Dyondzo Ya Ku Tshama U Rindzile—vanhwana

Se i khale Yesu a ri karhi a hlamula xivutiso xa vaapostola vakwe mayelana ni xikombiso xa ku vuya kakwe ni xa ku hela ka misava leyi. Loko a tsundzuka mhaka leyi, u va nyika xitsundzuxo xa vutlhari hi ku tirhisa xifaniso xin’wana. Ku hetiseka ka xona ku ta xiyiwa hi vanhu lava va nga ta va va hanya hi nkarhi wa ku vuya kakwe.

Yesu u sungula ku hlamusela xifaniso hi ku vula a ku: “Mfumo wa matilo wu nga fanisiwa ni vanhwana va khume lava tekeke timboni ta vona va huma va ya hlanganisa muteki. Ntlhanu wa vona a va ri swiphukuphuku, kasi lavan’wana va ntlhanu a va tlharihile.”—Matewu 25:1, 2.

Yesu a nga vuli swona leswaku hafu ya vadyondzisiwa vakwe lava nga ta fuma na yena etilweni va ta va swiphukuphuku naswona hafu leyin’wana yi ta va yi tlharihile. Ku ri na sweswo, u hlamusela leswaku mayelana ni Mfumo, un’wana ni un’wana wa vadyondzisiwa vakwe u ni vuswikoti bya ku hlawula ku va la tlhariheke kumbe a kavanyeteka. Kambe Yesu a nga kanakani leswaku un’wana ni un’wana wa malandza yakwe u ta tshama a tshembekile kutani a kuma mikateko leyi humaka eka Tata wakwe.

Eka xifaniso xexo, vanhwana hinkwavo va khume va huma va ya hlanganisa muteki leswaku va va kona emucatweni. Loko muteki a fika, vanhwana va ta lumeka ndlela hi timboni ta vona, va n’wi xixima loko a tisa mutekiwa endlwini leyi a lunghiseleriweke yona. Kambe xana swilo swi famba njhani?

Yesu u hlamusela a ku: “Lava swiphukuphuku va teke timboni ta vona kambe va nga teki mafurha, kasi lavo tlhariha va teke timboni ta vona ni mafurha va ma chela eka swo chela mafurha. Loko muteki a hlwela, hiloko hinkwavo va khudzehela ivi va etlela.” (Matewu 25:3-5) Kambe muteki a nga fiki hi nkarhi lowu a va wu languterile. Swi tikomba ku ri ni leswi n’wi hlwerisaka kutani vanhwana va khudzehela ivi va etlela. Vaapostola va tsundzuka leswi Yesu a swi vuleke hi wanuna un’wana loyi a a ri n’wana wa hosi loyi a fambeke ivi “a vuya endzhaku ko vekiwa ku va hosi.”—Luka 19:11-15.

Eka xifaniso lexi xa vanhwana va khume, Yesu u hlamusela leswi endlekaka loko muteki a fika, u ri: “Exikarhi ka vusiku ku twakale rito leri nge: ‘Muteki u fikile! Humani mi n’wi hlanganisa.’” (Matewu 25:6) Xana vanhwana lava a va lunghekile va tlhela va xalamuka loko a nga si fika?

Yesu u ya emahlweni a ku: “Kutani vanhwana volavo hinkwavo va pfuka va lulamisa timboni ta vona. Lava swiphukuphuku va byela lavo tlhariha va ku, ‘Hi cheleleninyana mafurha ya n’wina, hikuva timboni ta hina ti lava ku timeka.’ Lavo tlhariha va hlamula va ku: ‘Loko ho mi nyika a ma nge hi ringani hinkwerhu. Fambani mi ya tixavela ya n’wina eka lava xavisaka.’”—Matewu 25:7-9.

Vanhwana va ntlhanu lava nga swiphukuphuku a va nga lunghekanga va tlhela va xalamuka loko muteki a fika. A va na mafurha lama eneleke ya timboni ta vona naswona va fanele va ringeta ku ya kuma man’wana. Yesu u hlamusela a ku: “Loko va ha fambile va ya xava mafurha, muteki a fika. Kutani vanhwana lava a va lunghekile va nghena na yena emucatweni, hiloko nyangwa yi pfariwa. Endzhakunyana vanhwana lavan’wana va vuya kutani va ku, ‘Nkulukumba, Nkulukumba, hi pfulele!’ A va hlamula a ku, ‘Ndzi mi byela ntiyiso, a ndzi mi tivi.’” (Matewu 25:10-12) Wa nga vona vuyelo byo vava bya ku tsandzeka ka vanhwana lava ku tshama va lunghekile ni ku xalamuka!

Vaapostola va swi xiya leswaku muteki loyi Yesu a vulavulaka ha yena hi yena n’wini. Eku sunguleni u tifanise ni muteki. (Luka 5:34, 35) Kutani ku vuriwa yini hi vanhwana vo tlhariha? Loko a vulavula hi lava va “ntlhambinyana,” lava va nga ta nyikiwa Mfumo, Yesu u tirhise marito lama nge: “Ambalani mi lungheka, mi lumeka ni timboni ta n’wina.” (Luka 12:32, 35) Vaapostola va swi xiya leswaku u vulavula hi vanhu lava fanaka na vona loko a hlamusela xifaniso lexi xa vanhwana. Kutani hikwalahokayini Yesu a vulavula hi xifaniso lexi?

Yesu u swi veka erivaleni. Loko a gimeta xifaniso xakwe u ri: “Hikwalaho, tshamani mi rindzile, hikuva a mi ri tivi siku hambi ku ri nkarhi wa kona.”—Matewu 25:13.

Handle ko kanakana, Yesu u lemukisa valandzeri vakwe vo tshembeka leswaku loko a vuya, va fanele va ‘tshama va rindzile.’ Loko a vuya, va fanele va va va lunghekile va tlhela va xalamuka ku fana ni vanhwana va ntlhanu vo tlhariha leswaku va nga lahlekeriwi hi ntshembo wa vona wo hlawuleka kutani va nga yi kumi hakelo ya vona.