Ku Hundzuluxeriwa Ka Mimbulavulo Ya Nhlengeletano Ya Xifundzha Ya 2020 Leyi Nge “Tshamani Mi Tsakile”!

Hi July na August 2020, i ro sungula ematin’wini vamakwerhu va hlalela mimbulavulo ya nhlengeletano ya xifundzha hi nkarhi wun’we. Leswaku leswi swi koteka, mimbulavulo leyi rhekhodiweke a yi fanele yi hundzuluxeriwa hi tindzimi to tlula 500. Hi ntolovelo, ntirho lowu a wu ta teka lembe kumbe ku tlula. Hikwalaho ka xikanyana lexi nga kona, vamakwerhu a va fanele va hundzuluxela mimbulavulo ya Nhlengeletano leyi nge “Tshamani Mi Tsakile”! Nhlengeletano leyi ya xifundzha yi endliwe hi tinh’weti ta mune.

Ndzawulo ya Vuhundzuluxeri ni ndzawulo yo xava leti nga eNtsindza wa Misava Hinkwayo wa Timbhoni ta Yehovha ti pfune swinene eka ntirho lowu. Ndzawulo ya Vuhundzuluxeri yi xiye leswaku vahundzuluxeri va ta lava switirhisiwa swo tala leswaku va hetisisa ntirho lowu, ngopfungopfu switirhisiwa swo rhekhoda. Ndzawulo yo xava yi xave switirhisiwa swo rhekhoda swo ringana 1 000 naswona swi yisiwe etindhawini to ringana 200.

Leswaku ku hlayisiwa mali, switirhisiwa leswi swo rhekhoda swi xaviwe swi tele swi dilivhiwa endhawini yin’we leswaku swi ta yisiwa eka vahundzuluxeri emisaveni hinkwayo. Ku va hi xave swi tele swi endle leswaku microphone wun’we hi wu xava hi $170 U.S., ku katsa ni mali yo dilivha kutani sweswo swi endle leswaku hi hlayisa mali yo tala.

Ndzawulo yo xava a yi fanele yi xava switirhisiwa leswi yi tlhela yi swi dilivha hi April na May 2020, ku nga nkarhi lowu mabindzu a ma koka exilogweni. Hambiswiritano, eku heleni ka May vahundzuluxeri vo tala swin’we ni marhavi se a va ri na swona switirhisiwa leswi lavekaka.

Jay Swinney, loyi a langutelaka ndzawulo yo xava u ri: “Tindzawulo ta Bethele ti tirhisane kahle ni mabindzu man’wana eka ntirho lowu. Hikwalaho ka moya lowo kwetsima wa Yehovha hi swi kotile ku endla ntirho lowu hi xihatla ni ku tirhisa mali hi vutlhari leswaku hi pfuna vamakwerhu.”

Makwerhu Nicholas Ahladis, loyi a tirhaka eka Ndzawulo ya Vuhundzuluxeri u ri: “Vahundzuluxeri lava a va ri eka lockdown va khutazeke ngopfu loko va kuma switirhisiwa leswi. Hambileswi a va hambanisiwile ni vatirhikulorhi kambe se a va ta swi kota leswaku va hundzuluxela ni ku rhekhoda mimbulavulo, tidrama ni tinsimu hi tindzimi to tlula 500.”

Hikwalaho ka ntirho wolowo ni yin’wana yo tala, hi swi kotile ku endla leswaku vamakwerhu emisaveni hinkwayo va kuma Nhlengeletano ya Xifundzha leyi nge “Tshamani Mi Tsakile”! Minyikelo ya n’wina leyi mi yi endleke hi ku tirhisa xiyenge xa minyikelo eka donate.jw.org hi yona leyi endleke leswaku hi swi kota ku xava swilo leswi.