Vutomi Ni Vutirheli Bya Yesu

Vanhwana Vo Tlhariha Ni Vo Rivala

YESU a a hlamula xikombelo xa vaapostola va yena xa xikombiso xa vukona bya yena ematimbeni ya Mfumo. Sweswi u nyikela swivumbeko swin’wana swa xikombiso hi swifaniso swinharhu kumbe swikombiso.

Ku hetiseka ka xifaniso xin’wana ni xin’wana ku ta voniwa hi lava hanyaka enkarhini wa vukona bya yena. U boxa xo sungula hi marito lawa: “Enkarhini wolowo, Mfumo wa matilo wu ta fana ni vanhwana va khume lava nga teka timboni ta vona ku ya hlanganisa muteki. Lava ntlhanu eka vona a va ri lavo rivala. Lavan’wana va ntlhanu a va tlharihile.”

Hi nhlamuselo leyi nge “Mfumo wa matilo wu ta fana ni vanhwana va khume,” Yesu a nga vuli swona leswaku hafu ya lava va dyaka ndzhaka ya Mfumo wa le matilweni i vanhu vo hunguka naswona hafu hi lava tlhariheke! E-e, kambe u vula leswaku mayelana ni Mfumo wa matilo, ku na xivumbeko xo fana na lexi kumbe xexo, kumbe leswaku timhaka ta mayelana ni Mfumo ti ta va tano.

Vanhwana va khume va yimela Vakriste hinkwavo lava nga eka nxaxamelo wa Mfumo wa le tilweni kumbe lava vulaka leswaku va le nxaxamelweni wolowo. A ku ri eka Pentekosta ya 33 C.E. laha bandlha ra Vukriste ri tshembisiweke vukati hi Muteki la kwetsimaka, Yesu Kriste la pfuxiweke. Kambe vukati a byi ta humelela etilweni enkarhini lowu taka lowu nga tivekiki.

Eka xifaniso, vanhwana va khume va huma va ri ni xikongomelo xo hlanganisa muteki ni ku joyina nongonoko wa vukati. Loko a fika, a va fanele ku voninga gondzo ra nongonoko hi mavoni ya vona, xisweswo va n’wi hlonipha tanihi leswi a tisaka mutekiwa wa yena eka yindlu leyi lunghiseleriweke yena. Hambi swi ri tano, Yesu wa hlamusela: “Lavo rivala va tekile timboni ta vona, kambe va nga longanga ni mafurha hi tlhelo; kasi lavo tlhariha a va longile swimbitana swa mafurha swin’we ni timboni ta vona. Hi ku hlwela ka muteki, va khudzehela hinkwavo, va etlela.”

Ku hlwela lokukulu ka muteki ku komba leswaku vukona bya Kriste tanihi Hosi leyi fumaka byi ta va eka vumundzuku bya le kule. Eku heteleleni u ta exiluvelweni xa yena hi lembe ra 1914. Enkarhini wa vusiku byo leha emahlweni ka leswi, vanhwana hinkwavo va etlela. Kambe a va avanyisiwi hikwalaho ka leswi. Ku avanyisiwa ka vanhwana vo hunguka i ku pfumala ka vona mafurha eswimbitanini swa vona. Yesu u hlamusela ndlela leyi vanhwana va pfukeke ha yona muteki a nga si fika:

“Hi vusiku lebyikulu ku twala huwa leyi nge: ‘Muteki hi loyi, humani mi ya n’wi hlanganisa!’ Kutani vanhwana va pfuka hinkwavo, va lunghisa timboni ta vona. Lavo rivala va ku ka lavo tlhariha: ‘Hi cheleleni mafurhanyana, hikuva timboni ta hina ta timeka.’ Kambe lavo tlhariha va hlamula va ku: ‘E-e, mafurha lawa ma nga ka ma nga ringani hina na n’wina; yanani mi ya xava ya n’wina eka lava xavisaka.’”

Mafurha ya yimela leswi endlaka Vakriste va ntiyiso va tshama va hatima tanihi vavoningi, ku nga, Rito leri huhutiweke ra Xikwembu, leri va khomeleleke eka rona swinene, swin’we ni moya lowo kwetsima, lowu va pfunaka eku twisiseni ka Rito rero. Mafurha ya moya ya pfumelela vanhwana vo tlhariha ku voninga eku hlanganiseni ka mutekiwa enkarhini wa nongonoko wo ya eka nkhuvo wa vukati. Kambe ntlawa wa vanhwana lavo hunguka a wu nga ri na wona eswimbitanini swa wona mafurha ya moya lama lavekaka. Kutani Yesu u hlamusela leswi humelelaka:

“[Vanhwana lavo hunguka] va ku va ha ya eku xaveni [ka mafurha], muteki a sala a fika. Lava a va tilunghisile, va nghena na yena enkhubyeni, kutani nyangwa yi pfariwa. Endzhakunyana, vanhwana lavan’wana va fika na vona, va ku: ‘Hosi, hosi hi pfulele!’ Kambe a va hlamula, a ku: ‘Ndzi tiyisile ndzi ri ka n’wina a ndzi mi tivi.’”

Endzhaku ka loko Kriste a fikile eMfun’weni wa yena wa le matilweni, ntlawa wa vanhwana lavo tlhariha wa Vakriste lava totiweke va xalamukele eka malunghelo ya vona yo tisa ku vonakala eka misava leyi ya munyama eku dzuniseni ka Muteki la vuyeke. Kambe lava yimelaka hi vanhwana vo hunguka a va nga lunghekelangi ku n’wi nyika ku dzunisa loku ko hoyozela. Kutani loko nkarhi wu fika, Kriste a nga va pfuleli nyangwa ya nkhuvo wa vukati etilweni. U va tshika ehandle exinyamini xa vusiku lebyikulu bya misava, leswaku va herisiwa ni vahomboloki van’wana hinkwavo. Yesu wa hetelela, “hitekani ke, hikuva siku a mi ri tivi, na wona nkarhi a mi wu tivi.” Matewu 25:1-13.

◆ I vamani lava yimeriwaka hi vanhwana va khume?

◆ Xana xitshembiso xa vukati xa muteki xi endliwe rini, kambe u te rini ku ta teka mutekiwa wa yena a ya enkhubyeni wa vukati?

◆ Xana mafurha ma yimela yini, naswona ku va na wona ku pfumelele vanhwana vo tlhariha ku endla yini?

◆ Xana nkhuvo wa vukati wu humelela kwihi?

◆ Xana i vuyelo byihi lebyinene lebyi vanhwana vo hunguka va byi kayelaka, naswona vumundzuku bya vona hi byihi?