Ma Amukeriwa Eka Mintsombano Ya Muganga Ya “Vabyarhi Va Ku Vonakala”

HI SIKU ro sungula ra masiku ya ku tumbuluxa ku endliwe ku vonakala emisaveni. Hi hlaya leswaku Yehova Xikwembu u te: “Ku v̌onakala a ku v̌e kona! Ku v̌onakala ku v̌a kona.” (Genesa 1:3) Leswi swi pfumelelana ni leswi Yohane a swi tsaleke: “Xikwembu i ku vonakala, kutani eka xona ku hava munyama nikutsongo.”—1 Yohane 1:5.

Tanihi leswi N’wana wa Xikwembu a tirhisanaka ni Tata wa yena, a swi hlamarisi leswi Yesu nkarhi wun’wana a nga te: “Ndzi ku vonakala ka misava.” (Yohane 9:5) Hi nga huma emunyameni kutani hi nghena eku vonakaleni hi ku pfumela eka Yehova Xikwembu ni le ka N’wana wa xona. Yesu nakambe u tlhele a ku: “Mina ndzi ku vonakala, kutani ndzi tile emisaveni leswaku un’wana ni un’wana la pfumelaka eka mina, a nga tshami emunyameni.” (Yohane 12:46) Hikwalaho, Yesu Kriste hi laha ku faneleke malunghana ni valandzeri va yena va ntiyiso u te: “N’wina mi ku vonakala ka misava. . . . Ku vonakala ka n’wina a ku voningele vanhu hi mukhuva wolowo, leswaku va ta vona mintirho leyo saseka, va dzunisa Tata wa n’wina la nge matilweni.”—Matewu 5:14, 16.

Vona nkateko wonghasi wo va ni ntiyiso, ku twisisa Rito ra Xikwembu hi laha ri vekiweke erivaleni ha kona hi “nandza la tshembekaka, wo tlhariha”! (Matewu 24:45-47) A ha ha pfilunganyiwi hi ku pfumela eka Vunharhu-un’we; a ha ha karhateki hi leswaku ha yini Xikwembu xi pfumelela vubihi ni vukari; a hi na ku kanakana hi xiyimo xa vafi. Ku vonakala ku hi nyike ntshembo, ntshembo wa Mfumo. Ku hi paluxele ndlela leyi Xikwembu xi nga Muvumbi wo hlamarisa ha yona. Ku vonakala ka ntiyiso ku hi nyike xikongomelo evuton’wini, ku hetisisa xikongomelo lexi ana a hi vumberiwe xona eku sunguleni, ku dzunisa Muvumbi wa hina, Yehova Xikwembu. Leswi hi swi endla hi ku va vabyarhi va ku vonakala. Ku va vabyarhi va ku vonakala i ku fundziwa ni lunghelo lerikulu, kambe i vutihlamuleri lebyikulu. Ku hetisisa vutihlamuleri byebyo, hi fanele ku tirhisa mpfuno hinkwawo lowu Yehova a hi nyikaka wona. Vona ndlela leyi swi fanelaka ha yona leswaku mintsombano ya hina ya muganga ya 1992 yi vuriwa Mintsombano Ya Muganga Ya “Vabyarhi Va Ku Vonakala”!

Leswaku hi antswisa vutshila ni ku tlangela ka hina xiphemu xa hina xo va vabyarhi va ku vonakala, hi fanele ku va kona eka wun’wana wa mintsombano leyi, hi va kona eka risimu ro pfula ni ku tshama ku kondza ku pfariwa hi xikhongelo. Naswona hi fanele hi nyikela nyingiso lowukulu eka hinkwaswo leswi vuriwaka eplatifomo, ku nga ha va tinkulumo, mimbulavurisano, mintokoto kumbe drama. Ku tsala tinotsi a swi hi nyiki mhaka yo languta eka yona endzhaku, leswaku yi phyuphyisa mianakayo ya hina ntsena, kambe swi hi pfuna swinene leswaku hi yingisela leswi nyikeriwaka. Ina, hinkwerhu hi nkarhi wa nongonoko wa ntsombano, hi fanele hi nyikela ‘nyingiso lowukulu eka leswi hi swi twaka.’—Luka 8:18.