Tanani eNtsombanweni Wa Muganga Wa “Ku Xixima Xikwembu”

MALANDZA ya Yehovha eminkarhini ya khale ehansi ka Nawu wa Muxe a ma fanele ku hlengeletana kanharhu hi lembe eka minkhuvo yo karhi. Leyi a ku ri minkarhi yo tsakisa ni leyi akaka hi tlhelo ra moya.—Deteronoma 16:16.

Namuntlha malandza ya Yehovha hi laha ku fanaka ma hlengeletana kanharhu hi lembe: eka nhlengeletano yo hlawuleka ya siku rin’we, eka nhlengeletano ya xifundzha ya masiku mambirhi, ni le ka ntsombano wa muganga wa masiku manharhu kumbe ya mune. Hi 1994, Timbhoni ta Yehovha ti ta hlengeletana eka Ntsombano Wa Muganga wa “Ku Xixima Xikwembu.”

Rito ra Xikwembu a ri siyi ku kanakana hi nkoka wa ku xixima Xikwembu. Ku xixima ko tano ku boxiwa minkarhi ya 200 eka rona. Ku xixima Xikwembu i xisirhelelo, hi laha u nga ha vonaka ha kona eka Swivuriso 16:6: “Hi ku tšhav̌a Yehova, v̌anhu v̌a fularela ŝo biha.” Hikwalaho eka Pisalema 111:10 hi byeriwa leswaku ku xixima Xikwembu i masungulo ya vutlhari!

Ku nga vuriwa leswaku ku na tindlela timbirhi ta ku xixima Xikwembu. Ku xixima ko tano ku susumetiwa hi rirhandzu. Hi chava ku hlundzukisa Xikwembu hikwalaho ka rirhandzu ra hina lerikulu eka xona. (Swivuriso 27:11) Nakambe, vutlhari bya hina byi ta hi pfuna ku xixima Xikwembu etimbilwini ta hina, tanihi leswi hi swi tivaka leswaku Xikwembu nakambe “i ndzilo lowu herisaka” hinkwavo lava endlaka leswo biha.—Vaheveru 12:29.

Eka Ntsombano wa hina Wa Muganga wa “Ku Xixima Xikwembu” hi ta kuma vuleteri ni swikhutazo swo tala leswaku hi hambeta hi kula eku xiximeni ka Xikwembu. Dyondzo yoleyo yi ta nyikeriwa hi ku tirhisa tinkulumo, minkombiso, ni drama, ku katsa ni mintokoto.

Tanihi laha Vaisrayele va khale a va lerisiwa ha kona leswaku va nga ti va rhwale mavoko ntsena etinhlengeletanweni ta vona, na hina hi lava ku hlanganyela eka ntsako ni ku endla mintsombano ya hina yi va leyi humelelaka. (Deteronoma 16:17) Hi nga endla leswi hi ku kombisa xichavo eka tafula ra Yehovha. Njhani? Hi ku fika hi nkarhi, hi ku yingisisa hi vukheta eka leswi vuriwaka eplatifomo, hi ku hlanganyela hi mbilu hinkwayo eku yimbeleleni ka tinsimu. A hi nge dyi mabulo kumbe ku famba-famba hi nkarhi wa xiyimiso. Hi lava ku tlhela hi hlanganyela swinene hi laha hi nga kotaka ha kona hi ku tinyiketela emintirhweni yo pfuneta. Ku hleleka ka ntsombano ku katsa tindzawulo to tala, laha hinkwato ka tona ti lavaka vatirhi. Hi ta lava ku tlhela hi endla minyikelo hi timali, hi ku ya hi mpimo lowu Yehovha a hi katekiseke ha wona.

Sweswi nandza un’wana ni un’wana wa Yehovha a endle makungu yo va kona masiku manharhu hinkwawo eka Ntsombano wa Muganga wa “Ku Xixima Xikwembu,” ku sukela eka risimu ro pfula hi Ravuntlhanu ni mpundzu ku fika eka xikhongelo xo pfala hi Sonto ni ndzhenga.