Vutomi Ni Vutirheli Bya Yesu

Va Katekisiwile Hi Vuleteri Lebyi Engetelekeke

VADYONDZISIWA va ha ku amukela nhlamuselo ya xifaniso xa muhaxi. Kambe sweswi va lava ku tiva leswi engetelekeke. Va kombela va ku: “Hi hlamusele xifaniso xa mfava wa le nsin’wini.”

Ri hambane swinene swonghasi langutelo ra vadyondzisiwa eka leriya ra ntshungu hinkwawo lowu nga ehlalukweni! Vanhu volavo va pfumala ku navela ka xiviri ko dyondza nhlamuselo ya swifaniso, va anerisiwa hi ku xaxametiwa ka swilo leswi va vekeriweke swona. Loko a hambanisa vayingiseri lavaya va le ribuweni ra lwandle ni vadyondzisiwa va yena lava rhandzaka ku tiva, Yesu u ri:

“Mpimo lowu mi pimelaka van’wana ha wona, na n’wina, mi ta pimeriwa ha wona, ni ku tlula kwalaho.” Vadyondzisiwa va fambisana ni ku tsakela ka xiviri ni nyingiso wa Yesu kutani va katekisiwa hi ku amukela vuleteri lebyi engetelekeke. Xisweswo, loko a hlamula xivutiso xa vadyondzisiwa va yena, Yesu wa hlamusela:

“Loyi a byaleke mbewu leyinene i N’wana-wa-Munhu; nsimu i misava; mbewu leyinene i vana va Mfumo; mfava i vana va Lowo biha. Nala la byaleke mfava i Diyavulosi; ku tshovela i ku hela ka minkarhi; vatshoveri vona i tintsumi.”

Endzhaku ko kombisa xivumbeko xin’wana ni xin’wana xa xifaniso xa yena, Yesu u hlamusela vuyelo. U ri, eku heleni ka mafambiselo ya swilo, “vatshoveri,” kumbe tintsumi, va ta hambanisa Vakriste lava fanaka ni mfava eka “vana va Mfumo” va ntiyiso. “Vana va Lowo biha” va ta fungheriwa ku lovisiwa, kambe vana va Mfumo wa Xikwembu, “lavo lulama,” va ta hatima hi ku vangama lokukulu eMfun’weni wa Tata wa vona.

Ku ya emahlweni Yesu u katekisa vadyondzisiwa va yena lava rhandzaka ku tiva hi swifaniso swin’wana swinharhu. Xo sungula, u ri: “Mfumo wa matilo wu fana ni xuma lexi celeriweke ensin’wini, kungate loko munhu a xi thumbile, a nga tlhela a xi celela, kutani eku tsakeni ka yena, a ya xavisa swilo swa yena hinkwaswo, a tixavela nsimu yoleyo.”

U ya emahlweni a ku: “Na swona, Mfumo wa matilo wu fana ni muxavi la lavaka tidayimani letinene; kutani loko a kumile dayimani yin’wana ya nxavo lowukulu a ya xavisa swilo swa yena hinkwaswo, a tixavela yona.”

Yesu hi yexe u fana ni wanuna loyi a tshubulaka xuma lexi fihlekeke naswona u fana ni muxavi loyi a kumaka dayimani ya nxavo lowukulu. Kavula, u xavise hinkwaswo, a sukela xiyimo lexi xiximekaka etilweni leswaku a va munhu la nga nyawuriki. Kutani, tanihi munhu emisaveni, u xanisiwa hi ku soriwa ni nxaniso wa rivengo, a kombisa ku fanelekela ku va Mufumi wa Mfumo wa Xikwembu.

Ntlhontlho wu vekiwa emahlweni ka valandzeri va Yesu leswaku na vona va xavisa hinkwaswo leswaku va kuma hakelo leyinene ya ku va vafumi-kulobye na Kriste kumbe ku va vafumiwa va Mfumo wa laha misaveni. Xana hi ta xiya ku va ni xiphemu eMfun’weni wa Xikwembu tanihi nchumu wa nkoka ngopfu ku tlula nchumu wun’wana ni wun’wana evuton’wini, ku fana ni xuma xa nxavo lowukulu kumbe dayimani leyi vangamaka?

Eku heteleleni, Yesu u fanisa “Mfumo wa matilo” ni nkukuto lowu hlengeletaka tinhlampfi ta mixaka hinkwayo. Loko tinhlampfi ti hambanisiwa, leti nga fanelekiki ta lahliwa kambe letinene ta hlayisiwa. Kutani, Yesu u ri, ku ta va ku ri eku heleni ka mafambiselo ya swilo; laha tintsumi ti nga ta hambanisa lavo biha ni lavo lulama, ti hlayisela lavo biha ku lovisiwa.

Yesu hi yexe u sungula ntirho lowu wo phasa tinhlampfi, a vitana vadyondzisiwa va yena vo sungula leswaku va va “vaphasi va vanhu.” Ehansi ka vukongomisi bya tintsumi ntirho wo phasa tinhlampfi wu hambeta hi malembe xidzana. Eku heteleleni nkarhi wa ta wo humesa “nkukuto,” lowu faniselaka tinhlengeletano emisaveni leti tivulaka ta Vukriste.

Hambi leswi tinhlampfi leti nga fanelekiki ti lahleriwaka endzovisweni, lexi nkhensekaka hi leswaku hina hi nga hlayiwa exikarhi ka ‘tinhlampfi letinene’ leti hlayisiwaka. Hi ku va ni ku navela ka xiviri loku fanaka hi laha vadyondzisiwa va Yesu va endleke ha kona leswaku va va ni vutivi ni ku twisisa loku engetelekeke, hi ta katekisiwa hayi hi vuleteri lebyi engetelekeke ntsena kambe ni nkateko wa Xikwembu wa vutomi lebyi nga heriki. Matewu 13:36-52; 4:19; Marka 4:24, 25.

◆ Vadyondzisiwa va hambana njhani ni mintshungu ya le hlalukweni?

◆ I mani kumbe i yini lexi faniseriwaka hi muhaxi, nsimu, mbewu leyinene, nala, ku tshovela ni vatshoveri?

◆ I swifaniso swihi swin’wana swinharhu leswi Yesu a swi nyikeleke, naswona hi nga dyondza yini eka swona?