Timbhoni Ta Yehova eXivandleni Xa Vurhumiwa
VARHUMIWA va Timbhoni ta Yehova eAsia ni kun’wana hakanyingi va vutisiwa: “Ha yini mi nga ri na mintlawa ya Xinghezi ku fana ni varhumiwa van’wana?” “Xana mi na swikolo leswi ndzi nga rhumelaka vana va mina kona kumbe swibedlhele swa vavabyi?” Nhlamulo, kavula, i e-e. Kambe ha yini va nga ri na swona? Kahle-kahle, ku tiyimisela ka Timbhoni hi kwihi? Naswona ti va endlele yini vanhu ematikweni lawa?
Ku Hambana eMalangutelweni
A swi landzuleki leswaku varhumiwa va Vujagana va endle vapfumeri vo tala hi mintirho ya vukondleteri leyi va yi nyikelaka. Kambe hi ku va mintirho yo tano yi kongomisiwe ngopfu eku aneriseni ka swilaveko swa vanhu swa nyama ematshan’wini ya mintirho ya vona ya moya, varhumiwa lava a va humelelanga eku endleni ka vadyondzisiwa va ntiyiso va Yesu Kriste. (Matewu 7:22, 23; 28:19, 20) Xa nkoka ngopfu, a va swi kotanga ku humesa ntlhantlho wihi na wihi wa nkarhi hinkwawo eka mavabyi ya ku tirhisana lawa va ringetaka ku ya hlula.
Timbhoni ta Yehova, hi tlhelo rin’wana, tikhathalela ntirho wa nkoka swinene wa ku chumayela mahungu lamanene ya Mfumo wa Xikwembu. (Matewu 24:14) Leswi a hi mhaka ya leswi va nga xiyiki kumbe va nga khathariki hi ku xaniseka hinkwako ka vanhu ni vuhomboloki lebyi va byi vonaka. Ku ri na sweswo, i mhaka ya leswi va tivaka leswaku murhi wa swiphiqo leswikulu ntsena, a wu le mavokweni ya vanhu, kambe eka Mfumo wa Xikwembu.—Psalma 146:3-10.
Hakunene sweswo a ku ri leswi Yesu ni vadyondzisiwa vakwe va swi chumayeleke eka lembe xidzana ro sungula. ‘Ndzi fanele ku twarisa Evangeli ya Mfumo wa Xikwembu,’ ku vule Yesu, “hikuva ndzi rhumeriwe swona.” (Luka 4:43) Yesu u kombetele eka wona naswona u chumayele hi ta Mfumo wa Xikwembu tanihi murhi lowu heleleke ntsena, hikuva u swi tivile leswaku swirhalanganya swa misava a swi ri swikulu ngopfu eka munhu ku hlangavetana na swona a ri swakwe. Hambi leswi Yesu a endleke masingita yo tala yo horisa, u khutaze vadyondzisiwa vakwe ku ‘rhanga va tilavela Mfumo wa yena ni ku lulama ka Xikwembu, kutani sweswo hinkwaswo va ta engeteleriwa swona.’—Matewu 6:33.
Endzhakunyana, loko Yesu a rhume vadyondzisiwa va yena, ro sungula u te eka vona: “Kutani loko mi ri karhi mi famba, twarisani mhaka leyi nge: ‘Mfumo wa matilo wu le kusuhi.’” Kutani u engeterile: “Hanyisani lava vabyaka, mi pfuxa vafi, mi basisa vanhlokonho, mi hlongola mademona.” (Matewu 10:7, 8) Sweswo swi veka xikongomelo xa vadyondzisiwa va manguva lawa va Yesu Kriste. Na vona, va fanele ku veka ku chumayela mahungu lamanene ya Mfumo tanihi ku tiyimisela ka vona lokukulu, ehenhla ni ku tlula ku endla mintirho ya vanhu. Sweswo hi leswi varhumiwa va Timbhoni ta Yehova va swi endaka hi matimba.
Ku Tata Swilaveko Swa Vanhu Swa Moya
Tanihi ntlawa wa Vakriste, Timbhoni ta Yehova ti nghenele nongonoko lowukulu wo tirhandzela wa ku lunghiselela dyondzo ya Bibele eka vanhu. Hi ku va vahuweleri va mahungu lamanene, va tsakela ku pfuna van’wana leswaku va pfuneka eka vutlhari na xitsundzuxo xa Bibele, sweswi ni le nkarhini lowu taka. (Psalma 68:11) Ha yini leswi swi ri tano?
Timbhoni ti twisisa leswaku loko vanhu va pfuniwa ku twisisa ni ku landzela xitsundzuxo xa Bibele, va tilulamisela ku antswa ku kongomana ni swiphiqo na mintshikilelo ya vutomi. Hi tlhelo rin’wana, va kuma ku tiyisela lokunene loku lavekaka ko hlula mikhuva ya vuhlonga ni leyi onhaka miri yo tanihi ku dzaha, ku nwa ngopfu, ku tirhisa swidzidzirisi hi ndlela yo biha, rihanyo leri nga nyawuriki, ku tlanga hi mali ni mpfangano wa rimbewu. Hi tlhelo rin’wana, ntiyiso wa Bibele wu va pfuna ku hundzula miehleketo ya vona, wu va nyika xikongomelo evuton’wini ni ntshembo lowu tiyeke wa nkarhi lowu taka.
Xisweswo, hi ku lunghiselela xivumbeko lexikulu ngopfu xa dyondzo—leyi humaka eRitweni ra Xikwembu, Bibele—Timbhoni ta Yehova ti endla munyikelo lowu kongomeke eku kuriseni ka mahanyelo ni rihanyo ra miri ra tiko leri va tshamaka ni ku chumayela eka rona. Leswi hakanyingi swa xiyiwa hi van’wana lava va languteke hi ku tiyimisela. Hi xikombiso, Dr. Bryan Wilson wa Yunivhesiti ya Oxford, loyi a dyondzeke mintirho ya Timbhoni ta Yehova eAfrika, u hlamuserile epapileni eka Times ya London:
“Timbhoni ta Yehova ta tirha swinene naswona hakanyingi hi vukheta swinene na hi ku tiyimisela ku tlula avhareji leyi nga exikarhi ka vaaki-kulobye. Va lerisiwa hi varhangeri va vona ku hakela mithelo ya vona hi ku hatlisa, ku tshika vukari ni ku papalata ku dyoha. Va ni nawu, va tshembeka ni ku tikhoma emhakeni ya ku nwa. Timhaka leti a ti ri ta risima lerikulu eku kuleni ka ikhonomi ni ku tirhisana ka vandla ra le Vupela-dyambu, naswona a ku nge vi ku hundzeleta ku vula leswaku Timbhoni ta Yehova ti le xikarhi ka vaaki-tiko lava lulameke ni lava gingiritekaka va matiko ya Vantima.”
Hi marito lama fanaka, muxiyi un’wana eAmerika-Dzonga u hlamusele leswi eka phephahungu ra muhleri:
“Timbhoni ta Yehova i vanhu lava tirhaka swinene, lava tshembekaka ni ku chava Xikwembu. Va hanya xikhale ni ku rhandza mukhuva wa vona naswona vukhongeri bya vona byi sekeriwe eka tidyondzo ta Bibele.”
Kutani hambi loko Timbhoni ta Yehova ti nga veki ntikelo eka leswi hi ntolovelo swi vuriwaka evangeli ya vukondleteri, hi ku hiseka va seketela timhaka ta vaaki hi ku pfuna van’wana ku twananisa vutomi bya vona ni milawu leyi tlakukeke ya Bibele. (Varhoma 12:1, 2) Xa nkoka ngopfu, nakambe va pfuna vanhu hinkwako ku tshika ku languta vubihi ni ku nga ringani ka mafambiselo lama onhakaka hi ku anghwetla ya swilo va languta eka mafambiselo lamantshwa lawa Xikwembu xi ma endlaka, lama nga ta ta hi ku hatlisa.—Nhlavutelo 21:5.
[Swifaniso leswi nga eka tluka 8, 9]
Mirhi Eka Ku Vabya Ka Vukondleteri Hi Mfumo Wa Xikwembu
Hlaya matsalwa lama landzelaka eBibeleni ya wena n’wini ivi u aneriseka hi ku vona hilaha Xikwembu xi tshembisaka ha kona ku herisa swiphiqo swa namuntlha ni ku vabya ka vutshila eka mimbango leyi landzelaka:
Rihanyo Esaya 33:24; 35:5, 6; Nhlavutelo 21:4
Dyondzo Esaya 11:9; Habakuk 2:14
Ntirho Esaya 65:21-23
Swakudya Psalma 67:6; 72:16; Esaya 25:6
Vululami Esaya 11:3-5; 32:1, 2