Ndzima 27

Ha Yini Ndzi Va Ni Gome Loko Ndzi Endla Swihoxo?

Xana wa hlundzuka loko u kuma timaraka leti a wu nga ti langutelanga?

□ Ina

□ Doo!

Xana u titwa u nga pfuni nchumu loko van’wana va ku xopaxopa swihoxo?

□ Ina

□ Doo!

Xana swa ku tikela ku va ni vanghana hileswi hinkwavo ka vona va tsandzekaka ku endla swilo hi ndlela leyi u lavaka ha yona?

□ Ina

□ Doo!

LOKO u hlamule ina eka xin’wana xa swivutiso leswi nga laha henhla swi nga ha endleka leswaku u ni xiphiqo xa ku lava ku endla swilo hi ndlela leyi hetisekeke. Kambe u nga ha ku: ‘Swi hoxe kwihi ku ringeta ku endla swilo hi ndlela leyinene?’ A swi hoxanga. Bibele yi ndhundhuzela munhu la nga ni “vuswikoti entirhweni wakwe.” (Swivuriso 22:29) Kambe munhu la lavaka ku endla swilo hi ndlela leyi hetisekeke u hundzeleta swilo.

Hi xikombiso, Jason la nga ni malembe ya 19 u ri: “Hi lembe leri ndzi heteke xikolo ha rona, ndzi vone onge a ndzi xichudeni lexinene hileswi ndzi nga kumangiki timaraka leti a ndzi ti languterile. Nakambe a ndzi tlanga piyano naswona a ndzi vona onge ndzi fanele ndzi yi tlanga ku fana ni mutlangi la nga ni vutshila swinene.”

Munhu la lavaka ku endla swilo hi ndlela leyi hetisekeke a nga tikuma a kavanyete vuxaka bya yena ni Xikwembu. Anakanya hi muntshwa loyi minkarhi hinkwayo a langutiwaka tanihi xikombiso eka vantshwa van’wana. Leswi un’wana ni un’wana a tshamaka a n’wi langutile, a nga ha vona onge a nga fanelanga a endla xihoxo. I ntiyiso leswaku Vakreste lava ha riki vantshwa ni lava kuleke, va vuyeriwa eka swikombiso leswinene leswi va swi vonaka evandlheni. Kambe muntshwa la lavaka ku endla swilo hi ndlela leyi hetisekeke a nga tikuma a nga ha swi tsakeli ku tirhela Xikwembu. Loko a ri tano, u fanele a kombela mpfuno. Swi nga endleka a nga wu kombeli hikuva a chava leswaku u ta va khomisa tingana lava va n’wi tekaka a ri xikombiso lexinene. A nga ha vona swi antswa ku tilan’wa a anakanya leswaku loko a nga swi koti ku endla swilo hi ndlela leyi hetisekeke swa antswa a namba a tshika.

Ku Lwa Ni Ndzingo Lowu

Vanhu lava langutaneke na ndzingo lowu va vona onge a va fanelanga va endla swihoxo. Kambe sweswo a hi ntiyiso. Bibele yi swi veka erivaleni loko yi ku: “Hinkwavo va dyohile, naswona va kayivela ku vangama ka Xikwembu.” (Varhoma 3:23) Kutani a swi nge koteki leswaku hi endla swilo hi ndlela leyi hetisekeke. Kahle-kahle ku tshemba leswaku u nga endla swilo hi ndlela leyi hetisekeke swi fana ni ku anakanya leswaku u ngo na swipfuketana u haha. Hambi wo tixisa u ku yini, a swi nge pfuki swi endlekile.

Xana u nga endla yini leswaku u nga lawuriwi hi ndzingo lowu? Ringeta leswi landzelaka:

U nga weli swilo ehenhla. Xana u le ku tidlayeni u ringeta ku va wo antswa ku tlula hinkwavo? Bibele yi vula leswaku ku endla tano swi fana ni ku “hlongorisa mheho.” (Eklesiasta 4:4) Ntiyiso wa mhaka hi leswaku a hi vangani lava kotaka ku endla swilo hi “ndlela leyi antswaka swinene.” Hambiloko munhu o kota ku endla tano, ku ta va ni un’wana la nga ta n’wi tlula hi ku famba ka nkarhi. Ku endla leswinene swi vula ku endla leswi u nga swi kotaka ku nga ri ku tlula van’wana.—Vagalatiya 6:4.

Ringanisela. U nga languteli ku endla swilo leswi u nga riki na matimba yo swi endla. Ku tivekela tipakani ta le henhla swinene swi vula leswaku a wu koti ku xiya swilo leswi u tsandzekaka ku swi endla naswona i ku hundzeleta swilo. Muapostola Pawulo u nyikela xitsundzuxo xa nkoka a ku: “Ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona.” (Varhoma 12:3) Xisweswo, i swa nkoka ku ringanisela. Veka tipakani leti u nga ta kota ku ti fikelela kahle. Endla leswi u nga swi kotaka ku nga ri ku lava ku endla swilo leswaku u tlula van’wana.

U nga ti tikiseli vutomi. Ringeta ku endla nchumu wo karhi lowu u swi tivaka leswaku wa ku tsandza, wo fana ni ku tlanga xichayachayana xo karhi. I ntiyiso leswaku u ta endla swihoxo swo tala. Kambe enkarhini lowu, ringeta ku languta swihoxo swa wena hi tihlo rin’wana. Bibele yi vula leswaku ku ni “nkarhi wa ku hleka.” (Eklesiasta 3:4) Kutani loko u endla swihoxo u nga heli mbilu. Loko u endla tano u ta swi xiya leswaku ku endla swihoxo swi ku pfuna leswaku u dyondza. I ntiyiso leswaku swi nga ha ku tikela ku endla swilo hi ndlela leyi nga hetisekangiki. Kambe u nga pfumeli ku lawuriwa hi mianakanyo yo biha leyi ku endlaka u titwa u nga ri nchumu.

Tsundzuka leswaku Yehovha a nga lavi leswaku hi endla swilo onge hi hetisekile kambe u lava leswaku hi tshembeka eka yena. (1 Vakorinto 4:2) Loko u lava ku tshembeka, u nga swi kota ku eneriseka hi leswi u nga swona hambiloko u nga hetisekanga.

MATSALWA

“A nga kona munhu la lulameke emisaveni la hambetaka a endla leswinene naswona a nga dyohiki.”—Eklesiasta 7:20.

XITSUNDZUXO

Anakanya hi ntirho lowu u nga wu tshika hileswi a wu chava leswaku a wu nge wu endli hilaha ku hetisekeke. Kutani tsala siku leri u lavaka ku wu hetisa ha rona.

XANA A WU SWI TIVA LESWAKU . . . ?

Yehovha u hetisekile, kambe loko a tirhisana ni vanhu lava nga hetisekangiki, a nga languteli leswaku va endla swilo hi ndlela leyi hetisekeke. A nga languteli leswaku va endla swilo leswi nga ta va tsandza.

LESWI NDZI TIYIMISELEKE KU SWI ENDLA!

Loko ndzi sungula ku tixopaxopa hi swilo leswi nga twaliki ndzi ta ․․․․․

Loko ndzi sungula ku xopaxopa van’wana hi swilo leswi nga twaliki ndzi ta ․․․․․

Leswi ndzi lavaka ku vutisa (va-)mutswari wa mina hi mhaka leyi ․․․․․

U NGA KU YINI?

● Xana hi le ka swiyimo swihi evuton’wini bya wena loko swi ri kona, laha u tivekelaka tipakani leti u nga ta tsandzeka ku ti fikelela?

● Hi tihi tindzimana ta Bibele leti ku pfunaka u vona leswaku Yehovha Xikwembu a nga languteli leswaku malandza ya yena ma endla swilo hi ndlela leyi hetisekeke?

● Ha yini van’wana va nga fambelaka ekule na wena loko u lava ku endla swilo hi ndlela leyi hetisekeke?

● Xana u ta endla yini loko u endla swihoxo enkarhini lowu taka?

[Marito lama tshahiweke exihlokweni lama nga eka tluka 226]

“Munhu la endlaka swilo hilaha a nga kotaka hakona a nga fani ni la lavaka ku va la hetisekeke; lon’wana wa ringanisela kasi lon’wana a nga ringaniseli.”—Megan

[Bokisi leri nga eka tluka 228]

Ku Lava Ku eNdla Swilo Hi Ndlela Leyi Hetisekeke Ni Ku Lava Ku Va Ni Vanghana

Xana u tihambanisa ni vanhu hileswi va nga endliki swilo hi ndlela leyi u lavaka ha yona? Kumbe, xana vanhu lavanene va fambela ekule na wena hileswi u lavaka leswaku vanghana va wena va endla swilo hi ndlela leyi hetisekeke? Bibele yi ri: “U nga vi la lulameke ku tlula mpimo, hambi ku ri ku vonakala u tlharihe ku tlurisa. Ha yini u fanele u tilovisa?” (Eklesiasta 7:16) Ndlela yin’wana leyi munhu la lavaka ku endla swilo hi ndlela leyi hetisekeke a tivangelaka swiphiqo ha yona i ku tihambanisa ni vanhu lava n’wi rhandzaka. Nhwanyana la vuriwaka Amber u ri: “A nga kona munhu la lavaka ku tshama ni vanhu lava n’wi endlaka a tivona a nga pfuni nchumu, naswona ndzi vone vanhu lava lavaka ku endla swilo hi ndlela leyi hetisekeke va lahlekeriwa hi vanghana lavanene hikwalaho ka mhaka leyi nga nyawuriki.”

[Xifaniso lexi nga eka tluka 229]

Ku ringeta ku va munhu la hetisekeke a swi pfuni nchumu, swi fana ni munhu la ringetaka ku haha