Ndzima Ya Vumakumembirhi

Tshama U Ri Karhi U Tsundzuka Siku Ra Yehovha

1. Loko u swi twa ro sungula leswaku ku nga ri khale hi ta ntshunxiwa eka mahlomulo ya mafambiselo lawa ya khale ya swilo, xana u titwe njhani?

XIN’WANA xa swilo swo sungula leswi u swi dyondzeke eBibeleni hileswaku xikongomelo xa Yehovha i ku hundzula misava hinkwayo yi va paradeyisi. Emisaveni yoleyo leyintshwa a ku nge he vi ni nyimpi, vugevenga, vusweti, vuvabyi, ku xaniseka ni rifu. Hambi ku ri vafi va ta pfuxiwa. Leyi i mhaka yo tsakisa hakunene! Mhaka ya leswaku vukona bya Kreste lebyi nga vonakiki tanihi Hosi leyi fumaka, byi sungule hi 1914, ya hi tiyisekisa leswaku swilo leswi hinkwaswo swi ta hetiseka ku nga ri khale naswona ku sukela hi nkarhi wolowo, a hi ri karhi hi hanya emasikwini yo hetelela ya misava leyi yo homboloka. Eku heleni ka masiku lawa yo hetelela, Yehovha u ta herisa mafambiselo lawa ya swilo kutani a tisa misava leyintshwa leyi a yi tshembiseke!

2. Xana “siku ra Yehovha” i yini?

² Nkarhi lowu wa ndzoviso lowu taka, Bibele yi wu vitana “siku ra Yehovha.” (2 Petro 3:10) I ‘siku ra ku hlundzuka ka Yehovha,’ leri ha rona a hlundzukelaka misava hinkwayo ya Sathana. (Sofaniya 2:3) Ri fikelela maninginingi ya rona eka “nyimpi ya siku lerikulu ra Xikwembu xa Matimba Hinkwawo . . . leyi vuriwaka Har–Magedoni [Armagedoni] hi Xiheveru,” leyi eka yona “[tihosi] ta misava hinkwayo leyi akiweke” ti nga ta lovisiwa. (Nhlavutelo 16:14, 16) Xana ndlela leyi u hanyaka ha yona yi kombisa leswaku wa tshemba leswaku “siku ra Yehovha” ri le kusuhi?—Sofaniya 1:14-18; Yeremiya 25:33.

3. (a) Xana siku ra Yehovha ri ta fika rini? (b) Ha yini swi ri swinene leswi Yehovha a nga ri boxangiki “siku ra kona ni nkarhi wa kona”?

³ Bibele a yi hi byeli hi ku kongoma siku leri Yesu Kreste a nga ta ta ha rona tanihi Mulovisi la rhumiweke hi Yehovha ku ta herisa mafambiselo ya swilo ya Sathana. Yesu u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi etilweni hambi ku ri N’wana, kambe swi tiviwa hi Tatana.” (Marka 13:32) Munhu wihi ni wihi loyi a nga n’wi rhandziki Yehovha, u ta ri vekela etlhelo siku ra yena, a khomeka hi timhaka ta yena ta siku ni siku. Kambe lava va rhandzaka Yehovha hakunene va ta n’wi tirhela hi moya-xiviri wa vona hinkwawo, ku nga khathariseki leswaku makumu ya mafambiselo lawa yo biha ma ta fika rini.—Pisalema 37:4; 1 Yohane 5:3.

4. Hi xihi xitsundzuxo lexi Yesu a xi nyikelaka?

⁴ Loko a tsundzuxa vanhu lava rhandzaka Yehovha, Yesu u ri: “Tshamani mi langutile, tshamani mi hitekile, hikuva a mi swi tivi leswaku nkarhi lowu vekiweke wu fika rini.” (Marka 13:33-37) U hi khutaza leswaku hi nga pfumeleli swakudya ni swakunwa kumbe “ku vilela hi vutomi” swi hi lawula ngopfu lerova hi tsandzeka ku vona ku biha ka minkarhi leyi.—Luka 21:34-36; Matewu 24:37-42.

5. Hilaha Petro a hlamuseleke hakona, xana siku ra Yehovha ri ta ta na yini?

⁵ Hilaha ku fanaka, Petro u hi tsundzuxa leswaku hi tshama hi ri karhi hi “tsundzuka vukona bya siku ra Yehovha, leri ha rona matilo ma nga ta hela hi ku tshwa naswona swiaki swa wona leswi hisaka ngopfu swi nga ta n’oka.” Tihulumendhe hinkwato ta vanhu—ku nga “matilo”—ti ta herisiwa, swin’we ni vanhu vo biha hinkwavo—ku nga “misava”—ni “swiaki” swa yona, ku nga mianakanyo ni mintirho ya misava leyi yo biha, yo fana ni ku rhandza ka yona ku ntshunxeka eka vulawuri bya Xikwembu ni ku tikhoma ka yona loko biha ni ku hlongorisa ka yona swilo leswi vonakaka. Leswi hinkwaswo swi ta siviwa hi “matilo lamantshwa [ku nga Mfumo wa Xikwembu wa le tilweni] ni misava leyintshwa [ku nga vanhu lava nga ta hanya emisaveni leyintshwa]” leyi eka yona ku nga “ta va ni ku lulama.” (2 Petro 3:10-13) Swiendlakalo leswi, leswi chavisaka swi ta humelela hi xitshuketa hi siku ni nkarhi lowu nga rindzeriwangiki.—Matewu 24:44.

Tshama U Ri Karhi U Xalamukele Xikombiso

6. (a) Xana nhlamulo ya Yesu ya xivutiso xa vadyondzisiwa va yena yi hetiseke hi mpimo wo tanihi kwihi eku heleni ka mafambiselo ya Xiyuda? (b) Hi swihi swiyenge swa nhlamulo ya Yesu leswi vulavulaka hi swiendlakalo leswi sunguleke hi 1914 ku ya emahlweni?

⁶ Hikwalaho ka minkarhi leyi hi hanyaka eka yona, hi fanele hi byi tiva swinene vuxokoxoko bya xikombiso lexi hlanganeke lexi hi kombisaka masiku yo hetelela—ku nga “makumu ya mafambiselo ya swilo.” Tsundzuka leswaku loko Yesu a hlamula xivutiso xa vadyondzisiwa vakwe lexi nga eka Matewu 24:3, swin’wana swa swilo leswi a swi hlamuselaka eka tindzimana 4 ku ya eka 22 swi hetiseke hi mpimo lowutsongo eka mafambiselo ya Xiyuda ku sukela hi 33 ku ya eka 70 C.E. Kambe vuprofeta lebyi byi hetiseke hi mpimo lowukulu ku sukela hi 1914, ku nga nkarhi wa “vukona bya [Kreste] ni [wa] makumu ya mafambiselo ya swilo.” Matewu 24:23-28 yi hi byela leswi nga ta humelela ku sukela hi 70 C.E. ku ya fika enkarhini wa vukona bya Kreste. Swiendlakalo leswi hlamuseriweke eka Matewu 24:29–25:46 swi humelela enkarhini wa makumu.

7. (a) Hikwalaho ka yini un’wana ni un’wana wa hina a fanele a xalamukela ku vona ndlela leyi swiyimo leswi nga kona swi xi hetisisaka ha kona xikombiso? (b) Hlamula swivutiso leswi nga emakumu ka ndzimana leyi, u ri karhi u kombisa ndlela leyi xikombiso xi hetisekeke ha yona ku sukela hi 1914.

⁷ Un’wana ni un’wana wa hina u fanele a xalamukela swiendlakalo leswi hetisisaka xikombiso lexi. Loko ho ringeta ku vona ndlela leyi swilo leswi swi byi hetisisaka ha yona vuprofeta bya Bibele, swi ta hi pfuna leswaku hi tshama hi ri karhi hi tsundzuka siku ra Yehovha. Nakambe swi ta hi endla leswaku hi khorwiseka loko hi tsundzuxa van’wana leswaku siku leri ri le kusuhi. (Esaya 61:1, 2) Loko hi ri karhi hi anakanya hi tipakani leti, a hi pfuxeteni swivutiso leswi landzelaka leswi kandziyisaka swiyenge swo karhi swa xikombiso lexi, hilaha xi tsariweke hakona eka Matewu 24:7 na Luka 21:10, 11.

Xana vuprofeta bya leswaku “tiko ri ta pfukela tiko rin’wana ni mfumo wu ta pfukela mfumo wun’wana,” byi hetiseke njhani hi ndlela leyi hlamarisaka ku sukela hi 1914? Malunghana ni tinyimpi, i yini leswi humeleleke ku sukela hi nkarhi wolowo?

Hi 1918, hi wihi ntungu lowu koxeke vutomi byo tala ku tlula Nyimpi yo Sungula ya Misava? Hambileswi vanhu va nga ni vutivi bya vutshunguri, hi wahi mavabyi lawa ni sweswi ma dlayaka timiliyoni ta vanhu?

Xana ku kayivela ka swakudya ku karhate vanhu hi mpimo wo tanihi kwihi hambileswi ku veke ni nhluvuko hi tlhelo ra sayense eka lembe-xidzana leri ra ha ku hundzaka?

I yini lexi ku endlaka u kholwa leswaku 2 Timotiya 3:1-5, 13 a yi hlamuseli ndlela leyi vutomi a byi ri xiswona ku sukela khale, kambe yi hlamusela ndlela leyi vubihi byi andzeke ha yona loko hi ri karhi hi tshinelela masiku ya makumu?

Ku Hlawula Vanhu

8. (a) I yini swin’wana leswi hlamuseriweke eka Matewu 13:24-30, 36-43, leswi Yesu a nga te swi ta humelela eku heleni ka mafambiselo lawa ya swilo? (b) Xana xifaniso xa Yesu xi vula yini?

⁸ Ku ni swiendlakalo swin’wana leswi xiyekaka leswi Yesu a vuleke leswaku swi ta humelela eku heleni ka mafambiselo lawa ya swilo. Xin’wana xa swona i ku hlawula “vana va mfumo” eka “vana va lowo homboloka.” Yesu u vulavule hi leswi exifanisweni xa yena xa nsimu ya koroni leyi eka yona nala a fikeke a haxa mfava. Eka xifaniso xa yena, “koroni” yi fanekisela Vakreste va ntiyiso lava totiweke. “Mfava” hi lava va tivulaka Vakreste kambe va tikombisaka va ri “vana va lowo homboloka” hi ku namarhela misava leyi mufumi wa yona ku nga Diyavulosi. Lava va hambanisiwa ni “vana va mfumo” wa Xikwembu naswona va fungheriwa ku lovisiwa. (Matewu 13:24-30, 36-43) Xana leswi se swi humelerile?

9. (a) Endzhaku ka Nyimpi yo Sungula ya Misava, hi wihi ntirho lowukulu wo hambanisa vanhu hinkwavo lava tivulaka Vakreste, lowu endliweke? (b) Xana Vakreste lava totiweke va swi kombise njhani leswaku i malandza ya Mfumo ya xiviri?

⁹ Endzhaku ka Nyimpi yo Sungula ya Misava, vanhu hinkwavo lava tivulaka Vakreste va hambanisiwile va va mintlawa yimbirhi: (1) Vafundhisi va Vujagana ni valandzeri va vona, lava va seketeleke swinene Ntwanano wa Matiko (sweswi ku nga Nhlangano wa Matiko) hi hala tlhelo va ri karhi va seketela matiko ya vona, ni (2) Vakreste va ntiyiso lava hanyeke endzhaku ka nyimpi leyi, lava seketeleke swinene Mfumo wa Xikwembu ha Mesiya naswona a va ma seketelanga matiko ya misava leyi. (John 17:16) Lava va tikombise va ri malandza ya Mfumo wa Xikwembu hi ku sungula tsima ro chumayela “mahungu lamanene lawa ya mfumo” emisaveni hinkwayo. (Matewu 24:14) Vuyelo byi ve byihi?

10. Hi byihi vuyelo byo sungula bya ntirho wo chumayela hi Mfumo?

¹⁰ Xo sungula, ku hlengeletiwe masalela ya lava totiweke hi moya wa Xikwembu, lava nga ni ntshembo wo va na Kreste eMfun’weni wa le tilweni. Hambileswi vanhu volavo a va hangalake exikarhi ka matiko, va hlengeletiwile va va nhlengeletano. Ku funghiwa ka vatotiwa lava ku ta hela ku nga ri khale.—Nhlavutelo 7:3, 4.

11. (a) Hi wihi ntirho wo hlengeleta vanhu lowu wu endliwaka sweswi, naswona wu hetisisa vuprofeta byihi? (b) Xana ku hetiseka ka vuprofeta lebyi ku kombisa yini?

¹¹ Endzhaku ka sweswo, Kreste u kongomise ntirho wo hlengeleta “ntshungu lowukulu . . . wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” Wona wu vumba “tinyimpfu tin’wana” leti nga ta pona “nhlomulo lowukulu,” ti nghena emisaveni leyintshwa ya Xikwembu. (Nhlavutelo 7:9, 14; Yohane 10:16) Ntirho lowu wo chumayela hi Mfumo wa Xikwembu wa ha endliwa ni namuntlha, makumu ma nga si fika. Ntshungu lowukulu wa tinyimpfu tin’wana, lowu sweswi wu endlaka timiliyoni, wu pfuna masalela lama totiweke ku hangalasa mahungu lawa ya nkoka ya Mfumo, hi ku tshembeka. Mahungu lawa ma karhi va hangalasiwa ematikweni hinkwawo.

I Yini Leswi Nga Ta Endleka?

12. Ku sele ntirho wo tanihi kwihi wo chumayela, siku ra Yehovha ri nga si fika?

¹² Hinkwaswo leswi se hi vulavuleke ha swona swi kombisa leswaku hi hanya enkarhini wa ku hela ka masiku yo hetelela ni leswaku siku ra Yehovha ri tshinele swinene. Kambe xana ka ha ri ni vuprofeta lebyi faneleke byi hetiseka siku rero leri chavisaka ri nga si sungula? Ina. Phela ku hambanisiwa ka vanhu malunghana ni mhaka ya Mfumo, a ku si hela. Etindhawini tin’wana leti langutaneke ni nxaniso lowukulu, vadyondzisiwa lavantshwa va karhi va andza. Hambi ku ri laha mahungu lamanene ma ariwaka kona, tintswalo ta Yehovha ta kombisiwa hi ku chumayela ka hina. Kutani, a hi hambeteni hi chumayela! Yesu wa hi tiyisekisa leswaku loko ntirho wu herile, makumu ma ta fika.

13. Hilaha swi tsariweke hakona eka 1 Vatesalonika 5:2, 3, hi xihi xiendlakalo lexi xiyekaka lexi nga ta humelela naswona sweswo swi ta va swi vula yini eka hina?

¹³ Vuprofeta byin’wana bya Bibele lebyi xiyekaka swinene byi ri: “Loko va ku: ‘Ku rhula ni nsirhelelo,’ kutani ndzoviso wa xitshuketa wu ta va wela hi xihatla kukotisa xitlhavi xa maxangu eka wansati la tikeke; naswona a va nge baleki nikatsongo.” (1 Vatesalonika 5:2, 3) Leswaku ku twarisiwa koloko ka “ku rhula ni nsirhelelo” ku ta va ku ri ka muxaka muni, swi ta vonaka hi ku famba ka nkarhi. Kambe entiyisweni leswi a swi nge vuli swona leswaku varhangeri va misava va ta va swi tlhantlhile hakunene swiphiqo hinkwaswo swa vanhu. Lava va tshamaka va ri karhi va tsundzuka siku ra Yehovha a va nge yengiwi hi marito yo tano. Va swi tiva leswaku endzhakunyana ka sweswo ku ta ta ndzoviso wa xitshuketa.

14. Hi swihi swiendlakalo leswi nga ta humelela hi nkarhi wa nhlomulo lowukulu naswona swi ta tlhandlamana njhani?

¹⁴ Eku sunguleni ka nhlomulo lowukulu, vafumi va ta hlasela Babilona Lonkulu, ku nga mfumo wa misava wa vukhongeri bya mavunwa, naswona va ta n’wi herisa. (Matewu 24:21; Nhlavutelo 17:15, 16) Endzhaku ka sweswo, matiko ma ta hlasela lava seketelaka vuhosi bya Yehovha, ma endla leswaku Yehovha a karihela tihulumendhe ta misava ni lava va ti seketelaka, kutani a va lovisa hi ku helela. Koloko ku ta va ku hela ka nhlomulo lowukulu, eArmagedoni. Kutani, Sathana ni madimona yakwe va ta pfaleriwa ekheleni ro enta naswona a va nge he swi koti ku kucetela vanhu. Siku ra Yehovha ri ta helela kwalaho loko vito rakwe ri kwetsimisiwa.—Ezekiyele 38:18, 22, 23; Nhlavutelo 19:11–20:3.

15. Ha yini ku ta va ku ri vuphukuphuku ku ehleketa leswaku siku ra Yehovha ri le kule swinene?

¹⁵ Makumu ya mafambiselo lawa ma ta fika hi nkarhi wa kona, lowu Xikwembu xi wu vekeke. A ma nge hlweli. (Habakuku 2:3) Tsundzuka leswaku ku herisiwa ka Yerusalema hi 70 C.E. ku fike hi xitshuketa, hi nkarhi lowu Vayuda a va nga ku rindzelanga, loko va anakanya leswaku a ka ha ri na khombo. Ku vuriwa yini hi muti wa khale wa Babilona? A wu ri ni matimba, wu titshemba naswona wu biyeriwe hi marhangu lamakulu. Kambe wu we hi vusiku byin’we. Hilaha ku fanaka, mafambiselo lawa yo biha ya swilo ma ta herisiwa hi xitshuketa. Loko nkarhi wolowo wu fika, onge wu nga hi kuma hi ri ni vun’we evugandzerini, hi nga ri rivalanga siku ra Yehovha.

Mpfuxeto

• Ha yini swi ri swa nkoka leswaku hi tshama hi ri karhi hi tsundzuka siku ra Yehovha? Xana hi nga swi endlisa ku yini sweswo?

• Xana un’wana ni un’wana wa hina u khumbeka njhani hi ku kongoma entirhweni lowu nga kona wo hambanisa vanhu?

• I yini leswi nga ta endleka, siku ra Yehovha ri nga si sungula? Kutani, i yini leswi un’wana ni un’wana wa hina a faneleke a swi endla sweswi?

[Swifaniso leswi nga eka tluka 180, 181]

Masiku ya makumu ma ta hela ku nga ri khale loko ku herisiwa mafambiselo ya swilo ya Sathana