Ku Ndlandlamuxa Nhloko-mhaka

SWIVULAVURI leswi nga ni ntokoto swi tiva nkoka wa ku va ni nhloko-mhaka. Loko swi lunghiselela nkulumo, nhloko-mhaka yi swi pfuna ku languta rungula ro karhi swi anakanya swinene ha rona. Vuyelo bya kona hileswaku, ematshan’weni ya ku famba swi khumbanyana tinhla to tala, swi ndlandlamuxa rungula ra swona hi ndlela leyi nga ta pfuna swinene eka vayingiseri. Loko yinhla-nkulu yin’wana ni yin’wana yi hlangana hi ku kongoma na nhloko-mhaka naswona yi pfuna ku yi ndlandlamuxa, ni vayingiseri va pfuniwa ku tsundzuka tinhla teto ni ku vona nkoka wa tona.

Hambileswi ku nga vuriwaka leswaku nhloko-mhaka ya wena i mhaka leyi u vulavulaka ha yona, u ta kuma leswaku tinkulumo ta wena ti va leti fuweke loko u tibyela leswaku nhloko-mhaka ya wena i vonelo ro karhi leri u ndlandlamuxaka mhaka ya wena ha rona. Mfumo, Bibele ni ku pfuxiwa ka lava feke i timhaka leti naveke ngopfu. Etimhakeni teto ku nga huma tinhloko-mhaka to hambana-hambana. Hi leswi swikombiso swi nga ri swingani: “Mfumo I Hulumendhe Ya Xiviri,” “Mfumo Wa Xikwembu Wu Ta Endla Leswaku Misava Yi Va Paradeyisi,” “Bibele Yi Huhuteriwe Hi Xikwembu,” “Bibele I Nkongomiso Lowu Tirhaka eNkarhini Wa Hina,” “Ku Pfuxiwa Ka Lava Feke Ku Nyika Lava Feriweke Ntshembo,” ni leyi nge “Ntshembo Wa Ku Pfuxiwa Ka Lava Feke Wu Hi Pfuna Ku Tshama Hi Tiyile Loko Hi Xanisiwa.” Tinhloko-mhaka leti hinkwato ti lava ku ndlandlamuxiwa hi tindlela leti hambaneke hi ku helela.

Ku pfumelelana ni nhloko-mhaka-nkulu ya Bibele, ku chumayela loku endliweke hi Yesu Kreste loko a ha ri emisaveni ku kandziyise nhloko-mhaka leyi nge: “Mfumo wa matilo wu tshinele.” (Mat. 4:17) Xana nhloko-mhaka yoleyo yi ndlandlamuxiwe njhani? Mfumo wolowo ku vulavuriwa hi wona minkarhi yo tlula 110 eka Tievhangeli ta mune. Kambe Yesu a nga tirhisanga rito leri nge “mfumo” hi ku phindha-phindha ntsena. Hi ku ya hi leswi a swi dyondziseke ni hi masingita lawa a ma endleke, Yesu u swi veke erivaleni leswaku yena hi byakwe, loyi a a ri kona hi nyama, a a ri N’wana wa Xikwembu, Mesiya, loyi Yehovha a a ta n’wi nyika Mfumo. Yesu u tlhele a komba leswaku ha yena a ku pfuriwa ndlela ya leswaku van’wana va ta hlanganyela eMfun’weni wolowo. U hlamusele timfanelo leti a ti fanele ti kombisiwa hi lava a va ta nyikiwa lunghelo rero. Hi ku tirhisa tidyondzo ni masingita lawa a ma endleke, u swi veke erivaleni leswi Mfumo wa Xikwembu a wu ta vula swona evuton’wini bya vanhu, naswona u kombe leswaku ku hlongola ka yena madimona hi ku tirhisa moya wa Xikwembu a byi ri vumbhoni bya leswaku ‘mfumo wa Xikwembu a wu va hundzile hakunene’ vayingiseri va yena. (Luka 11:20) Wolowo i Mfumo lowu Yesu a leriseke valandzeri va yena leswaku va chumayela ha wona.—Mat. 10:7; 24:14.

Ku Tirhisa Nhloko-mhaka Leyi Faneleke. A swi lavi leswaku u kala u ndlandlamuxa nhloko-mhaka hilaha Bibele yi yi ndlandlamuxeke hakona, kambe ku va na nhloko-mhaka leyi faneleke i swa nkoka swinene.

Loko ku ri wena u faneleke u tihlawulela nhloko-mhaka, xo sungula anakanyisisa hi xikongomelo xa nkulumo ya wena. Kutani, loko u hlawula tinhla-nkulu leti nga ta vumba nkulumo ya wena, tiyiseka leswaku tinhla-nkulu ta kona ta yi seketela hakunene nhloko-mhaka leyi u yi hlawuleke.

Loko u nyikiwe nhloko-mhaka, kambisisa ndlela leyi rungula ra wena ri faneleke ri ndlandlamuxiwa ha yona. Swi nga lava leswaku u endla matshalatshala yo karhi leswaku u twisisa ntikelo ni xikongomelo xa nhloko-mhaka ya kona. Loko wena u ta hlawula rungula leri u nga ta ri tirhisa ku ndlandlamuxa nhloko-mhaka leyi u averiweke yona, ri hlawule kahle leswaku nhloko-mhaka yi tshama yi ri erivaleni. Hi hala tlhelo, loko u nyikiwe rungula ra kona, wa ha boheka ku kambisisa ndlela yo ri tirhisa hi ku pfumelelana na nhloko-mhaka. Nakambe u fanele u kumisisa mhaka leyi rungula ra kona ri nga ra nkoka ha yona eka vayingiseri va wena, ni leswaku pakani ya wena yi fanele yi va yihi loko u ri nyikela. Sweswo swi ta ku pfuna ku kumisisa leswi u faneleke u kandziyisa swona loko u nyikela nkulumo.

Ndlela Yo Kandziyisa Nhloko-mhaka. Leswaku u kandziyisa nhloko-mhaka hi mfanelo, u fanele u veka masungulo loko u hlawula ni ku hlela rungula ra wena. Loko u tirhisa rungula leri seketelaka nhloko-mhaka ya wena ntsena, ni loko u landzela tindlela leti lavekaka leswaku u lunghiselela nkulumo kahle, a swi nge ku tikeli ku kandziyisa nhloko-mhaka.

Ku kandziyisa swi nga ku pfuna ku hlawulekisa nhloko-mhaka. Eka vuyimbeleri byo hola, nhloko-mhaka ya kona i miloti leyi phindha-phindhaka ko tala leswaku yi hlawulekisa risimu. Miloti ya kona a yi chayi ku fana minkarhi hinkwayo. Minkarhi yin’wana ku twala noti wun’we kumbe yimbirhi ntsena, kasi minkarhi yin’wana ku tirhisiwa miloti yo hambana-hambana ya risimu ra kona, kambe hi ndlela yo karhi muqambhi wa rona u pfa a nghenisa miloti yakwe hi vutlhari ku fikela laha yi nandzihisaka risimu hinkwaro. Swi fanele swi va tano hi nhloko-mhaka ya nkulumo. Ku kandziyisa marito-nkulu ya nhloko-mhaka swi fana ni ku pfa u nghenisa miloti eka risimu. Ku tirhisa vamavizweni va marito ya kona kumbe ku veka nhloko-mhaka hi ndlela yin’wana swi endla leswaku yi va leyi hlawulekeke. Ku tirhisa tindlela to tano swi ta endla leswaku nhloko-mhaka yi va yinhla-nkulu leyi vayingiseri va nga ta famba na yona.

Tindlela teto a ti tirhi eka tinkulumo leti nyikeriwaka emahlweni ka vandlha ntsena, kambe ti tirha ni loko u bula ni van’wana ensin’wini. Bulo ro koma ri tsundzukeka hi ku olova loko nhloko-mhaka yi ri erivaleni. Leswi munhu a swi kumeke edyondzweni ya Bibele u ta swi tsundzuka hi ku olova loko nhloko-mhaka yi kandziyisiwile. Matshalatshala lawa u ma endlaka loko u hlawula ni ku ndlandlamuxa tinhloko-mhaka leti faneleke ma ta ku pfuna swinene leswaku u va xivulavuri xa vutshila ni mudyondzisi wa Rito ra Xikwembu.