Xana Yerusalema A Fanekisela Vujagana?

Enkarhini lowu nga hundza mikandziyiso ya hina a yi vula leswaku Yerusalema la gwineheke a a fanekisela Vujagana. A swi kanakanisi leswaku swilo leswi vanhu va le Yerusalema lava nga tshembekangiki a va swi endla, leswi katsaka ku gandzela swikwembu swa hava ni vukanganyisi, swi hi tsundzuxa swilo leswi Vujagana byi swi endlaka. Hambiswiritano, emalembeni ya sweswinyana mikandziyiso ya hina ku katsa ni buku leyi u nga eku yi hlayeni sweswi, a ya ha vuli leswaku swilo swo karhi swi fanekisela swo karhi loko yi hlamusela vuprofeta, handle ka loko Bibele yi hi nyika xivangelo lexi nga erivaleni xo endla tano. Xana ku ni xivangelo xa Matsalwa xo vula leswaku Yerusalema a a fanekisela Vujagana? Doo!

Xiya leswi landzelaka: Muti wa Yerusalema wu tshame wu va xivindzi xa vugandzeri lebyi tengeke; endzhakunyana vaaki va wona va hundzuke vagwinehi. Loko ku ri Vujagana a byi si tshama byi gandzela hi ndlela leyi tengeke. Ku sukela loko Vujagana byi sungurile hi va-300 C.E., mikarhi hinkwayo a byi dyondzisa tidyondzo ta mavunwa.

Ku engetela kwalaho, endzhaku ka loko muti wa Yerusalema wu lovisiwile hi Vababilona, Yehovha u tlhele a wu pfuxa muti wolowo, hiloko wu tlhela wu va xivindzi xa vugandzeri lebyi tengeke. Hi hala tlhelo, Xikwembu a xi si tshama xi byi rhandza Vujagana naswona loko se byi lovisiwile hi nkarhi wa nhlomulo lowukulu a byi nge he pfuki byi ve kona.

Hi ku ya hi leswi vuriweke laha henhla, hi nga ku yini? Loko hi kambisisa vuprofeta bya le Bibeleni lebyi hetisekeke eka vanhu va le Yerusalema lava nga tshembekangiki, hi nga ha vula leswaku ‘Leswi swa fana ni leswi hi swi vonaka eka Vujagana namuntlha.’ Kambe a xi kona xivangelo xa Matsalwa xo vula leswaku Yerusalema a a fanekisela Vujagana.