DYONDZO 14

Veka Tinhlankulu eRivaleni

Vaheveru 8:1

HI KU KOMISA: Endla leswaku vayingiseri va wena va kota ku fambisana kahle ni nhloko mhaka leyi u bulaka ha yona, kombisa ni ndlela leyi tinhlankulu ti fambisanaka ha yona ni nhlokomhaka ya wena.

NDLELA LEYI U NGA SWI ENDLAKA HA YONA:

Vana ni xikongomelo. Kumisisa xikongomelo xa nhlokomhaka leyi u lavaka ku vulavula ha yona. Hi xikombiso, loko yi lava leswaku u hundzisa rungula, u khorwisa kumbe u khutaza vayingiseri va wena yi lunghiselela hilaha ku faneleke. Tiyiseka leswaku tinhlankulu ta wena ti ku pfuna u fikelela xikongomelo xa wena.

Tivutise: ‘Hi swihi swivutiso leswi vayingiseri va mina va nga swi vutisaka mayelana ni nhlokomhaka leyi? Hi yihi ndlela leyi va nga swi vutisaka ha yona hi ku landzelana ka swona?’ Hlela tinhla ta wena hi ku landzelana ka tona leswaku vayingiseri va wena va ta kota ku fambisana na wena va tlhela va twisisa rungula leri u vulavulaka ha rona.
Kandziyisa nhlokomhaka leyi u vulavulaka ha yona. Kandziyisa nhlokomhaka ya wena loko u ri karhi u vulavula, hi ku phindhaphindha swiga swin’wana swa nhlokomhaka leyi u vulavulaka ha yona.
Veka tinhlankulu erivaleni hi ndlela leyi olovaka. Hlawula tinhlankulu leti fambisanaka ni nhlokomhaka ya wena, leti u nga ta kota ku ti hlanganisa kahle hi nkarhi lowu u pimeriweke wona. U nga tati tinhlankulu, veka yinhlankulu ha yin’we erivaleni, yimanyana u nga si boxa yinhlankulu leyi landzelaka naswona boxa yinhlankulu leyi landzelaka hi ndlela leyinene.

U nga ha boxa tinhlankulu loko u sungula bulo ra wena leswaku vayingiseri va wena va ta kota ku fambisana na wena kumbe u ti phindha loko u gimeta bulo ra wena leswaku vayingiseri va wena va ta ti tsundzuka.