Broxara Leyi Nga Ni Xivumbeko Lexintshwa

RUNGULA leri nga exihlokweni xo rhanga ri nyikeriwe emisaveni hinkwayo eka Mintsombano ya Muganga ya 1986 ya “Ku Rhula Ka Xikwembu” ya Timbhoni ta Yehova. Laha hi katsakanya tinhlamuselo leti tsakisaka leti endliweke hi xivulavuri:

“Vonani, Ndzi Endla Swilo Hinkwaswo Swi Va Leswintshwa”! Xexo a ku ri xihloko xa xibukwana lexi humesiweke hi Sosayiti ya Watch Tower le ndzhaku hi 1959. Xibukwana xa muxaka lowu xi komberiwe hi varhumiwa eJapani. Ku voniwile xilaveko kwalaho xa nkandziyiso lowu a wu ta nyikela rungula ra Mfumo hi mukhuva lowu twisisekaka, wo olova leswaku ku pfuneka vanhu lava nga tolovelanangiki swinene ni Bibele hi yoxe. Ehansi ka vukongomisi bya Sosayiti ya Watch Tower, varhumiwa lava tlulaka 30 va hlanganyerile eku vumbeni ka xibukwana lexi. Xana xibukwana lexi xintshwa xi tate xilaveko tanihi lexi xi veke xitirho lexikulu xa ku sungula tidyondzo letintshwa eJapani ke?

Mimbuyelo ya tivulavulela hi yoxe. Enkarhini wa ku humesiwa ka xibukwana xa “Vonani,” a ku ri na nhlohlorhi ya vahuweleri va Mfumo va 1 390 eJapani. Namuntlha, nhlohlorhi i 114 480 wa vahuweleri. Kwalomu ka lava hinkwavo va sungurisiwe dyondzo ya Bibele hi xibukwana xa “Vonani.” Eka malembe ya 27 lama nga hundza, tikopi leti tlulaka 8 750 000 ta xibukwana lexi ti hangalasiwile hi ririmi ra Xijapani ntsena. Naswona eka malembe ya 20 lama nga hundza, Japani ri vike nhlohlorhi leyintshwa ya vahuweleri va Mfumo n’hweti yin’wana ni yin’wana handle ka timbirhi. Hambi leswi ku nga riki na ku kanakana leswaku swivangelo swin’wana swi seketele ku andza loku kunene, a ku na ku tipfinyinga leswaku ku tirhisa xibukwana lexi nge “Vonani,” ku sungula tidyondzo ta Bibele ku ve mhaka leyikulu.

Xibukwana lexi xi pfuxetiwile sweswi, hi ku ya hi swilaveko swa sweswi, naswona xi humesiwile emintsombanweni ya “Ku Rhula Ka Xikwembu” tanihi broxara ya mpimo wa magazini ya matluka ya 32. Xiyenge lexintshwa xi engeteriwile eka mhaka leyi nge “Swilo Leswo Biha—Ha Yini Xikwembu Xi Swi Pfumelela?” Ku ya emahlweni, tindzimana to hetelela ti tlhele ti tsariwa leswaku ti nyika xichudeni xikhutazo lexi kufumelaka xa ku hlanganyela ni nhlengeletano ya Yehova. Sweswi xibukwana lexi xi hume xi ri na matsalele lamakulu, lama hlayekaka ni swifaniso swo talanyana leswi dyondzisaka. Xifunengeto xa yona lexikulu lexintshwa xo xonga xa mihlovo ya mune xi kombisiwe hi mpimo lowuntsongo eka tluka lerin’wana.

Xana broxara leyi yintshwa leyi nge, “Vonani, Ndzi Endla Swilo Hinkwaswo Swi Va Leswintshwa”!, yi fanele ku tirhisiwa eVuxeni ntsena ke? Handle ko kanakana yi ta va leyi pfunaka swinene kwalaho. Hambi swi ri tano, ku tshembiwa leswaku broxara ya “Vonani,” yi ta va leyi pfunaka swinene ni le nsin’wini hinkwayo ya misava eku sunguleni ka tidyondzo ta Bibele. Kwalomu ka 30 wa malembe ya hundzile ku sukela loko xibukwana xo sungula xi humesiwile. Enkarhini wolowo, vutivi bya Bibele byi ehlele ehansi ngopfu, hambi ku ri ematikweni lawa ya tivulaka ya Vukriste. Ematshan’wini yo twa switori leswi tiviwaka swinene leswi humaka eBibeleni eka vatswari va vona, rixaka lerintshwa ri kule ni mahlo ni tindleve leswi namarheleke thelevhixini, ri tswonga xin’wana ni xin’wana lexi misava yi xi nyikelaka. Leswi, kun’we ni swihinga swin’wana swa misava leyi hlanyisiwaka hi ntsako, swi teke tiawara ta nkoka leti a ti ta va ti tirhiseriwe nhluvuko wa moya. Rixaka ra manguva lawa, hambi ku ri eka Vujagana kumbe kun’wana, ri tiva swintsongo ngopfu hi Rito ra Xikwembu. Ri lava ‘ntswamba wa Rito,’ tanihi laha wu vekiweke erivaleni ha kona eka broxara leyi nge “Vonani.”—Vaheveru 5:12.

Emisaveni hinkwayo, ku na vanhu lava timbilu ta vona ti namarheleke eku lulameni ni lava nga ta tsakela ku dyondza ndlela leyi va nga katsiwaka ni “ntshungu lowukulu” lowu nga ta pona Armagedoni ha yona. (Nhlavutelo 7:9, 14) Entirhweni wa hina wa yindlu na yindlu, hi nga ha kuma vo tala lava nyanyuriwaka hi xifunengeto xa swifaniso leswi rhandzekaka swa broxara na hi nhlamuselo leyi nyanyulaka ya Paradeyisi eka tindzimana leto sungula. Eka riendzo ro vuyela, hi nga tirhisa nxaxamelo wa matsalwa lawa ya tshahiweke ku seketela tindzimana teto ku komba leswaku ntshembo lowu wu tlula norho swinene. Manuku ke, hi dyondzo ya Bibele ya nkarhi na nkarhi, hi tirhisa broxara ya “Vonani,” hi nga va pfuna ku sungula ndlela ya vutomi. Tanihi laha Yesu a vuleke ha kona hi xikhongelo eka Tata wa yena: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—Yohane 17:3.

Onge hinkwerhu ka hina hi nga tirhisa broxara leyi nge “Vonani,” hi ku chivirika eku voningeleni ka ntiyiso wa Mfumo, “ntshungu lowukulu” wu tihlanganisa ni masalela ya lava totiweke va vuprista bya le vuhosini eku ‘endleni ka leswaku ku vonakala ka vona ku voningela vanhu.’ (Matewu 5:16) Onge vito leri vangamaka ra Yehova Hosi Leyikulu ri nga kwetsimisiwa hi xitalo. Onge swi nga kombisiwa minkarhi hinkwayo leswaku switshembiso swa Yehova Xikwembu, Muvumbi wa tilo ni misava, swi ‘tshembekile naswona i ntiyiso.’ Hi yena loyi a vulavulaka a ri exiluvelweni xa yena etilweni a ku: “Vonani, ndzi endla swilo hinkwaswo swi va leswintshwa.”—Nhlavutelo 21:5.

Broxara leyi nge “Vonani, Ndzi Endla Swilo Hinkwaswo Swi Va Leswintshwa”! ni tibroxara leti fambisanaka na yona leti nge Hulumendhe Leyi Nga Ta Tisa Paradeyisi na Vito Ra Xikwembu Leri Nga Tshama Hi Masiku, ti ta rhumeriwa eka adirese ya wena loko u ti kombela, u rhumele munyikelo wa R1,50. Oda eka adirese leyi faneleke hi laha ti longoloxiweke ha kona eka tluka 2.