Mikhuva Kumbe Milawu Ya Bibele—Hi Swihi Swi Fumaka Vutomi Bya Wena?
WANUNA wa le Japani la endzeleke tiko rin’wana ra le Asia u hlamarisiwile. Loyi a n’wi endzeleke, hi ku tirhisa swimhandzana swakwe swo dya, u tekile nyama endyelweni leyikulu, a hlawula qatha lerikulu ivi a ri veka endyelweni ya muendzi ya mpunga! Le ndzhaku ekaya aJapani, leswi a swi ta tekiwa tanihi mikhuva leyo biha. Ku hava la faneleke ku tirhisa swimhandzana swakwe swo dya ku teka swakudya eka ndyelo leyikulu handle ka loko swimhandzana swa kona swi sungule hi ku hundzuluxiwa leswaku yinhla leyi nghenisiwaka enon’wini yi nga khumbi swakudya. Kambe loyi a n’wi endzeleke hakunene a a lava ku n’wi kombisa xichavo, hayi ku n’wi hlundzukisa. Leswi nga amukeriwiki eJapani a ku ri xikombiso xa xichavo etikweni leri!
Oho ku hambana ka mikhuva! Mikhuva yo tala i ya hava swonghasi! Naswona i mani la nga vulaka leswaku leyi antswaka hi yihi? Kambe, mikhuva yin’wana yi tiseketele hi vukholwa-hava kumbe tidyondzo ta mavunwa. Eka lava mapfalo ya vona ya leteriweke hi Bibele, mikhuva yo tano hi ku twakala yi fanele ku papalatiwa. I yini lexi nga pfunaka munhu la navelaka ku tsakisa Xikwembu ku boha makungu leswaku i mikhuva yihi yi faneleke ku hlayisiwa naswona ku fikela kwihi? Ku landzela milawu ya Bibele swi nga n’wi pfuna, hikuva Mukriste u amukela Bibele tanihi mpimanyeto wakwe ku nga khathariseki leswaku u tshama kwihi.
Ku Tirhisa Milawu Ya Bibele
Leswaku Rito ra Xikwembu ri na matimba lamakulu yo tirha embilwini ya munhu la titsongahataka ni ku tisa vutomi byakwe eku twananeni lokukulu ni ndlela ya Xikwembu swi kombisiwe hi xitalo. Muapostola Pawulo u vule leswaku Vakriste eTesalonika va amukele Rito ra Xikwembu “ku nga ri kukota mahungu yo huma eka vanhu, kambe tani hi mahungu yo huma eka Xikwembu, hi laha kunene ma nga wona, hikuva Xikwembu xi tirha hi matimba exikarhi ka n’wina lava pfumeleke.” (1 Vatesalonika 2:13) Rito rero ri na matimba swinene lerova, hi laha 1 Vakorinto 6:9-11 yi kombaka ha kona, ri vangele vo tala eKorinto ya khale, leyi xiyiwaka hikwalaho ka vuhomboloki bya yona, ku tshika ndlela ya vona ya khale ya vukhamba, vumbhisa, vudakwa ni vusodoma. Xana Rito ra Xikwembu ra tirha ni le ka wena? Xana milawu ya rona yi lawula vutomi bya wena hi xitalo, yi endla leswaku u vona leswi u faneleke ku swi endla loko u langutane ni mikhuva ya ka n’wina?
Minkarhi yin’wana swi le rivaleni leswaku mukhuva wu lwisana ni milawu ya Bibele hi ku kongoma. Etimhakeni to tano munhu la tivaka mimpimanyeto ya Yehova ni ku rhandza ku n’wi tsakisa u ta papalata mikhuva yo tano. Hi xikombiso, mukhuva wu nga ha va lowuya wo hisa mirhi ya risuna enkosini ku khongotela mufi kumbe ‘moya wakwe lowu humeke’ kumbe ku n’wi navelela rendzo lerinene ni ku endla leswaku “moya” wa yena wu tsaka. Kumbe ku nga va leswaku swikombiso swa tindlu, ti-TV, mimovha ni swin’wana, swa hisiwa ku endlela ku n’wi tsakisa exivandleni xa mimoya. Hambi swi ri tano, Mukriste la tshembaka mhaka ya Bibele ya leswaku vafi “a v̌a tiv̌i ntšhumu” wa swi tiva leswaku mikhuva yo tano yi tiseketele hi ripfumelo ro hemba xisweswo wa yi papalata.—Eklesiasta 9:5, 10; Psalma 146:4.
Kambe, loko mukhuva wu nga tluli milawu ya Bibele hi ku kongoma kambe wu endla ntsena leswaku swi nonon’hwa ku tirhela Yehova Xikwembu hi xitalo, swi nonon’hwa ngopfu ku tiyisa ni ku komba leswaku milawu ya Bibele yi fuma vutomi bya wena. Ku tikarhatela dyondzo ni ku kuma rifuwo, ku tiveka ehansi ka vatswari vutomi hinkwabyo, ni ku hlawuleriwa vavasati hi vatswari swi le xikarhi ka mikhuva leyi tolovelekeke leyi nga khumbaka vuxaka bya munhu na Yehova. Xana milawu ya Bibele yi nga tirhisiwa hi ndlela yihi eka swiyimo swo fana ni leswi?
[Xifaniso lexi nga eka tluka 3]
Ku hisa nhundzu enkosini