Vana Kona Eka Ntsombano Wa Muganga Wa “Tshemba Yehova” Wa 1987

MAYANA nhloko-mhaka leyinene swonghasi leyi hi nga na yona ya mintsombano yerhu ya muganga ya 1987: “Tshemba Yehova”! Hakunene ku n’wi tshemba ka hina Yehova swi hi hambanisa ni misava hinkwayo. Van’wana hinkwavo va veka ku tshemba ka vona eka swilo swo tanihi rifuwo ra vona, vutlhari bya vona, matimba ya vona, kumbe vafumi ni varhangeri va vona va politiki ni va vukhongeri. Ku nga ri khale hinkwaswo sweswo swi ta khomisa gome lerikulu.—Psalma 146:3, 4.

Swi vula yini ku veka ku tshemba ka hina eka un’wana kumbe xin’wana? Ku ya hi vatsari va tidikixinari: “ku tshemba swi vula ku tshama loku heleleke ni loku tiyisekeke eka xin’wana kumbe un’wana.”a Ina, kutani yoleyo i ndlela leyi hi titwaka ha yona. Hi veka ntshembo wa hina eka Yehova hi laha ku heleleke na hi ku tiyiseka.

Ntikelo wa ku tshemba Yehova wu tisiwa emianakanyweni yerhu minkarhi yo tala eRitweni ra Xikwembu. Vatsari va tipisalema hi ku phindha-phindha va hi byela hi ku tshemba ka vona Yehova: “Loko nḍi ri mina, nḍi tiṭhembela Yehova.” “Nḍi v̌ekile ku ṭhemba ka mina e ka wena, Yehova.” Swiga swa vona swi hi tsundzuxa marito ya risimu rin’wana ra tinsimu ta hina ta Mfumo ta Xinghezi leri nge: “Yehova i xichavelo xerhu, /Xikwembu xa hina lexi hi xi tshembaka . . . Yehova i khokholo, /xihlovo xa hinkwaswo leswo lulama.”—Psalma 31:6, 14.

Matsalwa nkarhi na nkarhi ya hi lerisa ku veka ku tshemba ka hina eka Xikwembu: “Ṭhemba Yehova, u endla le’ŝo lulama.” “Ṭhemba Yehova hi mbilu ya wena hikwayo, u nga tiṭhembi ku tlhariha ka wena.” (Psalma 37:3; Swivuriso 3:5) Nakambe Rito ra Xikwembu ri hi byela hi malandza lama tshembekaka ya Yehova lama hakeriweke hikokwalaho ka ku tshemba yena eminkarhini ya maxangu lamakulu. Exikarhi ka volavo a ku ri na Hosi Ezekias, Ebed-Melek, Vaheveru vanharu na Daniyele.—2 Tihosi 18:5; Yeremia 39:18; Daniel 3:28; 6:23.

Hi swi kombisa njhani leswaku hi tshemba Yehova? Ndlela yin’wana i ku n’wi tiva ni ku tshemba hinkwaswo leswi a swi vulaka eRitweni rakwe. Yesu Kriste u hi nyike ndlela yo olova swinene, “Rhangani mi tilavela Mfumo wa Yena ni ku lulama ka yena, kutani sweswo hinkwaswo mi ta engeteleriwa swona.” Ina, loko hi tshemba Yehova hi timbilu ta hina hinkwato, hi ta rhangisa timhaka ta Mfumo wa yena evuton’wini byerhu ivi hi landzela ndlela ya mahanyelo lamanene.—Matewu 6:33.

Ha yini ku tshemba ka hina Yehova ku fanele ku tiya? Hikwalaho ka mintshikilelo leyi tisiwaka eka hina nkarhi na nkarhi. Eka van’wana i nxaniso lowu kongomeke, eka van’wana i miringo yo endla swihoxo. Eka van’wana nakambe ku tshemba ka vona ku ringiwa hi xilaveko xa ku tiyisela. Ntsombano wa hina wa muganga lowu taka wu le xikarhi ka mimpfuno yo tala leyi Yehova a yi lunghiseleleke emasikwini lawa ya makumu.

Nan’waka ntsombano wu ta va wa masiku manharhu lama teleke, Ravuntlhanu, Mugqivela ni Sonto. Hi ku cinciwa ka malehele ya swiyenge, nongonoko wu ta vonaka wu khome mpimo lowu fanaka wa marungula tanihi n’waxemu. Xikongomelo xa timhaka hinkwato ta nongonoko, hi nga tiyiseka, ti ta va to tiyisa ku tshemba ka hina Yehova kun’we ni le ka nhlengeletano leyi vonekaka leyi a yi tirhisaka enkarhini wa sweswi.

Kutani onge mbhoni yin’wana ni yin’wana ya Vukriste ya Yehova yi nga tiyimisela ku va kona eka yin’wana ya mintsombano leyi. Tana ni vana va wena. Fika emahlweni ka risimu ro pfula ni xikhongelo hi Ravuntlhanu nimixo ivi u tshama ku kondza ku fika risimu na xikhongelo xo pfala hi Sonto nindzhenga. Tana ni Bibele, risimu, buku ya tinotsi ni pensele. Nghena hi xitalo eka moya wa leswi swi nyikeriwaka, ku katsa ni tinsimu na swikhongelo. Yingisela leswi nyikeriwaka hi vukheta. Kutani a hi tiyisekeni leswaku hi minkarhi hinkwayo ku tisasekisa ni mahanyelo ya hina swi nga vi leswi solekaka.

Nawu wa Matsalwa lowu nge, ‘byala swo tala, u tshovela swo tala,’ wa tirha emhakeni ya ku va kona ka hina eka Ntsombano wa Muganga wa “Tshemba Yehova.” Loko hi tiyimisela swinene ku teka nongonoko hinkwawo, hi laha hi nga ta kuma mikateko yo tala entsombanweni naswona hi ta va nkateko lowukulu eka van’wana.—2 Vakorinto 9:6.

[Nhlamuselo ya le hansi]