KU ENDLA VADYONDZISIWA
DYONDZO 10
Tiyimisele Ku Pfuna Vanhu Leswaku Va Va Vadyondzisiwa
Nsinya wa nawu: “Hi tiyimisele ku mi chumayela mahungu lamanene ya Xikwembu ni ku nyikela hi vutomi bya hina leswaku hi mi pfuna.”—1 Tes. 2:8.
Leswi Yesu A Swi Endleke
1. Hlalelani VHIDIYO, kumbe mi hlaya Yohane 3:1, 2. Kutani mi hlamula swivutiso leswi landzelaka:
U ehleketa leswaku hikwalahokayini Nikodema a ye eka Yesu nivusiku?—Vona Yohane 12:42, 43.
Leswi Yesu a hlanganeke na Nikodema nivusiku swi swi kombisa njhani leswaku a a tiyimisele ku endla vadyondzisiwa?
Hi Dyondza Yini Eka Yesu?
2. Hi kombisa leswaku hi rhandza vanhu hi ku tiyimisela ku va pfuna va va vadyondzisiwa.
Tekelela Yesu
3. Hlayani hi nkarhi lowu xichudeni xi wu lavaka ni ndhawu leyi xi yi tsakelaka. Xi nga tsakela siku ro karhi evhikini kumbe nkarhi wo karhi esikwini. Xana u ta ntshunxeka ku dyondzela laha a tirhaka kona, ekaya rakwe kumbe endhawini ya mani na mani? Loko swi koteka, cinca leswi u toloveleke ku swi endla leswaku u ta kota ku dyondza hi nkarhi lowu xi wu lavaka ni ndhawu leyi xi yi tsakelaka.
4. Dyondzani nkarhi na nkarhi. Loko u ta va u nga ri kona, u nga khanseli dyondzo. Ku ri na sweswo, xiya leswi:
Xana u nga fambisa dyondzo hi nkarhi wo karhi vhiki rero?
Xana u nga fambisa dyondzo ya wena hi ku tirhisa foyini kumbe vhidiyo?
Xana u nga kombela muhuweleri un’wana leswaku a fambisa dyondzo?
5. Khongelela ku va ni langutelo lerinene. Kombela Yehovha a ku pfuna leswaku u nga xi lahleli mavoko xichudeni xa wena, hambiloko xi nga dyondzi nkarhi na nkarhi kumbe xi nga hatli xi tirhisa leswi xi swi dyondzaka eMatsalweni. (Filp. 2:13) Swi nga endleka leswaku xichudeni xa wena xi ni vumunhu lebyinene; khongelela mpfuno leswaku u dzika eka byona.