Xana U Ta Namarhela Ntiyiso?

LOKO u sungule ku dyondza Bibele na Timbhoni ta Yehova, xivutiso-nkulu lexi u faneleke ku xi hlamula leswaku u anerisa wena n’wini hi lexi, Xana lowu i ntiyiso? Loko u kuma leswaku hi wona, xana u ta wu namarhela? Swivutiso leswi fanaka swi kongomane ni vanhu emasikwini ya Yesu Kriste ni ya vaapostola vakwe.

Loko vaapostola va chumayele ha Yesu, xana vanhu va endle njhani? Ina, timhaka leti khumbaka Mfumo wa Kriste, mahlori yakwe, gandzelo rakwe ra nkutsulo, ku pfuxiwa kakwe eku feni ni vutomi lebyi nga heriki swi twale swi ri swinene, naswona vo tala va amukele leswi va swi tweke tanihi ntiyiso. Kambe vo tala a va pfumelanga. Entiyisweni, nhlengeletano ya Vukriste ya nkarhi wolowo a yi “ariwa” hinkwako. (Mintirho 28:22) Kutani ku amukela mintiyiso leyi vadyondzisiwa va Yesu va yi chumayeleke swi vule ku lwisana ni mianakanyo leyi tolovelekeke ni ku hlangavetana ni nkaneto. Hikwalaho vanhu lava tsakelaka a va fanele ku swi veka erivaleni leswaku ku aneriseka vona vini leswaku tidyondzo ta Vukriste a wu ri ntiyiso. Hi kona ntsena laha a va ta teka xiyimo lexi tiyeke.

Loko Pawulo na Barnaba va endzele Antiyoka eAsia Minor, vanhu vo tala va yingise rungula ra vona hi ku tsakela lokukulu. Rhekhodo ya Bibele yi ri: “Kaku loko v̌a huma sinagogeni, v̌a v̌a khongela leŝaku hi sabata le’yi taka, v̌a ta v̌a dyonḍisa kambe timhaka [ta Yehova].” (Mintirho 13:42, 44, Bibele ya Xitsonga) Kambe ku tsakela loku ko sungula ku herile eka nhlayo leyikulu ya vanhu loko va twe vakaneti lava nga ni mintlhaveko va lwisana ni vaapostola.

Ndzimana 45 ya Mintirho ndzima 13 yi ri: “Kambe loko Vayuda va vona mintshungu, va tala mavondzo, kutani va kaneta leswi vuriwaka hi Pawulo.” Kutani ndzimana 50 yi ya emahlweni yi ku: “Kambe Vayuda va hlohlotela vavasati lavo chaviseka, va vukhongeri, ni vakulukumba va muti; va sungula ku xanisa Pawulo na Barnaba, kutani va va hlongola etikweni ra vona.” Vanhu lava tsakelaka a va fanele ku hlawula leswaku va ta hambeta va yingisa valandzeri va Yesu ku nga khathariseki nkaneto. A va fanele leswaku va amukela leswi va swi tweke tanihi ntiyiso kumbe va pfala tindleve ta vona eka swona.

Nkaneto Namuntlha

Hambi leswi Vakriste a va kanetiwa eka lembe xidzana ro sungula C.E., kutani ku na vakaneti va namuntlha lava ringetaka ku pfala tindleve ta vanhu lava tsakelaka mintiyiso ya Matsalwa leyi Timbhoni ta Yehova ti yi dyondzisaka. Vanghana, maxaka ni varhangeri va vukhongeri va ringeta hi matimba ku tsanisa vanhu lava tsakelaka eku dyondzeni ka Bibele ni Timbhoni. Handle ka xikombiso xa Matsalwa, vakaneti va kaneta leswi dyondzisiwaka ivi va endla swihehlo swa mavunwa.

Xana vanhu lava tsakelaka va fanele ku endla yini? Xana va fanele ku pfumelela marito ya vakaneti ya pfala mianakanyo ni tindleve ta vona hi laha van’wana va endleke ha kona eAntiyoka ke? Kumbe va fanele ku tiyisa eka vona ku suka eBibeleni loko leswi va swi dyondzaka wu ri ntiyiso kumbe wu nga ri wona ke?

Vanhu lava yingisaka emutini wa Beriya va bumabumeriwile hikuva va kambisise Matsalwa leswaku va vona loko leswi Pawulo a va byeleke swona wu ri ntiyiso. Endzhaku ko kuma leswaku u vulavule ntiyiso, va teke xiyimo lexi tiyeke eka wona. Hi byeriwe leswi: “Vona [Vaberiya] va tlurisa Vatesalonika hi mafundza, va amukela Rito hi ku nkhensa lokukulu, va kambisisa Matsalwa masiku hinkwawo, va lava ku tiva leswaku xana timhaka ti tano xana.”—Mintirho 17:10, 11.

Vanhu va le Beriya a va ya pfumelanga marito ya vakaneti leswaku ya pfala mianakanyo ya vona eka mahungu lamanene. Ku vula sweswo, va kambisise Matsalwa hi masiku ku tiyisa loko swilo leswi va swi tweke swi ri ntiyiso. A va kume rifuwo ra nkoka swinene naswona a va nga ta va pfumelela vakaneti va va hambukisa eka rona. Xana leyi yi nga ka yi nga vi ndlela leyinene yo yi teka malunghana ni mahungu lamanene lama fanaka lama Timbhoni ta Yehova ti ma twarisaka namuntlha ke?

Mhaka Leyi Van’wana Va Kanetaka Ha Yona

Nkarhi wun’wana vakaneti i maxaka lamakulu lama u ma rhandzaka ni ku ma xixima, naswona u na xivangelo xin’wana ni xin’wana xa ku pfumela leswaku va ku tsakela swinene ku tshamiseka ka wena. Kambe u fanele ku lavisisa leswaku ha yini va kaneta ku dyondza ka wena Bibele ni Timbhoni ta Yehova. Xana va na xivangelo lexi tiyeke xa Matsalwa xa leswaku leswi u swi dyondzaka a hi wona ntiyiso? Kumbe nkaneto wa vona wu hikwalaho ka leswi van’wana va va byeleke swona xana? Xana va kayivela vutivi lebyinene hi leswi Timbhoni ti swi dyondzisaka? Vo tala lava kaneteke Yesu va endle tano hi ku honisa leswi a a swi dyondzisa naswona a va tshemba swisolo swa mavunwa swa vakaneti.

Loko Yesu a hayekiwile emhandzeni ya nxaniso, vanhu lava hundzaka “va n’wi rhuketela, va hlakahla tinhloko va ku: ‘Ha! wena la nhlanhlaka Tempele, u tlhela u yi pfuxa hi masiku manharhu, tiponise ke, u xika [emhandzeni ya nxaniso]!’ Hi mukhuva wolowo, na vona vaprista lavakulu swin’we ni vatsari va n’wi tseketsela va ku: ‘Munhu loyi ú ponisile van’wana, kambe yena wa tsandzeka ku tiponisa! Mesiya Hosi ya Israyele a a xike sweswi [emhandzini ya nxaniso], leswaku hi swi vona, hi ta pfumela eka yena.’” (Marka 15:29-32) A xi ri xihi xivangelo xa langutelo leri ro biha?

Vanhu va pfumelele mianakanyo ya vona ehenhleni ka Yesu leswaku yi vumbiwa hi varhangeri va vukhongeri lava n’wi vengeke hikwalaho ka leswi a va paluxeke tanihi vadyondzisi va mavunwa lava swiendlo swa vona a swi nga pfumelelani ni ku tivula ka vona ku va vayimeri va Xikwembu xa ntiyiso. Hi ku tiyisa, Yesu a a te eka vona: “Na n’wina, mi tlulela yini nawu wa Xikwembu hi mikhuva ya n’wina ke? Vakanganyisi, Esaya a a vula n’wina hakunene loko a te: ‘Tiko leri ri ndzi chava hi nomo, kambe mbilu ya rona yi le kule na mina. Va tikarhata ntsena hi ku ndzi nkhinsamela; tidyondzo leti va ti dyondzisaka i milawu ya vanhu ntsena.’”—Matewu 15:3, 7-9.

Varhangeri va vukhongeri va venge Yesu swinene ni mintiyiso leyi a yi dyondziseke lerova va endla xikhiri xo n’wi dlaya kutani va endla matshalatshala wahi na wahi leswaku va hambukisa vanhu eka yena. Namuntlha, varhangeri vo tala va vukhongeri va kaneta Timbhoni ta Yehova hi ndlela leyi fanaka leyikulu. Kutani hi laha a swi ri tano eka Vakriste vo sungula, Timbhoni ta “ariwa” hinkwako. Xana i vutlhari ku pfumelela nkaneto lowu tolovelekeke wu hinganyeta mianakanyo ya wena?

Mintiyiso leyi fanaka ya Matsalwa ehenhleni ka Mfumo wa Xikwembu leyi Yesu ni vaapostola vakwe va chumayeleke ha yona ya twarisiwa namuntlha hi Timbhoni ta Yehova. Madzana ya magidi ya vanhu emisaveni hinkwayo va amukela mahungu lamanene ku nga khathariseki nkaneto lowukulu wa vanghana, maxaka ni varhangeri va vukhongeri. Lava va amukelaka rungula ra Mfumo va kombise ku aneriseka ka vona leswaku i ntiyiso, naswona va tiyimisele ku wu namarhela.

Kutani ha yini u tifanisa ni lavaya va lembe xidzana ro sungula lava pfumeleleke van’wana leswaku va va hambukisa eka mintiyiso leyi nyikaka vutomi ya Matsalwa leyi teke eka vona hi ku tirhisa valandzeri lava nga tolovelekangiki va Yesu Kriste? Ematshan’wini ya sweswo, hambeta u dyondza Bibele na Timbhoni, u tirhisa Rito leri tsariweke ra Xikwembu ku kombisa ku aneriseka ka wena n’wini leswaku leswi u swi dyondzaka hakunene hi wona ntiyiso. (Yohane 8:32) Naswona hi ku pfuniwa hi Xikwembu namarhela ntiyiso.