Ku Humelerisiwa Ka Tivhidiyo Ta Nhlengeletano Ya Xifundzha ya 2020 Leyi Nge “Tshamani Mi Tsakile”!

Tivhidiyo ta nhlengeletano ya xifundzha ti hi khumba mbilu naswona ti endla leswaku hi twisisa tidyondzo ta Matsalwa ku antswa. Nhlengeletano ya xifundzha ya 2020 leyi nge “Tshamani Mi Tsakile” a yi ri ni tivhidiyo ta 114 ku katsa ni mimbulavulo ya 43 leyi nyikeriweke hi Swirho Swa Huvo Leyi Fumaka ni vapfuni va swona. Xana u tshame u tivutisa leswaku swi lava matshalatshala ni mali yo tanihi kwihi leswaku ku endliwa tivhidiyo leti katsekaka?

Kwalomu ka 900 wa vamakwerhu emisaveni hinkwayo va nyikele hi nkarhi ni vuswikoti bya vona ku pfuna ku humelerisa nongonoko wa nhlengeletano. Loko ku hlayeriwa tiawara hinkwato leti va ti heteke ti endla kwalomu ka 100 000 eka malembe mambirhi lawa ntirho lowu wu ma heteke. Kwalaho ku katseka ni tiawara ta 70 000 leti lavekaka leswaku ku hetiwa drama ya le Bibeleni leyi nga ni timinete ta 76 leyi nge Nehemiya: “Ntsako Wa Yehovha I Khokholo Ra N’wina”

Hilaha u ehleketaka hakona ku ni mali leyi nga tirha leswaku ku khathaleriwa swilaveko swa vatirhi vo tirhandzela, swin’we ni switirhisiwa swa thekinoloji ni switirhisiwa swin’wana leswi lavekaka ku heta ntirho.

“Komiti yo Dyondzisa ya Huvo Leyi Fumaka ya swi rhandza leswaku eka tivhidiyo ta hina ku katseka vanhu va mindhavuko yo hambanahambana va le tindhawini to hambanahambana. Jared Gossman, loyi a tirhaka eka ndzawulo ya swa Mimpfumawulo Ni tivhidiyo u ri: “Ku endliwa sweswo hikuva hi vamakwerhu emisaveni hinkwayo naswona hi lava leswaku tivhidiyo ta hina ti swi kombisa. Leswaku hi fikelela xikongomelo lexi, ku ni mintlawa ya 11 ematikweni yo hambanahambana leyi tirhaka swin’we eka ntirho lowu. Leswaku ntirho lowu wa misava hinkwayo wu humelela ku laveka mali yo tala, ku hlela ni ntirhisano leswaku vamakwerhu emisaveni hinkwayo va kota ku tirha swin’we.

Tivhidiyo ta hina to tala na tona ti lava switirhisiwa swo hlawuleka ni tindhawu leti fambisanaka ni tivhidiyo ta kona. Hi xikombiso, drama ya Nehemiya: “Ntsako Wa Yehovha I Khokholo Ra N’wina” yi tlangeriwe exitudiyo xa Mt. Ebo ekusuhi na Patterson, eNew York, le U.S.A., naswona xitudiyo lexi a xi endliwe xi fambisana na drama leyi. Leswaku minyikelo yi tirhisiwa hi ndlela leyinene kambe drama yi sala yi vonaka yi ri ntiyiso, vamakwerhu va endle switirhisiwa leswi nga tikiki leswi langutekaka ku fana ni makhumbi ya le Yerusalema. Khumbi ha rin’we a ri lehe timitara ta tsevu naswona a ri pfariwe hi nchumu lowu a wu pendiwile wu fana ribye. Makhumbi lawa a ma susiwa loko ku fanele ku tlangiwa xiphemu xin’wana leswaku ku hungutiwa nhlayo ya tindhawu leti nga ha lavekaka. Hambiswiritano, ku laveke kwalomu ka $100,000 (U.S.) leswaku ku akiwa tindhawu leti fambisanaka ni drama leyi ntsena.a

Ku tiva mhaka leyi swi endla hi ya hi tlangela mimbulavulo ni tivhidiyo ta nhlengeletano ya xifundzha ya lembe leri. Ha tiyiseka leswaku matshalatshala lama katsekeke eku endleni ka nhlengeletano leyi ma ta endla leswaku misava hinkwayo yi huwelela yi dzunisa Yehovha. Ha nkhensa ku hanana ka n’wina hi ku nyikela eka ntirho wa misava hinkwayo hi ku tirhisa xiyenge lexi nge donate.jw.org ni hi ku nyikela hi tindlela tin’wana.