Misava Yi Ta Va Paradeyisi!

BUKU yo hetelela ya Bibele, leyi vuriwaka Nhlavutelo yi nyika vanhu hinkwavo ntshembo. Buku leyi, leyi tsariweke hi muapostola Yohane yi vulavula hi swivono leswi fikaka emakumu loko ku hetiseka xikongomelo xa Yehovha.

Eka xivono xo sungula, Yesu la pfuxiweke u bumabumela a tlhela a laya mavandlha yo hlayanyana. Xivono lexi landzelaka xi kombisa xiluvelo xa Xikwembu xa le tilweni, laha swivumbiwa swa moya swi xi dzunisaka kona.

Loko xikongomelo xa Xikwembu xi ya emahlweni, Xinyimpfana, ku nga Yesu Kreste u nyikiwa buku-nsongwa leyi nga ni swilemo swa nkombo. Loko ku pfuriwa swilemo swo sungula swa mune, ku humelela vagadi va tihanci vo fanekisela. Wo sungula i Yesu la gadeke hanci yo basa naswona a vekiweke ku va Hosi. Ku landzela vanhu van’wana lava gadeke tihanci ta mivala yo hambana-hambana, leti hi ku ya hi vuprofeta ti yimelaka nyimpi, ndlala ni ntungu—swilo leswi hinkwaswo swi humelela emasikwini yo hetelela ya mafambiselo lawa ya swilo. Ku pfuriwa ka xilemo xa vunkombo ku endla leswaku ku biwa timhalamhala ta nkombo to fanekisela, leswi vulaka ku twarisiwa ka vuavanyisi bya Xikwembu. Leswi swi endla leswaku ku va ni mintungu ya nkombo yo fanekisela, kumbe ndlela leyi Xikwembu xi kombisaka ku hlundzuka ka xona ha yona.

Mfumo wa Xikwembu lowu fanekiseriwaka hi n’wana wa mufana la ha ku tswariwaka, wa simekiwa etilweni. Ku sungule nyimpi naswona Sathana ni tintsumi ta yena to homboloka va lahleriwe emisaveni. Rito leri tlakukeke ri ri: “Khombo eka misava.” Diyavulosi u hlundzuke swinene, hi ku tiva leswaku u sele ni nkarhi wutsongo.—Nhlavutelo 12:12.

Yohane u vone Yesu etilweni a fanekiseriwa hi xinyimpfana, a ri ni lava 144 000 lava hlawuriweke exikarhi ka vanhu. Vanhu lava “va ta va tihosi swin’we na” Yesu. Hikwalaho buku ya Nhlavutelo yi paluxa leswaku swirho leswin’wana swa mbewu swi ta va 144 000.—Nhlavutelo 14:1; 20:6.

Vafumi va misava va ta hlengeletana eArmagedoni, “nyimpi ya siku lerikulu ra Xikwembu xa Matimba Hinkwawo.” Va ta lwa ni loyi a gadeke hanci yo basa, ku nga Yesu loyi a rhangelaka mavuthu ya le tilweni. Vafumi volavo hinkwavo va misava leyi va ta lovisiwa. Sathana u ta bohiwa naswona Yesu ni lava 144 000 va ta fuma misava ku ringana “malembe ya 1 000.” Loko ku hela malembe ya gidi, Sathana u ta lovisiwa.—Nhlavutelo 16:14; 20:4.

Xana Mfumo wa Kreste wa Gidi ra Malembe a ri ni vafumi-kulobye wu ta va vuyerisa njhani vanhu lava yingisaka? Yohane u te: “[Yehovha u] ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Misava yi ta va se yi ri paradeyisi!

Hikwalaho buku ya Nhlavutelo yi gimeta rungula ra le Bibeleni. Vito ra Xikwembu ku nga Yehovha ri ta kwetsimisiwa ni vuhosi bya yena byi ta lweriwa hi ku helela hilaha ku nga heriki, hi ku tirhisa Mfumo wa Mesiya!

—Xi sekeriwe ebukwini ya Nhlavutelo.