‘Ku Chumayela Evangeli’ Hi Ntirho Wa Vukondleteri

KUO TUNG, jaha ra Mubudha ro huma eHong Kong, u kume dyondzo ya le kholichi. Hsiu Ying, manana wa le Taiwan, u kume vutshunguri lebyi lavekaka swinene bya vuvabyi lebyi tsemaka nhlana bya n’wana wakwe wa jaha. Xana swiendlakalo leswi swimbirhi leswi vonakaka swi nga fani swi na yini leswi fanaka?

Dyondzo ya le kholichi hi laha ku tolovelekeke a yi ta va xirhalanganya eka Kuo Tung. Kambe hikwalaho ka kereke leyi a nghenaka yona, tinyangwa ti n’wi pfulekerile. Hi laha ku fanaka, endlelo ra swa mirhi leri rharhanganeke leri a ri laviwa hi n’wana wa Hsiu Ying wa jaha a ri kumeka ntsena exibedlhele xa kereke endhawini ya ka vona. Nakambe, hi ku tihlanganisa ni kereke, xiphiqo xi tlhantlhiwile.

Timhaka ta Kuo Tung na Hsiu Ying a hi leti nga tolovelekangiki. Magidi ya vanhu ematikweni lama hluvukaka ya kokeriwe eswikolweni, eswibedlhele, eswisiwaneni ni le ka mintirho ya vukondleteri leyi endliwaka hi tikereke. Hi ndlela leyi va tikumele ku vuyeriwa ka rifuwo loku xiyekaka. Nakambe eka endlelo leri, hi ku joyina kereke vo tala va vona va pfuniwile ku andzisa mpimo wa swirho swa kereke.

Xiendlo Lexi Nga Ni Matimu Yo Leha

Swikolo na swibedlhele swa kereke, kavula, a hi nchumu lowuntshwa. Kahle-kahle, ku sukela emasikwini yo sungula loko varhumiwa va rhumeriwe eka leswi van’wana va swi vuleke matiko ya rivengo ya vuhedeni, swikolo na swibedlhele swi langutiwe tanihi switirho leswi swi humelelaka swa ku pfula tindhawu letintshwa ni ku kuma ntshembo ni xinghana xa vaaki-tiko va kwalaho.

Hi xikombiso, loko yi hlamusela xiyimo eIndia eku sunguleni ka lembe xidzana ra vu-19, buku leyi nge Nineteen Centuries of Missions (1899) yi ri: “Varhumiwa a va ngheneli ntirho wa vuevangeli hi ku gingiriteka ntsena, kambe va tirha na hi ku humelela loku funghiweke ka ntirho wa dyondzo, mirhi na zenana.” Vuyelo hi byihi? “Ntirho wun’wana ni wun’wana wa vurhumiwa wu na swikolo swa wona swa ninhlekanhi, swikolo swa vumaki ni swo boda, xikolo xa le henhla kumbe kholichi, naswona emhakeni yin’wana ni yin’wana, xikolo xa vufundhisi.”

Loko yi hlamusela ntirho wa vutshunguri eka “ntirho wa vurhumiwa,” buku yi ya emahlweni yi ku: “N’anga nkarhi na nkarhi ya amukeleka, naswona ku ntshunxeka loku nyikeriwaka eka ku xaniseka ka miri a ku nyiki ntshembo ntsena eka n’anga, kambe hakanyingi ku landzeriwa hi ku pfumela eka vukhongeri lebyi a byi dyondzisaka. Miti hinkwayo hakanyingi yi kongomisiwa tanihi vuyelo bya ku tshungula ka swa mirhi, ku ala swifaniso ni ku amukela xiletelo xa Vukriste.”

Nakambe leswi a ku ri ntiyiso eIndia swi ve ntiyiso ematikweni man’wana eFar East, Amerika-Dzonga na Afrika. Mianakanyo yo chumayela evangeli hi tindlela ta vukondleteri yi ye emahlweni. Mavandla ya varhumiwa va le Yuropa ni Maamerika, Makhatoliki na Maprotestente, ya rhumele vatirhi etindhawini leti naswona ya tlhome mintirho ya vurhumiwa ni swikolo swa vona, swibedlhele ni mavandla man’wana. Swo tala swa leswi swi tikombe swi humelela eku kokeni ka vanhu va kwalaho lerova ntirho wo tano wa vukondleteri hi ku hatlisa wu ve xiphemu lexikulu xa ntirho wa varhumiwa va le ntsungeni wa malwandle lowu seketeriwaka hi tikereke.

Hi malembe yo tala matshalatshala lawa ya fambisiwaka hi kereke ya kule ya tata ndhawu ya nkoka swinene eka vaaki va kwalaho. Swikolo na tiyunivhesiti ta vona hakanyingi swa xiximeka swinene naswona mavandla ya dyondzo leyi tlakukeke ya laviwa. Kahle-kahle, swibedlhele swa vona swi lulamisiwe ku antswa naswona hakanyingi swi le nkarhini. Kutani, etindhawini to tala, laha tihulumendhe ti tshikileriweke swinene hi swiphiqo leswikulu swa vukondleteri, swa amukeriwa, loko swi nga tlheli swi xiximiwa.

Ku hava ku kanakana leswaku mintirho leyi endliweke hi nongonoko wo tano yi tikombe yi ri yinene ngopfu eka vaaki-tiko lava xisweswo va endleriwaka yona. Swikolo na tiyunivhesiti leti fambisiwaka hi kereke hi xiviri ti lunghiselele magidi ya swichudeni dyondzo leyi a swi ta va swi yi tsoniwile hi ndlela yin’wana. Swibedlhele swo tano ni mintirho ya rihanyo swi tise ku ntshunxeka eka tinhlayo ta vanhu leti nga hlayekiki etindhawini ta le kule ni le ndzhaku. Ntirho wa vumunhu wa Albert Schweitzer na “Manana” Teresa, hi xikombiso, wu tiveka swinene ematikweni hinkwawo naswona hinkwavo ka vona va winile Hakelo ya ku Rhula ya Lembe na Lembe.

Hi tlhelo rin’wana, munhu u fanele ku vutisa: Xana evangeli ya vukondleteri hakunene yi fikelele xikongomelo xa yona? Yi endle Vakriste va ntiyiso eka lava va vuyeriweke hi mintirho yo hanana ke? Xana yi nyikile vanhu ripfumelo ra ntiyiso ni ntshembo? Xa nkoka swinene, hi fanele ku vutisa: Xana leswi hi leswi Yesu a a ri na swona emianakanyweni loko a lerisa valandzeri vakwe ku ‘chumayela evangeli emisaveni hinkwayo’?—Matewu 24:14, King James Version.