Hoxa Xandla Leswaku Vandlha Ri Tshama Ri Ri Ni Vun’we

Loko hi ri ni vamakwerhu, hi titwa hilaha Hosi Davhida a titweke hakona loko a ku: “A hi ku xonga ni ku tsakisa ka swona loko vamakwavo va tshama swin’we hi vun’we!” (Pisalema 133:1) Vun’we bya hina a byo tiendlekela. Un’wana ni un’wana wa hina u fanele a hoxa xandla leswaku hi tshama hi ri ni vun’we.

1. I yini lexi hlamarisaka hi vanhu va Xikwembu?

Loko wo ya enhlengeletanweni ya vandlha etikweni rin’wana, swi nga endleka u nga ri twisisi ririmi ra kona, kambe u ta titwa u ri ekaya. Hikwalaho ka yini? Hikuva hi dyondza Bibele hi tirhisa mikandziyiso leyi fanaka. Naswona hi tikarhatela ku kombisana rirhandzu. Swi nga ri na mhaka leswaku hi tshama kwihi, hinkwerhu hi “vitana vito ra Yehovha, [hi] n’wi gandzela hi vun’we.”—Sofaniya 3:9, nhlamuselo ya le hansi.

2. U nga endla yini leswaku ku va ni vun’we evandlheni?

“Rhandzanani hi mbilu hinkwayo.” (1 Petro 1:22) U nga swi endla njhani leswi vuriwaka hi tsalwa leri? Ematshan’weni yo languta swihoxo swa van’wana, languta leswinene eka vona. Ematshan’weni yo tipfalela ebokisini hi ku tolovelana ntsena ni vanhu lava mi rhandzaka swilo leswi fanaka, ringeta ku tolovelana ni vamakwerhu va mindhavuko yin’wana. Hi nga tlhela hi tikarhatela ku tsuvula xihlawuhlawu xihi na xihi lexi hi nga vaka hi ri na xona.—Hlaya 1 Petro 2:17.a

3. U ta endla yini loko u tlulane milenge ni Mukrestekuloni?

Hi ni vun’we kambe a hi hetisekanga. Mikarhi yin’wana hi khomisa van’wana tingana kumbe hi va twisa ku vava. Hikwalaho, Rito ra Xikwembu ri hi byela leswaku hi ‘ya emahlweni hi rivalelana,’ ri tlhela ri ku: ‘Tanihi leswi Yehovha a hi rivaleleke hi ku tshunxeka, na hina hi fanele hi endla tano.’ (Hlaya Vakolosa 3:13.) Hi twise Yehovha ku vava mikarhi yo tala swinene, kambe u hi rivalerile. Hikwalaho, u lava leswaku hi rivalela vamakwerhu. Loko u xiya leswaku u twise un’wana ku vava, famba u ya lulamisa timhaka.—Hlaya Matewu 5:23, 24.b

ANAKANYISISA

4. Tshika xihlawuhlawu

Hi lava ku rhandza vamakwerhu hinkwavo. Kambe swi nga ha hi tikela ku amukela munhu loyi hi vonaka onge a nga fani na hina. I yini lexi nga hi pfunaka? Hlaya Mitirho 10:34, 35, ivi mi bula hi swivutiso leswi:

• Yehovha u amukela vanhu va mixaka hinkwayo leswaku va va Timbhoni ta yena. U nga n’wi tekelela njhani eka ndlela leyi u va tekaka ha yona vanhu va ndhavuko lowu nga faniki ni wa wena?

• Hi xihi xihlawuhlawu lexi vanhu vo tala va le ndhawini yaka n’wina va nga na xona lexi u lavaka ku xi papalata?

Hlaya 2 Vakorinto 6:11-13, ivi mi bula hi xivutiso lexi:

• U vona onge u nga endla yini leswaku u rhandza vamakwerhu va mindhavuko yo hambanahambana?

5. Rivalela hi ku tshunxeka u tlhela u endla leswaku ku va ni ku rhula

Yehovha u hi rivalela hi ku tshunxeka hambileswi yena a nga taka a nga pfuki a lave leswaku hi n’wi rivalela. Hlaya Pisalema 86:5, ivi mi bula hi swivutiso leswi:

• Yehovha u rivalela hi ndlela leyikulu ku fikela kwihi?

• Hikwalaho ka yini u swi tlangela ku rivaleriwa hi yena?

• Hi swihi swiyimo leswi nga endlaka swi hi tikela ku tshama hi ri ni ku rhula ni van’wana?

Hi nga n’wi tekelela njhani Yehovha kutani hi tshama hi ri ni vun’we ni vamakwerhu? Hlaya Swivuriso 19:11, ivi mi bula hi xivutiso lexi:

• Loko un’wana a ku nyangatsa kumbe a ku khunguvanyisa, u nga endla yini leswaku u antswisa xiyimo?

Mikarhi yin’wana hi khunguvanyisa van’wana. Loko hi va khunguvanyisile, hi fanele hi endla yini? Tlanga VHIDIYO, ivi mi bula hi xivutiso lexi landzelaka.

VHIDIYO: Ku Kondletela Ku Rhula Swa Vuyerisa (6:01)

• Eka vhidiyo leyi, makwerhu wa xisati u endle yini leswaku a kondletela ku rhula?

6. Languta leswinene eka vamakwerhu

Loko hi ya hi tiva vamakwerhu, hi ya hi tiva vumunhu bya vona lebyinene ni lebyi nga riki byinene. Hi nga swi kotisa ku yini ku vona leswinene eka vona? Tlanga VHIDIYO, ivi mi bula hi xivutiso lexi landzelaka.

VHIDIYO: Vana Makwerhu Lonene Ngopfu! (5:10)

• I yini lexi nga ku pfunaka ku vona vumunhu lebyinene bya vamakwerhu?

Yehovha u languta leswinene eka hina. Hlaya 2 Tikronika 16:9a, ivi mi bula hi xivutiso lexi:

• Ku tiva leswaku Yehovha u languta leswinene eka wena swi ku endla u titwa njhani?

NKATSAKANYO

U nga hoxa xandla leswaku ku va ni ku rhula evandlheni hi ku rivalela van’wana ni hi ku rhandza vamakwerhu.

Mpfuxeto

• U nga endla yini leswaku u tshika xihlawuhlawu?

• U ta endla yini loko u tlulane milenge ni Mukrestekuloni?

• Hikwalaho ka yini u lava ku tekelela Yehovha hi ku rivalela van’wana?

KUMA LESWI ENGETELEKEKE

Twana xikombiso xin’wana xa Yesu lexi hi pfunaka ku papalata ku avanyisa van’wana.

Susa Ntsandza (6:56)

Xana swa boha leswaku hi kombela ku khomeriwa hambiloko hi vona onge a hi dyohanga?

“Ku Kombela Ku Rivaleriwa I Xilotlelo Xo Endla Ku Rhula” (Xihondzo xo Rindza, November 1, 2002)

Vona ndlela leyi vanʼwana va dyondzeke hayona ku khoma vanhu vanʼwana hi ndlela leyi fanaka.

Mi Nga Avanyisi Hi Ku Landza Ku Languteka Ka Munhu (5:06)

Dyondza ndlela leyi u nga xi tlhantlhaka ha yona xiphiqo lexi u nga na xona ni munhu un’wana xi nga si vanga xiphiqo evandlheni.

“Lulamisa Timholovo Hi Ndlela Ya Rirhandzu” (Xihondzo xo Rindza, May 2016)