Ku Rhula Eku Heteleleni!—Loko Xikwembu Xi Vulavula

“Ku kula ka v̌ulawuri bya hosana ni ku rula a ŝi nga v̌i na makumu.”—ESAYA 9:7.

1. Loko varhangeri va misava va vulavula hi ku rhula nkarhi na nkarhi, ku humelele yini eka matimu hinkwawo ya vanhu?

VARHANGERI va misava va vulavula hi ku rhula nkarhi na nkarhi, naswona vanhu vo tala va vula leswaku va ku navela. Kambe, xiyimo namuntlha xi hi tsundzuxa leswi vuriweke hi muprofeta Yeremiya loko a ku: “A hi ri kari hi langutele ku rula, kambe a hi v̌oni ku rula; ni siku ra ku ongoriwa, kutani langutani, ka tšhav̌isa!” (Yeremia 8:15) Hakunene, ku sukela loko Kayini a dlele Avele, misava a yi vanga na kona ku rhula ka xiviri kambe yi hlaseriwe hi vukari. Naswona lembe xidzana ra hina ra vu-20 ri ve nkarhi wa vukari lebyikulu eka hinkwavo, ri ri na tinyimpi leti vangaka kwalomu ka mafu ya timiliyoni ta dzana. Enkarhini wa hina, 97 wa tiphesente ta vanhu va misava ti katsekile eka nyimpi leyi nga vaka yin’we. Kutani loko varhangeri va misava va ri karhi va vulavula hi ku rhula, va yise vanhu va vona eka makhombo lama landzelelanaka.

2. I xitiviso xihi xa vukari lebyi engetelekeke lexi voniwaka ematikweni hinkwawo?

² Eka hinkwaswo leswi vukari byi faneleke ku katsiwa eka swona ku na ku tivisiwa ka siku na siku ka vugevenga lebyikulu. Hi xikombiso, eUnited States, lembe rin’wana ni rin’wana kwalomu ka 20 000 wa vanhu va gevengiwa. Vavasati lava tlulaka 80 000 va pfinyiwa, ni ku pfinyiwa kun’wana ko tala loku nga vikiwangiki. Kwalomu ka timiliyoni timbirhi ta vavasati ti himeteriwa ngopfu hi vavanuna lava ti tshamaka na vona. Naswona kwalomu ka n’we xa mune xa vini va tindlu hinkwavo va hlaseriwa hi muxaka wo karhi wa vugevenga. Xiviko xa dlayelela xi ku: “Hi ve vandla leri chavisaka ngopfu ra vugevenga.” Xiyimo xa fana ematikweni man’wana yo tala.

3. I vukari byihi lebyikulu ngopfu lebyi nga endliwaka endyangwini wa vanhu sweswi?

3 Hambi swi ri tano, hinkwaswo sweswo a hi nchumu loko swi ringanisiwa ni vukari lebyi nga endliwaka hi matlhari ya namuntlha ya nyutliya. Ku na lawa ya eneleke lerova ya nga dlaya muaki un’wana ni un’wana wa misava hi minkarhi leyi tlulaka 12! Dokodela un’wana u te: “Mirhi ya manguva lawa yi ta pfumala nchumu wo wu nyika vahlaseriwa va nyimpi ya nyutliya.” Hikwalaho ka yini? Un’wana u hlamurile a ku: “Madokodela yo tala, vaongori ni vativi va vuthekiniki va ta va va dlayiwile . . . Swibedlhele swi ta va swi herisiwile. Kutani ku ta va ni lava nga riki vangani lava saleke ni vutivi na switirho leswi eneleke swo ponisa un’wana ni un’wana.”

4, 5. (a) I nhlamuselo yihi leyi buku yin’wana yi yi endleke ehenhleni ka ku kayivela ka ku rhula enkarhini wa hina? (b) Khale ka mutirhela-mfumo wa hulumendhe hi ku fanana u hlamurise ku yini?

⁴ Malunghana ni ku pfumaleka ka ku rhula enkarhini wa hina, nhloko-mhaka-nkulu ya sweswinyana ya buku ya lembe ya Encyclopædia Britannica a yi ku: “Misava ya Hina Leyi Avanaka—Nxungeto wa Mpfilumpfilu wa Misava Hinkwayo.” Yi te: “Endzhaku ka 1945 mianakanyo ya leswaku ‘nhluvuko’ a wu nga papalateki hi ndlela yo karhi ni leswaku vumundzuku bya misava ya manguva lawa a byi ta va lebyi entiyisweni byi hlanganeke ni lebyi twananaka yi tiyisiwile.” Kambe mianakanyo yoleyo, hi ku vula ka yona, “yi tikombe yi ri leyi hoxeke hi laha ku heleleke,” yi engetela yi ku: “Ematshan’wini ya sweswo leswi humeleleke . . . hi leswaku misava yi fambisiwa hi ku avana loku nonokaka yi rhurile kambe yi ri leyi honisaka. Matiko yo tala lawa ntwanano wa wona wa nyama ni wa moya a wu honisiwa ya hohloka . . . [ya va] tinxaka, swivongo, [mintlawa] ya vukhongeri, . . . mintlawa ya doroba, masocha lama dlayaka, mintlawa ya vutherorisi, mintlawa ya valweri va ntshunxeko ni mintlawa leyi tirhandzaka leyintsongo ni leyi nga ni vukari.”

⁵ Hi ku fanana, khale ka mutirhela-mfumo wa hulumendhe eUnited States u te: “Timhaka leti vumbaka ku tsekatseka ka matiko hinkwawo ti kuma matimba ya ku lawula ya matimu eka mavandla lama kondletelaka ntirhisano lowu hlelekeke ngopfu. Makumu lama nga papalatekiki ya nkambisiso wun’wana ni wun’wana lowu ntshunxekeke wa mimboyamelo ya misava hi leswaku mpfilumpfilu wa ntirhisano, nkitsikitsi wa politiki, ku kayakaya ka ikhonomi ni nkwetlembetano wa matiko hinkwawo swi nga va leswi hangalakeke ngopfu enkarhini lowu saleke wa lembe xidzana leri.” U dlayelerile a ku: “Hi ku komisa, mpfilumpfilu lowu langutanaka ni vanhu, i . . . nxungeto wa misava hinkwayo.”

‘Vaendzi Lava Humaka eMpfhukeni’

6. Xana muhleri wa phepha-hungu u hlamusela tinhlamuselo leti vapfhumba lava humaka empfhukeni va nga ti endlaka hi misava namuntlha hi ndlela yihi?

⁶ Hikwalaho ka leswi hinkwaswo, muhleri u tsarile eka phepha-hungu ra Cleveland a ku: “Loko vapfhumba vo fika vhiki leri tlhandlamaka va huma eka xirimele xin’wana xa le kule, xana hi nga va byela leswaku hi boheke ku tidlaya leswaku hi ta simeka vukulukumba bya vukhomonisi kumbe vukhepitalisi? Xana hi nga hlamusela leswaku a hi ri rixaka leri tihambaniseke hi roxe ri va matiko, ni leswaku matiko wolawo a ma hlambanyelane ku dlayana eka minkhuvo ya nkarhi na nkarhi ya ku halatiwa ka ngati? Xana hi nga hlamuserisa ku yini leswaku hi tshike tin’wana ta tinxaka ta hina ti sika kutani tin’wana ti tsongahatiwa ni ku honisiwa hikwalaho ka leswi ku sunguriwa ka ku dlaya lokukulu ku veke ni matimba lamakulu eka hina? Vapfhumba lava humaka eka xirimele xolexo xa le kule entiyisweni a va ta hi hlamusela tanihi lava vuyeke ekaya va ri mintlunya. . . . Hi nga ha vula ni leswaku a hi endla vutshila lebyikulu ni ku tshembela eka vululami. A va ta n’wayitela hi ku vaviseka ivi va famba ku nga si buluka.”

7, 8. (a) I vapfhumba vahi va matimba lava sweswi va kambelaka vanhu? (b) Ha yini va ri laha?

⁷ ‘Kavula,’ van’wana va nga ha ku, ‘a ku na “vapfhumba lava humaka empfhukeni” lava endlaka ku kambela ko tano.’ E-e, hayi lava humaka empfhukeni wa nyama. Kambe hi malembe yo tala sweswi, vapfhumba va matimba lamakulu, lava tlhariheke ngopfu a va ri karhi va kambisisa leswi vanhu a va ri karhi va tiendla swona ni leswi a va swi endla misava hi vukheta lebyikulu. Tlhandla-kambirhi, va tiyiseka leswaku rungula leri twisisekaka ra hangalasiwa “ku buluka ku nga si ta.”

⁸ Vapfhumba volavo va matimba lava a va ri karhi va kambisisa vanhu i vamani? Rito ra Xikwembu ri hi byela leswaku i vayimeri va Xikwembu exivandleni xa moya, tintsumi leti tshembekaka, leti xi ti rhumeke emisaveni leswaku ti ta yi kambela. Mayelana ni swivumbiwa leswi swa moya, Psalma 103:20 yi ri: “Nkhensani Yehova, ṅwina tinṭumi ta yena, le’ti tiyeke matimba, le’ti endlaka ŝileriso ŝa yena. Hi ku yingisa mpfumawulo wa rito ra yena!” Tintsumi leti ta matimba ti boxiwa minkarhi yo tala eBibeleni. Hi xikombiso, eka Matewu ndzima 25 vuprofeta lebyi vulavulaka hi nkarhi wa hina eka tindzimana 31 na 32 byi ri: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.”

9. I xiphemu xihi lexi Yesu Kriste a xi tlangaka enkarhini lowu wa nkambisiso wa vanhu?

⁹ ‘N’wana loyi wa Munhu’ i muyimeri-nkulu wa Xikwembu, Yesu Kriste. Endzhaku ka ku pfuxeriwa ka yena etilweni, u rindzele Yehova leswaku a n’wi nyika xiavelo lexi xo hlawuleka. Hi laha Psalma 110:1 yi hlamuselaka ha kona, Yehova u te eka yena: “Ṭhamisa e v̌okweni ra mina ra šinene, nḍi ko nḍi endla la’v̌a nga v̌alala e ka wena e v̌unav̌elo bya mikonḍo ya wena.” Ku hetiseka ka vuprofeta bya Bibele ku kombisa leswaku nkarhi wa Xikwembu wo rhumela xivumbiwa lexi xa moya xa matimba entirhweni wu te hi lembe ra 1914.

10. I tintsumi tingani leti nga vaka na Kriste loko ti ri karhi ti pfuna entirhweni wo hlawula?

¹⁰ Kambe a xi nga ta ta xi ri xoxe, hikuva Matewu 25:31 yi vule leswaku, “tintsumi hinkwato” a ti ta va na yena. Xana ti nga ha va ti ri tingani? Nhlavutelo 5:11 yi ri: “Hi loko ndzi languta, kutani ndzi twa rito ra tintsumi leto tala, ta magidi ya magidi-gidi ya ntsandza-vahlayi, ti rhendzele xiluvelo [xa Xikwembu].” Gidi ra magidi-gidi i 10 000. Gidi ra magidi-gidi ri andzisiwa hi gidi ra magidi-gidi i 10 000 yi andzisiwa hi 10 000, ntsengo wa 100 wa timiliyoni ta tintsumi! Kambe, Nhlavutelo yi vulavula hi vunyingi, hi “magidi ya magidi-gidi” ya tintsumi leti tirhelaka Xikwembu. Wolawo i madzana ya timiliyoni, kumbexana magidi ya timiliyoni kumbe ku tlula. Ehansi ka vukongomisi bya Kriste, swivumbiwa leswi swa moya swi pfuneta vayimeri va Xikwembu emisaveni eku hambaniseni ka vanhu va va mintlawa mimbirhi, wun’wana wu ta ya “eku biweni loku nga heriki,” lowun’wana wu ta ya “evuton’wini lebyi nga heriki.”—Matewu 25:46; nakambe vona Matewu 13:41, 42.

“Evangeli Leyi Nga Heriki”

11. “Evangeli leyi nga heriki” leyi mavandla ya le tilweni ya tintsumi ya yi seketelaka enkarhini lowu i yini ke?

¹¹ Rungula-nkulu leri vapfhumba lava va tintsumi va ri seketelaka emisaveni enkarhini lowu i yini ke? Nhlavutelo 14:6 ya hi byela yi ku: “Kutani ndzi vona ntsumi yin’wana yi ri karhi yi haha ehenhla mapapeni, yi ri na Evangeli leyi nga heriki, leswaku yi ta yi twarisa eka lava akeke emisaveni, eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.” ‘Evangeli leyi yi nga heriki’ i yini ke? Yi yelana ni leswi Yesu a nga te a byi ta va byin’wana bya vumbhoni byo tala bya leswaku hi hanya emasikwini yo hetelela. Eka Matewu 24:14 u te: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”

12, 13. (a) Ku fuma ka Mfumo i yini ke? (b) Ha yini rungula ra Mfumo ri ri mahungu lama antswaka ngopfu?

¹² Mfumo wa Xikwembu i hulumendhe ya le tilweni leyi nga ta fuma ehenhla ka misava endzhaku ka loko mfumo lowu nga kona wa vanhu wu herisiwile. (Daniel 2:44; Matewu 6:9, 10) Hosi ya wona i Kriste Yesu, naswona u ni vafumi-kulobye na yena. (Nhlavutelo 14:1-4; 20:4) Mfumo wolowo hi lowu ku vulavuriweke ha wona eka Daniel 7:14 hi marito lawa: “Kutani a nyikiwa ku fuma, ni ku kwetsima, ni v̌uhosi leŝaku v̌a tinšaka hikwato, ni v̌a matiko hikwawo, ni v̌a tinḍimi hikwato v̌a ta ṅwi tirela. Ku fuma ka yena i ku fuma lo’ku nga heriki, lo’ku nga [tal ka ku nga hunḍi, kutani v̌uhosi bya yena byi nga ka byi nga herisiwi.”

¹³ Ha yini rungula ra ku fuma ka Mfumo ku ri mahungu yo tano lamanene, mahungu lama antswaka ngopfu ke? Hikuva ya ta tisa misava leyintshwa, xivumbeko lexintshwa xa vandla ra vanhu. Ehansi ka Mfumo wa Xikwembu vanhu va ta amukela mikateko yo hlamarisa ngopfu leyi Psalma 37:11 yi vulavulaka hi lava va nga ta hanya enkarhini wolowo yi ku: “Va musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” Ina, “Yehova o ta katekisa tiko ra yena hi ku rula.” (Psalma 29:11) Namuntlha, loko Mfumo wu nga si lawula timhaka hinkwato ta misava hi laha ku heleleke, mahungu lamanene ya ku fuma ka wona loku nga heriki, ku fuma ko rhula emavokweni ya “Hosana ya ku Rhula” ya chumayeriwa ematikweni hinkwawo. Leswi swi endliwa hi malandza ya Xikwembu ya laha misaveni ehansi ka vukongomisi bya Kriste ni tintsumi.—Esaya 9:6, 7.

14. (a) I ndlela yihi yin’wana leyi ha yona hi nga tivaka malandza ya Xikwembu ya laha misaveni hi ku kongoma? (b) Nkateko lowu xiyekaka wa Xikwembu wu ve ehenhla ka vona hi ndlela yihi?

¹⁴ Malandza lawa ya laha misaveni ya Xikwembu i vamani ke? Ina, i vamani ntsena lava endzelaka vanhu ni mahungu lamanene ya Mfumo nkarhi na nkarhi xana? Hambi va ri vakaneti va va xiya tanihi Timbhoni ta Yehova. Sweswi va tlula timiliyoni tinharhu leti tiyeke, swivandla swa vahuweleri lava va Mfumo swi engeteleka hi ku hatlisa. N’waxemu, 225 868 wa vatirheli lavantshwa va mahungu lamanene va simekiwile. Naswona eka lembe rolero rin’we 2 461 wa mabandlha lamantshwa ya Timbhoni ta Yehova ya simekiwile emisaveni hinkwayo, ku nga avhareji leyi tlulaka 6 siku rin’wana ni rin’wana, ya endla ntsengo wa 52 177 wa mabandlha ematikweni ya 208. Hakunene, vuprofeta bya Esaya 60:22 byi va ni ku hetiseka ka byona: Yehova u hatlisisa ntirho wa yena wo chumayela ni wo hlengeleta “e mikarini ya ŝona.” Naswona sweswi hi wona nkarhi wolowo!

15. Xisekelo xo avanyisa vanhu namuntlha hi xihi ke?

¹⁵ Ndlela leyi vanhu va amukelaka mahungu ya ku fuma ka Mfumo ha yona i xisekelo xa ku vona loko va ta hlawuleriwa ku ‘biwa loku nga heriki’ kumbe ‘vutomi lebyi nga heriki’ emisaveni leyintshwa. Vo tala va endla hi laha lava va hlamuseriweke eka 2 Tikronika 36:15, 16 va endleke ha kona: “Yehova, . . . a v̌a layile e mikarini le’yo tala hi tinṭumi ta yena, hikuv̌a a a ranḍa ku ponisa . . . kambe a v̌a rukana tinṭumi ta Šikwembu, v̌a sanḍa marito ya šona, v̌a hleka v̌aprofeta v̌a šona, v̌ukari bya Yehova byi ko byi pfuka.” Kambe van’wana va swi amukela kahle ivi va ta ehansi ka nsirhelelo wa Yehova. “Kambe l’a nḍi yingisaka [vutlhari bya ntiyiso], o ta tiakela hi ku rula, a nga tšhav̌i khombo.”—Swivuriso 1:20, 33; Matewu 25:34-46.

Mavandla Ya Le Tilweni Ya Nghenela Ntirho

16. Xana Xikwembu xi ta vulavurisa ku yini ni vanhu lava nga yingisiki ku nga ri khale?

¹⁶ Ku nga ri khale, ntirho wa malandza ya Yehova wo chumayela wu ta hetiwa ku fikela eka mpimo lowu a wu vekeleke wona. Ku tiyisela ka Xikwembu vanhu lava nga yingisiki ku ta fika emakumu ka kona. Rungula ra ku rhula leri a a ri karhi a ri byela vanhu erixakeni leri ri ta cinca. Ematshan’wini ya sweswo, “o ta v̌ulav̌ula na v̌ona hi ku kariha ka yena, a v̌a tšhav̌isa hi ku pfura ka v̌ukari bya yena.” (Psalma 2:5) Hi laha Yehova hi yexe a vulaka ha kona u ri: “Kutani hikwalaho ka rilonḍo ra mina, ni nḍilo wa ku kariha ka mina, nḍi tiyisa nḍi ri.” (Ezekiel 38:19) Kutani u ta nyika Yesu Kriste xikombiso xo nghenisa mavandla ya yena ya le tilweni entirhweni wo lwisana ni misava leyi yo xandzuka ni yo biha.

17. Xana matimba ya ntsumi yin’we ntsena ma kombisiwe njhani?

¹⁷ Leswi mavandla wolawo ya nga ta swi hetisisa swi nga voniwa hi leswi humeleleke eAsiriya loko nkarhi wa Xikwembu wu fikile leswaku xi lwisana na yona. Tihosi ta Vumbirhi 19:35 yi ri: “Hi v̌usiku byebyo, nṭumi ya Yehova yi huma, yi dlaya v̌av̌anuna v̌a 185 000 e mišašeni ya v̌a-Asur; . . . v̌a file hikwav̌o.” Sweswo hi leswi swi endliweke hi ntsumi yin’we ntsena! Leswi nga ta endliwa hi magidi ya magidi-gidi ku nga ri khale swi ta chavisa ngopfu.

18. Xana ndzoviso wu ta va lowu hetisekeke emakun’wini ya mafambiselo lawa hi ndlela yihi?

¹⁸ Yeremia 25:31-33 yi hlamusela leswi nga ta humelela hi marito lawa: “Yehova o ni mitengo ni matiko, o tenga ni hikwav̌o v̌olav̌o yi nga nyama, o ta nyika la’vo biha e fumu, ku v̌ula Yehova. Yehova wa mav̌andla o v̌ula, a ku: v̌onani ku biha ku hume tikweni riṅwana ku ya etikweni riṅwana, Šihuhuri le’ši tšhav̌isaka ši ta pfuka e makuṅwini ya misav̌a. E sikwini rolero, la’v̌a tlhav̌iweke i Yehova v̌a ta v̌a kona, ku suka e makuṅwini maṅwana ya misav̌a ku ya fika e makuṅwini maṅwana ya misav̌a; a v̌a nga rileriwi, v̌a nga hlengeletiwi, v̌a nga lahliwi; v̌a ta v̌a v̌ulongo e henhla ka misav̌a.”

19. I vuxokoxoko byihi byin’wana lebyi Nhlavutelo ndzima 19 yi byi engetelaka?

¹⁹ Nhlavutelo ndzima 19 yi hlamusela ndlela leyi Yehova a nga ta endla leswi hinkwaswo ha yona. Hi ku endla leswaku Hosi ya yena Yesu Kriste a ya entirhweni, hi laha ndzimana ya 14 yi vulaka ha kona, “mavandla ya le tilweni” ya ri karhi ya n’wi landzelela. Kutani tindzimana 17 na 18 ti ri: “Kutani ndzi vona ntsumi yi yimile edyambyini. Yi vitana, hi rito leri tlakukeke, tinyanyana hinkwato leti hahaka ehenhla mapapeni, yi ku: Tanani, mi ta hlengeletanela ku lalela enkhubyeni lowukulu wa Xikwembu, mi ta dya nyama ya tihosi, ni nyama ya tindhuna ta tinyimpi, ni nyama ya tinhenha, ni nyama ya timangwa ni ya vagadi va tona, ni nyama ya vanhu hinkwavo, vantshunxeki ni mahlonga, lavakulu ni lavantsongo.” Naswona tindzimana 19 ku ya eka 21 ti hlamusela ndzoviso wa mavandla hinkwawo ya vanhu hikuva va ale ku yingisa loko Xikwembu xi vulavule hi varhumiwa va xona va le misaveni.

20. Ha yini misava leyi yi nga heleri ekhombyeni ra nyutliya?

²⁰ Xisweswo, nkarhi wa ta ku nga ri khale wa Xikwembu leswaku xi herisa mafambiselo lawa ya misava ya vukari, lawa ya avanaka. Kambe makumu wolawo ma nge vi ku tilovisa hi nyimpi ya nyutliya exikarhi ka matiko. Loko sweswo swo humelela, lava lulameke a va ta herisiwa kun’we ni lavo biha. Hambi swi ri tano, ‘vukari’ bya Xikwembu byo lwisana ni misava leyi byi nge vi tano kambe byi ta va lebyi hlawulaka. Ku ta va ni lava nga ta ponela emisaveni leyintshwa. Hi laha Swivuriso 2:21, 22 yi vulaka ha kona: “La’v̌a lulameke v̌a ta aka misav̌eni, la’v̌o tenga v̌a ta siyiwa kona; kambe la’v̌o biha v̌a ta susiwa la misav̌eni, ni timbabv̌a ti ta ṭuv̌uriwa ka yona.”

21. I swivutiso swihi swin’wana leswi nga ta tlhantlhiwa eka xihloko xa hina lexi landzelaka?

²¹ Ha yini misava leyi yi fikelele xiyimo lexi laha ndzoviso wo tano wa misava hinkwayo wu nga kusuhi? Xana a swi koteki leswaku matshalatshala ya sweswinyana ya ku rhula ya varhangeri va misava ya ta veka mihandzu, leswaku mafambiselo lawa ya ta ponisiwa? Naswona loko hi lava ku katsiwa exikarhi ka lava “lulameke” ni lavo “tenga” lava nga ta ponela emisaveni leyintshwa ivi hi hambeta hi hanya, xana hi fanele ku hanyisa ku yini enkarhini lowu wa nkoka ngopfu eka matimu hinkwawo ya vanhu? Xihloko xa hina lexi landzelaka xi ta tlhantlha swivutiso leswi.

Tinhlamulo Ta Wena Hi Tihi Ke?

◻ Xana ku kayivela ka ku rhula ku vonakise ku yini, ngopfu-ngopfu enkarhini wa hina?

◻ Xana mavandla ya tintsumi ya katsekise ku yini eku hlawuleni ka vanhu namuntlha?

◻ Ha yini rungula ra Mfumo ri ri “Evangeli leyi nga heriki”?

◻ Vanhu va avanyisiwa eswisekelweni swihi swa vutomi kumbe swa rifu?

[Xifaniso lexi nga eka tluka 13]

Ntirho wa Timbhoni ta Yehova wu seketeriwe hi mavandla ya tintsumi