Vutshembeki Bya Yobo—Hikwalaho Ka Yini Byi Xiyeka?
“Nḍi ta tiya nḍi tiv̌ula l’a pfumalaka nanḍu nḍi konḍa nḍi fa!” —YOBO 27:5.
1. Yobo a a ri mani, naswona hi swi tivisa ku yini leswaku a a ri munhu wa xiviri?
YOBO a a ri wanuna wo hlawuleka ematin’wini. A a nga ri na rifuwo lerikulu ra leswi vonekaka ntsena kambe a a xiximiwa tanihi muavanyisi ni murhangeri loyi a twelaka vusiwana. Bibele yi vula leswaku a a “tlula v̌av̌anuna hikwav̌o v̌a le v̌uxeni hi v̌ukulu.” (Yobo 1:3; 29:12-25) U tekiwe tanihi wanuna la lulameke ngopfu kun’we na Nowa na Daniyele. (Ezekiel 14:14, 20) Nakambe Bibele yi vulavula hi Yobo tanihi xikombiso xo xi landzela eka Vakriste, xisweswo yi komba leswaku a a ri munhu wa xiviri ematin’wini.—Yakobo 5:11.
2. Xana hi nga tiyiseka njhani leswaku Yobo u ringiwe rini hi Sathana?
2 Yobo a a tshama etikweni ra Uts, leri sweswi ri nga Arabiya. Hambi leswi a a nga ri Muisrayele, Yobo a a ri mugandzeri wa Yehova, ku nga nchumu lowu Yehova a wu yiseke emianakanyweni ya Sathana. Nhlamuselo ya Xikwembu ya leswaku “a ku na munhu l’a fanaka na yena emisav̌eni, l’a fambaka hi ku lulama ni ku tenga” yi hlavutela leswaku a ku ri hava nandza un’wana loyi a hlawulekeke wa Xikwembu loyi a a hanya enkarhini wolowo. (Yobo 1:8) Xisweswo ku ringiwa ka Yobo hi Sathana ku fanele ku endleke loko vamakwavo va ri kule na yena, Vaisrayele, a va ri evuhlongeni aEgipta—nkarhi wo leha endzhaku ka malembe lama landzeleke rifu ra Yosefa muhlayisi loyi a xiyekaka wa vutshembeki hi 1657 B.C.E. ni le mahlweni ka ku va Muxe a nghena endleleni yakwe ya vutshembeki.
3. I mani a tsaleke buku ya Yobo, naswona hikwalaho ka yini a swi kotile ku kuma rungula leri xana?
3 Swi le rivaleni leswaku Muxe hi yena a tsaleke buku ya Yobo. Kambe a nga va a tive ku ringiwa ka Yobo hi ndlela yihi? Endzhaku ka loko Muxe a sindzisiwe ku baleka aEgipta hi 1553 B.C.E. u tshame eMidiyani, ekusuhi ni tiko ra Uts. (Eksoda 2:15-25; Mintirho 7:23-30) Hi nkarhi wolowo, Yobo a a hanya malembe ya 140 yo hetelela ya vutomi lama Yehova a n’wi katekiseke ha wona. (Yobo 42:16) Endzhakunyana, loko Vaisrayele va ri ekusuhi na Uts eku heleni ka riendzo ra vona ra le mananga, Muxe u fanele a twile hi ta malembe yo hetelela ya vutomi bya Yobo ni rifu ra yena.
Vutivi Bya Yobo Lebyi Hikiweke
4. (a) Xana entiyisweni xihlovo xa vutivi bya Yobo hi ta Yehova a ku ri yini, naswona hikwalaho ka yini handle ko kanakana a a vulavurisana ni vatukulu va Abrahama na Isaka? (b) Yobo u ve wanuna wa vutshembeki byo hlawuleka hi ndlela yihi?
4 Loko Yobo a ringiwa, vutivi bya yena hi Xikwembu ni swikongomelo swa xona a byi hikiwile, tanihi leswi a ku ri hava xiphemu na xin’we xa Bibele lexi a xi rhekhodiwile. Hambi swi ri tano, Yobo u ta va a tive xanchumu hi ku tirhisana ka Yehova na Abrahama, Isaka, Yakobo na Yosefa. Leswi swi endliwa hi mhaka ya leswi entiyisweni Yobo a a ri ntukulu-xinghuwe wa Nakor makwa Abrahama, hi Uts n’wana wa mativula wa Nakor. Nakambe, makwavo wa Uts a a ri Bethuwele, tata wa Rebeka nkata Isaka ni kokwana lonkulu wa Yosefa. (Genesa 22:20-23) A swi kanakanisi leswaku Yobo u tlangele vutivi byihi na byihi lebyi a a ri na byona bya ku vulavurisana ka Yehova na Abrahama ni vatukulu va yena, naswona a a tikarhatela ku tsakisa Yehova. Xisweswo Yobo u ve wanuna wa vutshembeki lebyi hlawulekeke, wanuna la pfumalaka xisandzu ni loyi a tinyiketeke eka Yehova hi laha ku heleleke.
5. Ngopfu-ngopfu, i yini lexi endlaka leswaku vutshembeki bya Yobo byi va lebyi xiyekaka?
5 Hi ku hatlisa endzhaku ka ku fa ka Yosefa aEgipta, Vutshembeki bya Yobo byi ve mhaka ya mphikamakaneta exikarhi ka Yehova Xikwembu na Sathana ematilweni lama nga vonekiki. Hambi swi ri tano,a a nga yi twi mphikamakaneta leyi a yi vekiwe eku tshembekeni ka yena. Naswona, ngopfu-ngopfu, ni ku honisa ka yena malunghana ni mhaka leyi a a xaniseka ha yona leswi endleke leswaku vutshembeki bya yena lebyi nga tshovekiki byi va lebyi xiyekaka. Hambi swi ri tano, leswaku malandza ya Xikwembu hinkwawo ya pfuneka endzhaku ka nkarhi, Yehova u endle leswaku Muxe a rhekhoda vuxokoxoko bya mphikamakaneta malunghana ni vutshembeki bya Yobo.
Mphikamakaneta Ya Vutshembeki Bya Yobo
6. (a) Nhlengeletano ya le tilweni yi boxe vukona bya mphikamakaneta exikarhi ka Xikwembu na Sathana hi ndlela yihi? (b) Mphikamakaneta leyi yi sungule rini, naswona a yi katsa yini?
6 Buku ya Yobo yi tsundzuxa hi ta xifunengeto lexi nga vonekiki, naswona hi nyikiwa langutelo ra nhlangano wa tintsumi lowu endlekeke emahlweni ka Yehova Xikwembu etilweni. Kwalaho Yehova u tsundzuxa Sathana, loyi na yena a nga kona, leswaku a ku na “munhu l’a fanaka na yena [Yobo] e misaveni, l’a fambaka hi ku lulama ni ku tenga, I’a tshavaka Xikwembu ni ku fularhela ŝo biha.” (Yobo 1:8) Swi le rivaleni ke, leswaku mphikamakaneta leyi katsaka vutshembeki bya Yobo yi kona. Kambe a hi yintshwa. Mphikamakaneta leyi yi simekiwe loko Sathana a hambukisa Adamu na Eva eka Xikwembu naswona hikwalaho, u te: ‘Ndzi nyike nkarhi, kutani ndzi ta hambukisa un’wana ni un’wana eku ku tirheleni.’—Genesa 3:1-6.
7. Xana i tinhlamuselo tihi leti Sathana a a boheka ku ti vula ehenhleni ka vutshembeki bya Yobo, naswona Diyavulosi u tlhontlhe Xikwembu hi ndlela yihi?
7 Manuku ke, hi nkarhi wa nhlangano lowu wa ximfumo ematilweni, Sathana u bohekile ku vula swivangelo swa vutshembeki bya Yobo. A vutisa a ku: “Šana Yobo u tšhav̌a Šikwembu ntsena? Šana a hi leŝi u ṅwi siv̌elelaka, yena, ni yindlu ya yena, ni ŝilo hikwaŝo ŝa yena-ke? . . . Wa nga ṭhambuluta v̌oko ra wena,” ku tlhontlha Sathana, “u khumba hikwaŝo leŝi a nga na ŝona, u ta v̌ona šana a nga ka a nga ku sanḍi mahlweni e riv̌aleni-ke?”—Yobo 1:9-11.
8. (a) Yehova u wu amukele njhani ntlhontlho wa Sathana? (b) I mihlaselo yihi leyi chavisaka leyi Sathana a yi tiseleke Yobo?
8 Yehova u amukela ku tlhontlha ka Sathana. U tshemba vutshembeki bya Yobo hi laha ku heleleke, a hlamula Sathana a ku: “V̌ona, leŝi a nga na ŝo hikwaŝo, nḍi ŝi v̌eka e mav̌okweni ya wena, ntsena u nga yisi v̌oko ra wena e mmirini wa yena.” (Yobo 1:12) Sathana u hlasela Yobo hi xihatla. Vaxeba lava hlaselaka va khayime tihomu ta Yobo ta 1 000 ni timbhongolo ta 500, va dlaya na varisi hinkwavo ku sala un’we. Sathana a tlhela a rhumela ndzilo lowu humaka hi le tilweni wu herisa tinyimpfu ta Yobo ta 7 000 kun’we ni varisi va tona, wu siya un’we ntsena wa vanhu va kona. Endzhaku Sathana u endle leswaku mavoko manharhu ya Vakalediya ya khayima tikamela ta 3 000 ta Yobo, va dlaya varisi hinkwavo ku sala un’we. Eku heteleleni, Sathana u rhumele xidzedze lexikulu lexi hlaselaka yindlu leyi vana va khume va Yobo a va ri enkhubyeni eka yona, kutani va fa hinkwavo. Endzhaku, hi ku hatlisa lokukulu, lava poneke makhombo lawa va vikele Yobo mahungu lawa ya tsemaka nhlana.—Yobo 1:13-19.
9. I yini lexi endleke leswaku makhombo ya Yobo ma tika ngopfu ku ma tiyisela, hambi swi ri tano Yobo u ma teke njhani?
9 Vona makhombo lama! Hambi loko Yobo a a lo swi twisisa leswaku ya vangiwe hi mani, a swi ta tika leswaku a ma tiyisela. Kambe a nga swi twisisanga! A a nga swi tivi leswaku a a ri yena xivindzi xa mphikamakaneta ematilweni ni leswaku Yehova a a n’wi tirhisa ku komba leswaku ku na vanhu lava nga ta namarhela vutshembeki bya vona ku nga khathariseki ku xaniseka ka tihanyi loku Sathana a ku tisaka ehenhla ka vona. Hambi swi ri tano, loko a hlaseriwe hi maxangu ni hi ku ehleketa leswaku kumbexana Xikwembu a xi tihlamulela hi ndlela yo karhi eku lahlekeriweni ka yena, Yobo u te: “Yehova o nḍi nyikile, Yehova o tlhele a teka; a ku ḍunisiwe v̌ito ra Yehova!” Ina, “e ka ŝona hikwaŝo, Yobo a nga sanḍanga, a nga v̌ekangi nanḍu e ka Šikwembu, ni lo’wuṭongo.”—Yobo 1:20, 22.
10. (a) I lunghelo rihi rin’wana malunghana na Yobo leri Sathana a ri kombeleke, naswona hikwalaho ka yini Yehova a a tsakela ku n’wi nyika rona? (b) Vuyelo bya Yobo bya xiyimo lexi chavisaka lexi a a tsongahateriwe eka xona a byi ri byihi?
10 I ku tsongahatiwa muni konghasi ka Sathana, eka nhlangano wun’wana wa tintsumi, loko Yehova a n’wi tsundzuxa malunghana na Yobo a ku: “Wa ha tiyisile ku lulameni ka yena”! Kambe Sathana a nga tshiki. Se u endla mphikamakaneta ya leswaku loko o nyikiwa nkarhi wo hlasela Yobo emmirini, Yobo u ta rhuketela Xikwembu erivaleni. Hi ku tshemba vutshembeki bya Yobo hambi ku ri ku fikela laha, Yehova u n’wi nyike mpfumelelo, kutani a tsundzuxa Sathana leswaku a nga dlayi Yobo. Kutani Sathana ‘a ba Yobo hi marhumba layo vavisa, ku suka mikondzweni ku fika enhlokweni.’ (Yobo 2:1-8) Yobo u ondzile ku fika eka xiyimo xo tano xa ku xaniseka loku nyenyetsaka lerova maxaka ni vanghana va yena a va khomiwa hi tingana, naswona khale ka vanghana va yena a va n’wi hleka.—Yobo 12:4; 17:6; 19:13-19; 30:1, 10-12.
11. I nhlaselo wihi wun’wana lowu Yobo a a fanele ku wu tiyisela, kutani i yini lexi endleke ku hlayisa ka yena ka vutshembeki ehansi ka maxangu lawa hinkwawo ku va loku xiyekaka?
11 Endzhaku ku ta nhlaselo wun’wana! Ripfumelo ra nsati wa Yobo ri tsana. U ri eka yena: “Šana wa ha tiyisile ku lulameni ka wena-ke? Rukana Šikwembu, u fa!” Kambe a ku ka yena: “U v̌ulav̌ula kukotisa šihunguki loko ši v̌ulav̌ula. Šana hi ta amukela le’ŝo saseka e mav̌okweni ya Šikwembu, hi nga amukeli ŝo biha-ke?” Hi laha mhaka yi vulaka ha kona yi ri, “Yobo a nga dyohanga hi nomu wa yena.” (Yobo 2:9, 10) Kutani loko u tsundzuka leswaku mhaka ya ku xanisiwa ka yena a yi fihliwile eka Yobo, i ku xiyeka muni konghasi ka vutshembeki bya yena!
Xivumbeko Xin’wana Xo Hlasela
12. (a) I vamani vavanuna lava a va tele ku ta chavelela Yobo? (b) Sathana u tirhise vavanuna lava ku ringa Yobo ku ya emahlweni hi ndlela yihi?
12 Kambe Sathana a nga si aneriseka. U tisa vavanuna vanharhu lava vonakaka va ri ni vutlhari ni lava kumbexana va tivaka Yobo swinene, kumbe lava va tweke hi ta ndhuma ya yena, tanihi ‘munhu loyi a a tlula vavanuna hinkwavo va le Vuxeni hi vukulu.’ Swi le rivaleni leswaku va languteke va tlula Yobo hi vukhale. (Yobo 1:3; 15:10; 32:6) Vambirhi va vona i maxaka lama humaka ekule. Elifasi wa Mutemani i ntukulu wa Abrahama hi Teman, ntukulu wa Esawu, kutani Bildad wa Muxuwaki i ntukulu wa Xuwaki n’wana wa Abrahama. (Yobo 2:11; Genesa 36:15; 25:2) Kokwa wa kokwa wa Tsofar a nga tiviwi. Handle ko tilumaluma vanhu lava vanharhu va tele ku ta chavelela Yobo, kambe entiyisweni Sathana u va tirhisa hi matshalatshala yo tsanisa vutshembeki bya Yobo. Tanihi leswi vakonanisi va politiki lava humeleleke tanihi vanghana va tsaniseke vutshembeki bya Vabohiwa ivi va va hambukisa leswaku va Iwisana ni tihulumendhe ta ka vona, Sathana a a tshemba leswaku “v̌atšhav̌eleri” va yena a va ta hambukisa Yobo eka Xikwembu xa yena.—Yobo 16:2, 3
13. (a) Vaendzi va Yobo va endle yini loko va fika? (b) Loko ku vulavurisana ku sungurile, ku vulavuriwe hi yini?
13 Loko va fika, vaendzi lava vanharhu va tshame masiku ya nkombo ni vusiku bya nkombo va miyerile va ri karhi va xiyisisa ku vaviseka lokukulu ni ku tsongahatiwa loku tlurisaka mpimo ka Yobo. (Yobo 2:12, 13) Elifasi, loyi entiyisweni a a ri lonkulu wa kona, eku heteleleni hi yena a sungulaka ku vulavula, a andlala ntlhaveko ni nhloko-mhaka leyi tolovelekeke leswi swi hundzukeke mphikizano lowu va siyerisaneke hi wona kanharhu. Ku vulavula ka Elifasi, kun’we ni ku vulavula ka vanghana va yena loku landzelaka, ngopfu-ngopfu ku vumbiwa hi swisolo. Endzhaku ka loko un’wana ni un’wana wa vasori va yena a vulavurile, Yobo na yena a hlamula, a Iwisana ni tinhlamuselo ta vona. Tsofar a nga hlanganyeli eka khamba ra vunharhu, hi ku vona leswaku ku hava lexi a nga xi engetelaka. Xisweswo Tsofar a vulavula kambirhi ntsena, kasi Elifasi na Bildad un’wana ni un’wana a vulavula kanharhu.
14. I tinhlamuselo ta muxaka muni leti lava vanharhu va ti tirhiseke ku hlasela Yobo, naswona Sathana u tirhise rhengu leri fanaka loko a hlasela Yesu hi ndlela yihi?
14 Ku vulavula ka Elifasi a ku lehile, naswona ririmi ra yena ri na musanyana hi ndlela yo karhi. Ririmi ra Bildad ra vavisa, naswona ra Tsofar rona swi nyanyisa. Tinhlamuselo ta vona ti hleriwe hi mano leswaku ti hetisisa xikongomelo xa Sathana xa ku tshova vutshembeki bya Yobo. Hakanyingi va vula timhaka ta ntiyiso, kambe masungulo ni ku tirhisiwa ko tona ku hoxile. Sathana u tirhise rhengu leri fanaka a hlasela Yesu. A tshaha tsalwa leri vulaka leswaku ntsumi ya Xikwembu a yi ta sirhelela nandza wa xona leswaku a nga vaviseki, Sathana u rhambe Yesu leswaku a komba loko a ri n’wana wa Xikwembu hi ku titshika a wa ehenhla ka tempele. (Matewu 4:5-7; Psalma 91:11, 12) Yobo, hi nkarhi wo leha u kongomane ni ku anakanya loku fanaka ka Sathana.
15. Elifasi u te xihlovo xa makhombo ya Yobo a ku ri yini?
15 Emaritweni yakwe yo sungula, Elifasi u vula leswaku maxangu ya Yobo i ku xupuriwa ka yena hi Xikwembu hikwalaho ka swidyoho swa yena. “I mani a nga lov̌a a nga ri na nanḍu?” ku vutisa yena. “Mina nḍi ŝi v̌onile, la’v̌a rimeke ku homboloka, V̌a byale ku pfilunganya, v̌a ṭhov̌ele ŝona.” (Yobo 4:7, 8) Loko a ya emahlweni, Elifasi u vula leswaku Xikwembu a xi ma tshembi malandza ya xona. “Ŝi ṭanḍa ni malanḍa ya šona, a ši va ṭhembi,” Elifasi u ri, “Ši v̌ona v̌uhunguki ne ka tintsumi ta šona! A ŝi nga v̌i tano ngopfu e ka la’v̌a akeke tindlu ta v̌umba.”—Yobo 4:18, 19.
16. Bildad u wu landzerise ku yini nhlaselo wa Elifasi, naswona i xifaniso xihi lexi nga twariki lexi a xi tirhiseke?
16 Bildad u landzela marito ya nhlaselo. U ri: “Loko u basile, u lulamile kunene [Xikwembu xi] ta ku hlayisa, O ta katekisa yindlu ya wena le’yi lulameke.” Bildad u xiya leswaku mavungu ni tinhlanga swa vuna ni ku fa loko swi pfumala mati ivi a hetelela hi ku tshembeka hi leswaku “la’va riv̌alaka Šikwembu” na vona va ta va tano. Kambe swi hoxe swonghasi ku tirhisa xifaniso lexi eka Yobo ni ku tlhandlekela, a ku “Ni ku langutela ka musanḍi ka hela”!—Yobo 8:6, 11-13.
17. Hi tihi tinhlamuselo ta matimba leti Tsofar a ti endleke?
17 Tinhlamuselo ta Tsofar a ti ri ni matimba ngopfu. ‘Onge Xikwembu xexo xi nga vulavula kutani xi ku byela leswi xi swi ehleketaka!’ ku vula yena. ‘Xikwembu xi tiva leswi u swi endleke. Xi ku xupula kantsongo ku tlula leswi ku fanelaka. Sukela swidyoho swa wena kutani u tshika ku dyoha ka wena hinkwako, kutani u ta va ni nsirhelelo ni vanghana vo tala.’—Yobo 11:4-6, 14-20.
18. Eka xiphemu xa vumbirhi xa nkwetlembetano, lava vanharhu va yise nhlaselo wa vona eka Yobo emahlweni hi ndlela yihi?
18 Eka xiphemu xa vumbirhi xa nkwetlembetano, Elifasi u ya emahlweni ni ku hlasela vutshembeki bya Yobo. ‘Hikwalaho ka yini Xikwembu xi nga ti tshembi hambi ti ri tintsumi, xi nga tshemba njhani munhu loyi a nga riki nchumu wo fana na wena! Munhu wo biha minkarhi hinkwayo u le khombyeni.’ (Yobo 15:14-16, 20) Bildad, a a karihisiwe hi ku tiya ka ku Iwisana ka . . . Yobo ni tinhlamuselo ta vona, kutani a ku: ‘Ku vonakala ka wena ku ta timeka. Miehleketo hinkwayo ya vukona bya wena yi ta hela. Hi leswi endlekaka eka lava rivalaka Xikwembu.’ (Yobo 18:5, 12, 13, 17-21) Tsofar loko a vulavula hi rifuwo ra Yobo ro sungula, wa vutisa: ‘Xana a wu swi tivi leswaku ku tsaka ka lowo biha i ka nkarhinyana, kambe ku tsaka ka mbabva ku hatla ku hela? Matilo ma funengeta swihoxo swa lavo biha.’—Yobo 20:4, 5, 26-29.
19. (a) Hi ku ya hi Elifasi, i ntikelo wihi lowu Xikwembu xi wu vekaka ehenhla ka vutshembeki bya vanhu? (b) Bildad u ma dlayelerise ku yini marito ya nhlaselo eka Yobo?
19 Loko a sungula xiphemu xa vunharhu xa njhekanjhekisano Elifasi wa vutisa: ‘Xana munhu a nga va wa ntikelo eka Xikwembu? Hambi loko a wu lulamile, xana a swi ta pfuna Xikwembu ke? Vuyela eka Xikwembu,’ u ri, ‘kutani lulamisa timhaka ta wena. Kutani u ta pfuxiwa.’ (Yobo 22:2, 3, 21-23) Bildad u dlayelele marito ya nhlaselo. A vutisa a ku, I mani laha misaveni a nga tidzunisaka leswaku u basile? Xikwembu xa kwetsima naswona hambi ku ri n’weti ni tinyeleti a hi nchumu eka xona. Munhu a a ta va yini eka xona, loyi a nga xivungu ntsena!’—Yobo 25:2-6.
Ku Tilwela Ni Ku Lulamisiwa Ka Yobo
20. (a) Yobo u yi hlamule njhani nhlamuselo ya leswaku ku xaniseka i ku xupuriwa loku humaka eka Xikwembu hikwalaho ka swidyoho? (b) Ku tiyimisela ka Yobo a ku ri kwihi, naswona hi swi tivisa ku yini leswaku vutshembeki bya yena a byi ri na mhaka eka Xikwembu ke?
20 Ku nga khathariseki nhlomulo wakwe lowu chavisaka, Yobo a nga kalanga a tinyiketa etinhlamuselweni leti kanganyisaka ta vaxanisi va yena ni kantsongo. Loko ku xaniseka ku ri ku xupuriwa loku humaka eka Xikwembu hikwalaho ka swidyoho, wa vutisa, “Šana timbabva ti hanya ha yini? V̌a dyuhala, v̌a talela hi šuma ha yini?” (Yobo 21:7-13) Kutani ku hambana ni leswi vahehli va Yobo va swi vulaka, Yehova u tiyise vahlayisi va vutshembeki lava hi ndlela yoleyo va nyikelaka nhlamulo eka ku rhukana ka Sathana ka leswaku a nga hambukisa un’wana ni un’wana eku tirheleni ka Xikwembu. (Swivuriso 27:11; Psalma 41:12) Yobo wa tiyiseka hi vutshembeki bya yena n’wini, a ku: “Nḍi ta tiya nḍi tiv̌ula l’a pfumalaka nanḍu nḍi konḍa nḍi fa!” (Yobo 27:5) Doo, a nga endlanga nchumu lowu lulameriwaka hi leswi swi n’wi humeleleke.
21. Elihu u te yini eka vachaveleri va Yobo va vunwa, kutani i ndzulamiso wihi lowu lavekaka lowu a wu nyikeke Yobo?
21 Jaha Elihu u yingisela rito rin’wana ni rin’wana ra njhekanjhekisano lowu wo leha hi vukheta. Se wa vulavula, a byela vachaveleri va mavunwa va Yobo leswaku ku hava lexi va xi vuleke lexi kombeke leswaku Yobo i mudyohi. (Yobo 32:11, 12) Manuku loko a hundzulukela eka Yobo, Elihu u ri: “Nḍi twile mpfumawulo wa marito ya wena, u te: Nḍi basile, a nḍi dyohanga, A nḍi na nanḍu, a nḍi hombolokanga. Kambe, Šikwembu ši kumile nanḍu e ka mina, Ši nḍi languta kukotisa nala wa šona. . . . nḍa ku byela, u hošile kwalaho.” (Yobo 33:8-13; 6:29; 13:24, 27; 19:6-8) Ina, Yobo u kombise ku khathalela lokukulu ka ku tikurisa. Hambi swi ri tano, hi nkarhi lowu fanaka, a nga solanga Xikwembu kumbe ku lahlekeriwa hi ntshembo wa leswaku Xikwembu xi ta endla leswi nga swinene.
22. (a) Endzhaku ka loko a yingisele Yehova, Yobo u te yini? (b) Xikwembu xi lave yini eka vachaveleri va Yobo va vunwa, naswona vuyelo byo hetelela bya Yobo a byi ri byihi?
22 Xidzedze xi sungula ku hunga loko Elihu a heta ku vulavula ka yena, kutani Yehova hi byakwe u vulavula a ri exidzedzeni a ku: “L’a nyamisaka makungu ya mina hi marito la’ma kalaka ku twisisa, i mani šana? Ŝeŝi, tibohe šisuti . . . Nḍi ta ku v̌utisa, u ta nḍi dyonḍisa.” Endzhaku ka ku yingisa Yehova, Yobo wa swi xiya leswaku u vulavula hi ku hatlisa, handle ka ku twisisa loku heleleke, kutani a hundzuka a ri “nṭhurini ne nkumeni.” Endzhaku Yehova u tshinya Elifasi ni vanghana va yena vambirhi, a byela Yobo leswaku a va tsetselela. Endzhaku ka kwalaho Yobo u hanyisiwile kutani a katekisiwa hi majaha ya nkombo ni vanhwanyana vanharhu vo saseka kutani a engeteriwa hi swifuwo leswi tlulaka leswi a a ri na swona eku sunguleni kambirhi. Hi ku hanya malembe ya 140 hi ku leha, Yobo u fe “a dyuhele, a talele hi masiku.”—Yobo 38:1-4; 42:1-17.
23. Vutshembeki bya Yobo byi fanele ku hi khumbisa ku yini?
23 Hakunene, Yobo a a ri wanuna loyi a xiyekaka wa vutshembeki! A a nga ri na ndlela yo tiva leswaku a a endliwe xitirho xa ntlhontlho lowo biha wa Sathana. Leswi swi kandziyisa vutshembeki bya yena ngopfu hikuva hambi leswi a a pfumela leswaku ku xaniseka ka yena a ku huma eka Xikwembu, hambi swi ri tano a nga xi landzulanga Xikwembu kumbe ku xi rhukana. Mawaku dyondzo leyonghasi eka hina, tanihi leswi hi tivaka xihlovo xa miringo ya vutshembeki bya hina! Hakunene, hi fanele ku susumeteriwa ku tekelela xikombiso xa Yobo kutani hi ya emahlweni entirhweni wa Yehova ku nga khathariseki xin’wana ni xin’wana lexi Nala wa Xikwembu a nga xi tisaka xo Iwisana na hina.
Xana U Nga Hlamula?
◻ I timhaka tihi leti endlaka leswaku vutshembeki bya Yobo byi va lebyi xiyekaka?
◻ I vamani lava endzeleke Yobo, naswona i yini leswi Sathana a tshembeke leswaku va ta swi endla?
◻ I tinhlamuselo tihi leti lava vanharhu va ti tirhiseke ku Iwisana na Yobo?
◻ I ku tisirhelela kwihi loku Yobo a ku endleke, kambe u lulamisiwe hi ndlela yihi xana?
◻ Vuyelo a ku ri byihi, naswona hi fanele ku khumbiwa hi ndlela yihi?
[Xifaniso eka tluka 13]
Sathana u rhumele “Vatšhav̌eleri” vanharhu leswaku va ya hambukisa Yobo eka Xikwembu