xi nyika vayingiseri nkarhi wa leswaku na vona va hlanganyela eka leswi ku buriwaka ha swona. Loko u funghe tinhla-nkulu ni ku kambisisa matsalwa lama tshahiweke swi ta ku olovela ku hlamula loko ku vutisiwa swivutiso. Makwerhu loyi a nga ta fambisa xiyenge lexi u ta kombela vayingiseri leswaku va hlamula swivutiso swo karhi leswaku tinhla-nkulu ti hlanganisiwa hinkwato.
5. I yini leswi hi nga swi endlaka leswaku hi vuyeriwa swinene loko ku endliwa minkombiso?
5 Minkombiso: Swiyenge swin’wana swi katsa ni minkombiso leyi kombisaka ndlela leyi rungula leri ku buriwaka ha rona mi nga ri tirhisaka ha yona ensin’wini ya n’wina. Eka minkombiso ya kona ku nga tirhisiwa vakulu, vahuweleri lava nga ni ntokoto kumbe maphayona. Ku lunghiselela kahle swi ta ku pfuna leswaku u ehleketa hi ndlela leyi minkombiso ya kona yi nga ta endliwa ha yona. Loko ku endliwa nkombiso, anakanyisisa hi ndlela leyi u nga ta wu tirhisa ha yona loko u ri ensin’wini. Tiyiseka leswaku u khoma nkandziyiso kumbe magazini lowu nga ta tirhisiwa loko ku endliwa nkombiso. Mi ta vuyeriwa swinene loko mi titoloveta swin’wana swa swingheniso hi nkarhi wa Dyondzo Ya Ndyangu.
6. Hi swihi swivangelo swin’wana leswi hi endlaka hi lunghiselela Nhlangano wa Ntirho?
6 Hi ta wu tsakela swinene Nhlangano wa Ntirho loko hi wu lunghiselele kahle naswona hi anakanyisisa hi ndlela leyi hi nga ta swi tirhisa ha yona leswi hi nga ta swi dyondza. Ku tikarhata hi ndlela leyi swi ta endla leswaku hi khutazana ni van’wana. (Rhom. 1:11, 12) Loko hi tinyika nkarhi wa ku lunghiselela Nhlangano wa Ntirho, swi ta hi olovela ku hetisisa ntirho wa hina.—2 Tim. 3:17.