Tanani Eka Ntsombano Wa Muganga Wa “Ririmi Leri Tengeke”

KU HAMBANA hi ririmi a ku ri matimba lama hambanisaka ku sukela eBabele. Kwalaho Yehova u pfilunganye ririmi ra vanhu ivi a herisa xikongomelo xa vanhu xo ‘aka xihondzo leswaku va ti endlela vito leri dumeke.’ (Genesa 11:4) Ndlela leyi ririmi ri nga hambanisaka ha yona yi voniwa kahle eka leswi humeleleke eBelgium. Malembe ma nga ri mangani lama hundzeke, Yunivhesiti ya Khatoliki eLouvain yi hambanisiwe hi le xikarhi hikwalaho ka ririmi.

Ririmi ro va xin’wana xa swivangelo swa ku hambana exikarhi ka vanhu. Swin’wana i vutiko, rixaka, dyondzo ni xiyimo xa timali. Kambe Timbhoni ta Yehova ti endle matshalatshala yo hlula swivangelo leswi hinkwaswo swa ku hambana naswona ti ni vun’we hakunene.

Ximumu lexi hundzeke a ku ri na ku kombisiwa loku xiyekaka ka vun’we lebyi eka madoroba-nkulu ya Chorzów (ekusuhi na Katowice), Poznan na Warsaw ePoland. Timbhoni, leti vulavulaka kwalomu ka tindzimi ta 20 to hambana-hambana, a ti ri kona ti huma ematikweni ya kwalomu ka 37. Hambi swi ri tano, hinkwavo va kombise vun’we lebyi xiyekaka. Hikwalaho ka yini? Hinkwavo a a va vulavula “ririmi leri tengeke” ra ntiyiso wa Matsalwa. Leswi swi vhumbiwe hi vuprofeta eka Sofonia 3:9 hi ku ya hi (NW): “Kutani mina [Yehova Xikwembu] ndzi ta endla vanhu va cincela eka ririmi leri tengeke, leswaku va ta vitana vito ra Yehova, leswaku va n’wi tirhela hi vun’we.”

Hikwalaho, hi laha ku fanelaka, mintsombano ya muganga ya 1990 yi ta va ni nhloko-mhaka leyi nge “Ririmi Leri Tengeke.” Hikwalaho ka ku nga hetiseki ka vanhu, minkucetelo yo huma emisaveni yo biha ya Sathana, ni mintirho ya vuxisi ya Diyavulosi ni mademona yakwe, ku vulavula “ririmi leri tengeke” a swi olovi hi minkarhi hinkwayo. Minkarhi hinkwayo hi fanele hi tilangutela ehenhleni ka mimboyamelo ya vutianakanyi leyi nga hi hambanisaka.

Ha yini Xikwembu xi hi nyike ririmi leri leri tengeke? Leswaku hi ta tirhela Yehova “hi vun’we.” Ku hundzuluxela kun’wana ku kombisa leswaku leswi swi vula ku tirhela Xikwembu “ehansi ka joko rin’we” (The Jerusalem Bible); “hi xikongomelo xin’we” (Moffatt); “hi ku twanana” (An American Translation); ni ku “tirhisana entirhweni wa xona.”—Byington.

Hi ku tirhisa tinkulumo, minkombiso, mintokoto, minxaxamelo ya tinkulumo ni mintlango ya Bibele emintsombanweni leyi, hi ta khutaziwa leswaku hi vulavula hi ririmi leri tengeke hi ndlela yo antswa swinene. Nakambe yi ta hi susumetela ku tirha ni vamakwerhu hi laha ku humelelaka swinene na hi ku twanana.

Mintsombano leyi yi ta sungula hi Ravumune hi ku hatlisa endzhaku ka 1:00 p.m. naswona yi ta hela hi 4:00 p.m. hi Sonto. Endlani malunghiselelo sweswi leswaku mi ta va kona eka risimu ro pfula ni ku va kona eka swiyenge hinkwaswo ku kondza ku va xikhongelo xa Sonto nindzhenga.

Tanani ni Tibibele ta n’wina ni tinsimu, naswona mi tilunghiselela ku tsala tinotsi. Nakambe tanani mi ri na torha hi tlhelo ra moya, naswona mi ta famba mi hlomisiwile swinene leswaku mi vulavula hi ririmi leri tengeke ni ku tirhela Yehova.