Xiyenge Xa Wena Eku Endleni Ka Leswaku Minhlangano Yi Vuyerisa

1 Minhlangano ya hina yi hi pfuna ku tolovelana ku antswa na Yehova. Yi hi pfuna ku twisisa milawu ni misinya ya milawu ya yena ni ku hi khutaza ku hanya ha yona. Minhlangano yi hi hlomisela ku hlanganyela loku humelelaka swinene entirhweni lowu ponisaka vutomi wa ku chumayela. Naswona yi hi pfuna ku fikelela pakani ya hina ya vutomi lebyi nga heriki emisaveni leyintshwa ya Xikwembu. Tiawara leti hi ti hetaka swin’we eminhlanganweni ti ta hi nyika mpfuno lowukulu loko ha un’we-un’we hi endla xiyenge xa hina xo endla leswaku minhlangano yi vuyerisa.

2 Ku na swilotlelo swinharhu swo endla leswaku minhlangano yi vuyerisa—ku lunghiselela, ku hlanganyela ni ku tirhisa loku kongomeke. Leswi swa fambelana. Ku lunghiselela lokunene ku endla leswaku ku hlanganyela ku olova naswona ku tsakisa. Marito lama tsakisaka, ya ku hiseka ya ripfumelo ma khutaza ni ku susumeta lava va yingisaka. (Vaef. 4:29) Hinkwavo lava va nga kona handle ko kanakana va ta tirhisa leswi nyikeriwaka loko va swi twisisa ni loko va pfuniwa ku twisisa ndlela leyi rungula ri nga tirhisiwaka ha yona hi tindlela leti tirhaka evuton’wini bya vona vini ni le ku pfuneni ka van’wana leswaku va va vadyondzisiwa.

DYONDZO YA XIHONDZO XO RINDZA NI YA BUKU YA BANDLHA

3 Dyondzo ya Xihondzo xo Rindza ni Dyondzo ya Buku ya Bandlha i minhlangano ya nkoka ngopfu hikuva hi ku tirhisa yona “nandza la tshembekaka, wo tlhariha” u wundla yindlu ya ripfumelo. (Mat. 24:45-47) Xana wa wu veka etlhelo nkarhi wo dyondza mhaka leyi nga ta kambisisiwa? Xana u tiyimiserile ku hlamula eminhlanganweni? Kavula, u endla xiphemu lexikulu emhakeni leyi.

4 Loko u yi dyondze khwatsi mhaka ya Dyondzo ya Xihondzo xo Rindza kumbe Dyondzo ya Buku ya Bandlha, u ta va u tiyimisele ku hlanganyela eka ntsako lowukulu wa ku nyika. (Mintirho 20:35) Vo tala va swi kuma swi pfuna ku khwatihata marito-nkulu. Hi ku langutisa matsalwa lama nga tshahiwangiki ni ku xiya ndlela leyi ma tirhaka ha yona, u ta kuma ku twisisa ka masungulo ya Matsalwa eka tinhlamulo. Xana sweswi u nga nyikela nhlamulo hi marito ya wena n’wini, kumbe u fanele ku hlaya tinhlamulo? Swikongomelo-nkulu eka dyondzo ya swa le tilweni i ku endla leswaku rungula ri va ra wena ni ku ri tirhisa hi ku tlangela loku humaka embilwini ni ku twisisa.—Swiv. 2:5; 4:7, 8.

XIKOLO XA VUTIRHELI BYA LE TILWENI NI NHLANGANO WA NTIRHO

5 Xana u xiya tinkulumo ta wena ta xichudeni exikolweni tanihi swiavelo leswi humaka eka Yehova naswona u kombisa leswi hi ndlela leyi u lunghiselelaka ha yona? Tiyiseka leswaku u twisisa mhaka ni leswaku u nga yi nyikela hi ndlela leyi kokaka nyingiso. Kambe hambi loko u nga ri na xiavelo lexi kongomeke, dyondza hi ku hlaya tindzima ta Bibele leti kombisiweke exiyimisweni ni mhaka yin’wana vhiki na vhiki. Leswi fanaka swi fanele ku endliwa eka Nhlangano wa Ntirho. Loko leswi swi endliwa ka ha ri na nkarhi, hi nkarhi wa nhlangano u nga ha anakanya swinene hi leswi swi nyikeriwaka, ematshan’wini yo lwela ku titoloveta mhaka ro sungula.

6 Swikombiso swa Nhlangano wa Ntirho ni maandlalelo ya nkulumo ya xichudeni swi fanele swi va swa xiviri, swi kombisa swiyimo swa kwalaho leswi hinkwavo va nga swi yelanisaka ni swo karhi. Pfuxeta xiyenge xa wena khwatsi. Nakambe, ambala hi ndlela leyi faneleke leswaku maambalelo ya wena ma va xikombiso lexinene eka van’wana.

7 Kunguhata leswaku swiyenge leswi lunghiseleriweke kahle swi nyikeriwa hi ku hiseka. Vatswari, pfunani vana va n’wina ku lunghiselela ni ku hlamula hi marito ya vona vini loko minkarhi leyi va pfulekeleke yi humelela. Hakunene, loko hinkwavo va swi endla nkhathalelo wa vona wa munhu hi xiyexe ku va kona hi nkarhi ni ku tiyimisela ku hlanganyela, minhlangano ya hina yi ta hlawuleka swinene, yi susumetela rungula leri nyikeriweke hi ndlela leyi khomaka nyingiso wa lava nga kona. Xana u ta endla xiyenge xa wena emhakeni leyi leswaku ‘swilo hinkwaswo swi endleriwa ku aka’ van’wana lava hlengeletaneke na wena?—1 Vakor. 14:26.