Ku Veka Tinhla-nkulu eRivaleni

HI TIHI tinhla-nkulu ta nkulumo ya wena? A ko va rungula leri tsakisaka leri ngo boxiwa ntsena ku nga dzikiwi eka rona. I mhaka ya ntikelo leyi ndlandlamuxiwaka hi vuenti. I mhaka leyi lavekaka leswaku u fikelela pakani ya wena.

Nchumu wa nkoka wa ku endla leswaku tinhla-nkulu ta nkulumo ya wena ti va erivaleni i ku hlela mhaka ya wena hi vutlhari. Loko u endla ndzavisiso wa nkulumo hakanyingi u kuma rungula ro tala ku tlula leri u nga ri tirhisaka. U nga swi vonisa ku yini leswaku hi rihi rungula leri u faneleke u ri tirhisa?

Xo sungula, anakanya hi vayingiseri va wena. Xana vo tala a va yi tivi mhaka leyi u nga ta vulavula ha yona, kumbe, xana va yi tiva kahle? Xana vo tala va vona va pfumelelana ni leswi Bibele yi swi vulaka ha yona, kumbe, xana van’wana va yi kanakana? Hi ntolovelo va hlangana ni swiphiqo swa muxaka muni loko va ringeta ku tirhisa leswi Bibele yi swi vulaka hi mhaka yo tano? Xa vumbirhi, tiyiseka leswaku u yi tiva kahle pakani leyi u lavaka ku yi fikelela loko u vulavula ni vayingiseri hi mhaka leyi u lavaka ku tirhisa yona. Hi ku tirhisa switsundzuxo leswi swimbirhi, kambisisa nkulumo ya wena, ivi u khutulela rungula leri nga lavekiki ku sala leri faneleke ntsena.

Loko u nyikiwe phepha ra nkulumo leri nga ni nhloko-mhaka ni tinhla-nkulu, u fanele u namarhela leswi tsariweke eka rona. Kambe leswi u nga ta swi vula swi ta va ni ntikelo swinene loko u tsundzuka switsundzuxo leswi nga laha henhla loko u ri karhi u ndlandlamuxa yinhla-nkulu yin’wana ni yin’wana. Loko u nga nyikiwanga phepha ra nkulumo, hi wena u faneleke u hlawula tinhla-nkulu.

Loko u ti tiva kahle tinhla-nkulu ta wena naswona u hlele rungula leri ehansi ka tona, swi ta ku olovela ku nyikela nkulumo. Handle ko kanakana, ni vayingiseri va wena va ta pfuneka swinene ha tona.

Tindlela To Hambana-hambana Ta Ku Hlela Rungula Ra Wena. U nga tirhisa tindlela to hambana-hambana loko u hlela miri wa nkulumo ya wena. Loko u ya u ti tolovela, u ta kuma leswaku tin’wana ta tona ti tirha kahle, swi ya hi pakani ya wena.

Ndlela yin’wana yi katsa ku veka tinhloko-mhaka hi ku hambana ka tona. (Yinhla-nkulu yin’wana ni yin’wana ya laveka hikuva yi pfuna vayingiseri va wena ku twisisa mhaka kumbe yi ku pfuna ku fikelela pakani ya nkulumo ya wena.) Ndlela yin’wana i ku hlamusela hi ku landzelelanisa nkarhi lowu swilo swi humeleleke ha wona. (Hi xikombiso, swiendlakalo swa le mahlweni ka Ndhambi, swi nga landzeriwa hi swiendlakalo swa le mahlweni ka ku lovisiwa ka Yerusalema hi 70 C.E., leswi na swona swi nga landzeriwaka hi swiendlakalo swa le nkarhini wa hina.) Ndlela ya vunharhu i xivangelo ni vuyelo. (Leswi swi nga endliwa hi yin’wana ni yin’wana ya tindlela leti. Hi xikombiso, u nga sungula hi xiyimo lexi nga kona sweswi, u landzela hi vuyelo bya kona kutani u komba xivangelo.) Ndlela ya vumune yi katsa swilo leswi hambaneke. (U nga kombisa ku hambana ka swilo leswinene ni leswo biha.) Minkarhi yin’wana u nga tirhisa tindlela to tlula yin’we enkulumeni.

Loko Stefano a hehliwa hi mavunwa emahlweni ka Sanedri ya Vayuda, u vulavule hi matimba ivi endzhaku a landzelelanisa timhaka hilaha ti humeleleke hakona. Loko u hlaya ha tona eka Mintirho 7:2-53, xiya leswaku u hlawule tinhla hi xikongomelo. Stefano u sungule hi ku swi veka erivaleni leswaku u vulavula hi matimu lawa vayingiseri vakwe a va nga ta ma kaneta. Kutani u kombise leswaku hambileswi Yosefa a cukumetiweke hi vamakwavo, Xikwembu xi ponise vanhu hi ku tirhisa yena. Endzhaku, u kombe leswaku Vayuda a va nga lavi ku twa nchumu hi Muxe loyi Xikwembu a xi tirhisa yena. U gimete hi ku kandziyisa leswaku lava va dlayeke Yesu Kreste va kombise moya wo fana ni lowu kombisiweke hi Vayuda va khale.

Ku nga Vi Na Tinhla To Tala Ngopfu. Nhloko-mhaka yin’wana ni yin’wana a yi lavi ku ndlandlamuxiwa hi tinhla to tala. Hakanyingi ti nga hlayiwa hi tintiho ta xandla xin’we. Sweswo swi tano, hambi u ta vulavula timinete ta 5, ta 10, ta 30 kumbe ku tlula. U nga ringeti ku kandziyisa tinhla to tala ngopfu. Vayingiseri va wena va nga kota ku khoma tinhla tintsongo to hambana-hambana enkulumeni ya wena. Naswona loko nkulumo yi lehe ngopfu, u fanele u ti kandziyisa swinene tinhla-nkulu u tlhela u ti hlamusela kahle.

Ku nga khathariseki leswaku u tirhisa tinhla-nkulu tingani, tiyiseka leswaku yin’wana ni yin’wana u yi ndlandlamuxa hi mfanelo. Nyika vayingiseri nkarhi lowu eneleke wo gayela hi yinhla-nkulu yin’wana ni yin’wana leswaku yi dzika emianakanyweni ya vona.

Nkulumo ya wena yi fanele yi olova. Minkarhi yin’wana sweswo a swi titsheganga hi mpimo wa rungula leri u ri nyikelaka. Loko tinhla ta wena ti xaxametiwe kahle ehansi ka tinhloko-mhaka ti nga ri tingani, kutani u ti ndlandlamuxa hi ku landzelelana ka tona, nkulumo ya wena yi ta landzeleleka hi ku olova naswona vayingiseri a va nge hatli va yi rivala.

Endla Leswaku Tinhla-nkulu Ta Wena Ti Va eRivaleni. Loko rungula ra wena ri hleriwe kahle, a swi nge tiki ku kandziyisa ntikelo wa tinhla-nkulu ta wena loko u nyikela nkulumo.

Ndlela leyikulu yo veka yinhla-nkulu erivaleni i ku tirhisa vumbhoni, matsalwa ni rungula rin’wana hi mukhuva lowu nga ta yisa nyingiso eka yinhla-nkulu kutani u yi kandziyisa. Tinhla hinkwato letitsongo ti fanele ti veka yinhla-nkulu erivaleni, ti nyikela vumbhoni byo yi seketela ni ku yi kandziyisa. U nga nghenisi rungula leri nga fambisaniki na mhaka hileswi ri tsakisaka ntsena. Loko u ndlandlamuxa tinhla letitsongo, swi kombise kahle leswaku ti hlangana njhani na yinhla-nkulu leyi ti yi seketelaka. U nga swi tshikeli vayingiseri leswaku ku va vona va tihlanganiselaka tinhla leti. Ku hlangana ka tona ku nga kombiwa hi ku phindha marito lama kandziyisaka yinhla-nkulu, kumbe hi ku phindha mongo wa yinhla-nkulu nkarhi na nkarhi.

Swivulavuri swin’wana swi kandziyisa tinhla-nkulu hi ku ti xaxameta ha yin’we-yin’we. Hambileswi leyi yi nga ndlela yin’wana yo kandziyisa tinhla-nkulu, a yi fanelanga yi siva ndlela ya ku hlawula rungula hi vukheta ivi u ri ndlandlamuxa kahle.

U nga hlawula ku boxa yinhla-nkulu ya wena eku sunguleni u nga si nyikela nhlamuselo yo yi seketela. Leswi swi ta pfuna vayingiseri leswaku va swi langutela hi mahlo-ngati leswi taka, naswona swi ta kandziyisa ni yinhla-nkulu yoleyo. U nga kandziyisa yinhla ya kona hi ku nyikela nkatsakanyo wa yona loko u yi ndlandlamuxe yi helela.

Entirhweni Wa Nsimu. Misinya ya milawu leyi hlamuseriweke laha henhla a yi tirhi etinkulumeni leti lunghiseleriweke ntsena, kambe yi tirha ni loko u vulavula ni vanhu entirhweni wa nsimu. Loko u lunghiselela ntirho wa nsimu, anakanya hi vonelo leri vanhu vo tala va nga na rona ensin’wini ya ka n’wina. Hlawula nhloko-mhaka leyi pfunaka ku komba ndlela leyi ntshembo lowu nyikeriwaka hi Bibele wu nga ta tlhantlha xiphiqo xa kona ha yona. Kumbexana u nga hlawula tinhla-nkulu timbirhi leti nga ta ndlandlamuxa nhloko-mhaka yoleyo. Hlawula matsalwa lawa u nga ta ma tirhisa leswaku u seketela tinhla-nkulu ta kona. Kutani kunguhata ndlela leyi u nga ta sungula bulo ra wena ha yona. Ku lunghiselela hi ndlela yo tano swi ta ku pfuna leswaku u fambisana ni bulo lomu ri yaka kona. Swi ta ku pfuna ni ku vula nchumu lowu vini va muti va nga ta wu tsundzuka.